Жилийн жилд наадмын нээлтийн тасалбар тойрсон хэрүүл, шуугиан гардаг. Энэ жилийн хувьд ч тасалбар зарагдаж эхлээд 10 минутын дотор дууссан гэх шүүмжлэл өрнөсөн. Монголын үндэсний их баяр наадмын нээлтийг үзэхээр олон зуун жуулчин Монголыг зорьдог. Наадам болоход найм хоног дутуу байна. Тиймээс Төв Цэнгэлдэхийн наадмын бэлтгэл ажил хэр байгааг сурвалжиллаа.

ЗАСВАРЫН АЖИЛ ХОЁР ДАХЬ САРДАА ҮРГЭЛЖИЛЖ БАЙНА

Улаанбаатар хотын төвд байрлах төв цэнгэлдэх хүрээлэнд наадмын өдрүүдийг угтсан завсар үйлчилгээний ажлууд үргэлжилж байна. Их засвар, үйлчилгээний ажил тул дуу чимээ ихтэй байх аж. "Эгч ээ, энэ сандлуудыг бүгдийг нь сольж байгаа юм уу, ах аа, энэ зүлгийг шинээр дэвссэн юм уу" гэсэн асуултуудад минь хариулт өгөх завтай, мөн мэдээлэлтэй хүн байсангүй. Бүгд л дор бүрнээ ажлаа хичээнгүйлэн хийнэ. Энд будахыг нь будаж, гагнахыг нь гагнасаар хоёр сарын хугацаа зарцуулжээ. Төв цэнгэлдэх хүрээлэнгийн засвар, үйлчилгээний ажил баяр наадамтай хаяа залган долдугаар сарын 8-9-ний өдөр дуусах төлөвтэй байна.

Төв цэнгэлдэх хүрээлэнгийн дотор болон гадна талд маш олон төрлийн засвар, үйлчилгээ хийж байгаа харагдана. "Төв цэнгэлдэх хүрээлэн" ХХК-ийн гүйцэтгэх захирал Ж.Энхжаргалангаас тодруулснаар "Төв цэнгэлдэх хүрээлэн аюулгүй байдал хангаагүй, өнгө үзэмж муу олон жил болсон. Тиймээс нийслэлээс төсөв гаргаж засвар, үйлчилгээ хийхээр төлөвлөсөн.

Өнөөдрийн байдлаар завсар, үйлчилгээний ажил 77 хувьтай үргэлжилж байна гэв.

Төв цэнгэлдэх хүрээлэнгийн гадна талбайн ил байрлах цахилгаан утаснуудыг янзалж аюулгүй байдлыг ханган ажиллаж байгаа аж. Чөлөөлсөн бүх гадна талбайд ногоон байгууламж, зүлэг шинээр нэмж хийхээр төлөвлөжээ. Өмнө нь төв цэнгэлдэх хүрээлэнд ямар нэгэн камержуулалт байгаагүй.

 Цэнгэлдэхийн нийт 18 хаалган дээр 50 орчим камер шинээр байрлуулжээ.

Үүнээс гадна зарлан мэдээлэх чанга яригч төхөөрөмж шинээр тавьсан. Гоёлын бус орчны  16 орчим цамхагт гэрэл удахгүй тавьж дуусах юм байна. Хотын төвд байрладаг гэхэд шөнөдөө маш харанхуй орчинд байдаг байсан нь ийнхүү сайжирч байгаа аж.

Төв цэнгэлдэх хүрээлэнгийн чанх хойш харвал урьд нь хог шороо хөглөрдөг байсан 7000 м.кв бүхий байршлыг асфальтаар хучиж, зөвхөн тоглолттой өдрүүдэд зогсоол хэлбэрээр ашиглахаар тохижуулжээ. Баяр наадмын өдрүүдэд хүнс үйлдвэрлэл, худалдаа хийх зориулалт бүхий асруудыг мөн энд байршуулахаар төлөвлөсөн байна. Үүнээс гадна төв цэнгэлдэх хүрээлэнгийн дотоод албаны зориулалттай өрөөнүүдэд ч мөн завсар үйлчилгээний ажлууд хийж байгаа харагдав.

НААДМЫН ӨДРҮҮДЭД ҮЙЛЧЛЭХ АРИУН ЦЭВРИЙН ӨРӨӨНИЙ ТООГ НЭМЖЭЭ

Хуучин төв цэнгэлдэх хүрээлэнгээс эхлээд есөн жилийн турш ашиглагдаж ирсэн хиймэл зүлгийг сурын талбай дээр дэвсэж, төв цэнгэлдэх хүрээлэн дотроо шинээр олон улсын стандарт хангасан, ямар нэгэн цагаан зураасгүй хамгийн сайн гэх хиймэл зүлгийг шинээр дэвсэж, гүйлтийн замыг мөн шинэчлэн тавьжээ. Түүнчлэн төв цэнгэлдэх хүрээлэнгийн бүх хаалгыг шинэчилсэн байна. Өмнө нь хаана ямар хаалга байгаа эсэх нь ойлгомжгүй байсан бол одоо бүх хаалга нь хаягжуулалтын нэгдсэн системтэй болжээ. Иргэдийн хамгийн их шүүмжлэлтэй байдаг ариун цэврийн өрөөний асуудлыг шийдэхийн тулд энэ жил есөн ширхэг ариун цэврийн өрөөг шинээр ашиглалтад оруулж байгаа юм байна.

