Евро 2024: Дэндүү ганган байсан Австрийг Турк мулталж, шуугиан тарив

Евро 2024 тэмцээний хасагдах шатны эхний даваа өндөрлөж, шөвгийн найман багийн нэрс тодорлоо.

РУМЫН 0 – 3 НИДЕРЛАНД

Нидерланд 16 жилийн дараа Еврогийн шөвгийн наймд шалгарлаа. Мюнхен хотод болсон энэхүү тоглолтын эхлэлд Румын сайн байж, бараг л гоол оруулах дөхсөн. Гэхдээ эхний гоолыг Нидерландаас Годи Гакпо оруулав. Түүний гоцлон тоглолт, баруун хөлний хүчтэй цохилтыг зогсоож чадсангүй.

Хожигдож эхэлсэн Румын гоол оруулах боломж эрэлхийлж, хэд хэдэн аюултай довтолгоог зохион байгуулсан ч амжилтад хүрсэнгүй. Эсрэгээрээ Нидерландын хурдтай сөрөг довтолгоо илүү аюул тарьж байлаа. Энэ нь ч үр дүнгээ өгч Донелл Мален хоёр гоол дараалан оруулж, Румыны шигшээг онгоцны буудал хүргэж өгөв.

Мален энэ Еврогийн нэг тоглолтод хоёр гоол оруулсан анхны тамирчин болжээ.

Тоглолтын дараа Нидерландын дасгалжуулагч Роналд Куман "Заримдаа яагаад муу тоглосноо тайлбарлах хэцүү юм. Өнөөдөр тааруу эхэлсэн ч тоглолтоо олж, алдаагаа заслаа. Магадгүй хоёр дахь гоолоо оруулах гэж их удлаа. Румын манай довтолгоонд их саад учруулсан" гэв.

Румыны дасгалжуулагч Эдвард Йорданеску "Өнөөдөр бид хоёр жилийн өмнө эхлүүлсэн аяллаа дуусгалаа. Бид өөрсдийн түүхээ Германд фэнүүдтэйгээ үргэлжлүүлсэн. Баг маань гайхалтай хичээл зүтгэл, бага зэрэг уйтгар гунигийг харууллаа. Бид илүү ихийг хүссэн. Бид бүхнээ зориулсан. Тамирчдадаа, фэнүүддээ, биднийг дэмжсэн дэлхий дээрх румынчууддаа баярлалаа" гэжээ.

АВСТРИ 1 – 2 ТУРК

Тоглолт эхлэхийн өмнө олон хүн Австрийг хожно гэж бодсон нь лавтай. Арга ч үгүй. Туркийн гол хүн Хакан Чалханоглу торгуулийн улмаас энэ тоглолтыг өнжих учир Австрид давуу тал байсан. Гэвч нөхцөл байдал төсөөлснөөс өөр байлаа.

Тоглолт дөнгөж эхлээд Туркийн булангийн цохилт гоол болжээ. 19 настай Арда Гулерийн дамжуулалтыг Мерих Демирал гоол болгож, 57 секундэд гоол оруулав.

Удалгүй Австри хариуг нь барих дөхөж, Баумгартнерын цохьсон бөмбөг хаалгатай тун ойрхон өнгөрлөө. Ерөнхийдөө хоёр баг нээлттэй, харилцан довтолгоотой хөлбөмбөгийг толилуулсан. Тооны харьцаа тэнцэх эсвэл холдох боломжууд цөөнгүй олдов.

Хоёрдугаар үе эхлээд удаагүй байхад өнөөх Демирал дахин булангаас мөргөж, Турк итгэл төгс тэргүүлээд эхэлсэн. Мэдээж дамжуулалтыг нь Арда Гулер. Гэхдээ удалгүй Австрийн шигшээ Туркийн хамгаалалтыг сэтэлж, анхны гоолоо оруулжээ. Ингэснээр тоглолт улам сонирхолтой болж, эцсийн шүгэл хүртэл тайвшрах болоогүйг сануулав. Тоглолтын сүүлийн мөчид Баумгартнерын мөргөсөн бөмбөгийг Гунок хааж, ард түмнээ баярлуулсан. Бараг л орчихсон гоолыг гайхалтай хариу үйлдэл үзүүлж, хаасан даа.

Ийнхүү тоглолт Туркийн ялалтаар өндөрлөж, дэндүү ганган байсан Австрийн шигшээ баг гэртээ харилаа.

Тоглолтын дараа Туркийн дасгалжуулагч Винченцо Монтелла "Манай баг эцсийн минут хүртэл тэмцлээ. Хэсгийн шатанд баг маань бага зэрэг алдаа гаргасан ч бид энд хүрлээ. Бид Евро 2008 тэмцээнд үзүүлсэн амжилттайгаа тэнцэж ирлээ. Бидний дараагийн өрсөлдөгч арслан шиг тулалддаг Нидерландын шигшээ. Бид сэтгэл зүй, бие махбодиороо бэлэн байж, хувь заяагаа дагана" гэв.

Австрийн дасгалжуулагч Ралф Рангник "Бидний аз дутлаа. Би хувьдаа тоглолт нэмэлт цагт үргэлжилж, өөрсдийгөө хожно гэж бодож байлаа. Бидний дөрвөн тоглолт үнэхээр сонирхолтой байлаа. Одоо биднийг Үндэсний лиг, дэлхийн аваргын урьдчилсан шат хүлээж байна. Өнөөдөр өөрсдийгөө гэртээ харина гэдэгт итгэхгүй байна. Бид аяллаа үргэлжлүүлнэ л гэж бодсон" гэжээ.

Шөвгийн найман багийн оноолтыг танилцуулъя.