Өмнө нь ашиглагдаж байсан дөрвөн ариун цэврийн өрөөтэй хамт нийт 13 орчим ариун цэврийн өрөөг баяр наадмыг угтан тохижуулжээ.

Эдгээр засвар, үйлчилгээний ажлуудаас хамгийн олзуурхууштай санагдсан нь үзэгчдийн суудал хооронд нэг метрийн урттай явган хүний 18 орчим марш шинээр хийхээр болсон байна. Өмнө нь сууж байгаа хүн яаралтай суудлаасаа өөр тийш явах үедээ олон хүний урдуур чихэлддэг байсан асуудал цэгцрэх боломж бий болжээ. Мөн олон жил болсон сурталчилгааны самбар, цахилгааны ил утас зэргийг буулгаж янзалж байгаа аж.

Энэ мэт баяр наадмыг угтсан засвар үйлчилгээний ажлыг гүйцэтгэн, иргэдэд зориулж аль болох ая тухтай орчныг бий болгохыг зорьж байгаа ч том зургаар нь харвал суурь хүртлээ нөлөөлөх том ажил хийсэнгүй.

"ЭНЭ БАРИЛГАД ХЭЧНЭЭН МӨНГӨ ЗАРЦУУЛААД Ч ЭЛС РУУ УС АСГАЖ БАЙГААТАЙ АДИЛ"

Баяр наадмын тасалбар авч чадаагүй иргэдийн гомдол жилээс жилд улам бүр нэмэгдэнэ. Тиймээс хамгийн чухал нь хэрэгцээ шаардлагад нийцсэн ядаж 30 мянган хүний суудалтай шинэ цэнгэлдэх хүрээлэнг байгуулах томоохон ажлынхаа процессыг эхлүүлэх шаардлагатай байна. Дэлхийн томоохон цэнгэлдэх хүрээлэнгүүдийн зураг төслийг гаргадаг компанийн олон улс хариуцсан захирал мэргэжилтнүүд гурав хоногийн хугацаанд Монгол Улсад ирж ажилласан байдаг. Уг мэргэжлийн хүмүүс төв цэнгэлдэх хүрээлэнгийн бүх байршилтай танилцсаныхаа дараа "Энэ барилгад хэчнээн мөнгө зарцуулаад ч элс рүү ус асгаж байгаатай адил" хэмээн хэлсэн байдаг.

"ТӨВ ЦЭНГЭЛДЭХ ХҮРЭЭЛЭН НҮҮХ БОЛОМЖГҮЙ"

Төв цэнгэлдэх хүрээлэн ирэх хоёр жилийн хугацаанд 30 мянган хүний суудалтай, онгойдог дээвэр бүхий дөрвөн улирлын цэнгэлдэх хүрээлэн болох том амбицтай. Харин шинэ цэнгэлдэх хүрээлэнг хаана барьж байгуулах тал дээр санал зөрөлддөг. Энэ талаар "Төв цэнгэлдэх хүрээлэн" ХХК-ийн гүйцэтгэх захирал Ж.Энхжаргалан "Байршлын хувьд иргэд хотоос хол хүй долоон худаг ч юм уу янз бүрийн газар төв цэнгэлдэх хүрээлэнг байгуулах санал гаргадаг. Гэхдээ хамгийн зөв байршил бол одоо байгаа байршил мөн гэж бодож байна. Дэлхийд маш олон цэнгэлдэх хүрээлэн хотын төвдөө байрладаг. Учир хамгийн том гэгдэх арга хэмжээнүүд энд зохион байгуулагддаг. Тэгэхээр иргэд заавал машинтайгаа хүрч ирэх биш 15-30 минут алхаад ирэх боломжтой байршил гэдэг ямар ч хүчин зүйлээр орлуулшгүй том давуу тал юм. Иргэдээ хандаж хэлэхэд төв цэнгэлдэх хүрээлэн нүүхгүй, одоо байгаа суурин дээрээ шинэ цэнгэлдэх хүрээлэнгээ барина. Тэглээ гээд жил бүрийн баяр наадам болдгоороо болно. Гэхдээ ямар ч байсан хэн ч харсан үзэмжгүй, аюулгүй стандарт хангаагүй, бүх хэсэг нь ашиглагдах боломжгүй байж болохгүй учраас энэ жил нийслэлээс төсөв гаргаад засвар үйлчилгээнүүдийг өнөөдрийн байдлаар хийж байна" гэв.

Ямартай ч тасалбар худалдан авч чадсан иргэд шинээр засвар хийсэн цэнгэлдэх хүрээлэнд наадмаа үзэх бол, тасалбар авч чадаагүй иргэд шинэ цэнгэлдэх хүрээлэн байгуулагдахыг хүлээх болох нь.

ГЭРЭЛ ЗУРГИЙГ О.БОЛОРСУВД