УИХ-ын 2024 оны ээлжит сонгуулийн үр дүнд УИХ-ын 126 гишүүнтэй парламент байгуулагдаж өнөөдөр /2024.07.02/ анхныхаа чуулганыг хуралдуулах гэж байна. Ес дэх удаагийн парламентад МАН-68, АН-42, ХҮН нам зургаа, Үндэсний эвсэл болон Иргэний Зориг Ногоон нам тус бүр дөрвөн суудал авсан. Өөрөөр хэлбэл, Үндсэн хууль болон Улс төрийн намын тухай хуульд оруулсан нэмэлт өөрчлөлтийн дагуу солонгорсон парламентын суурь тавигдсан гэж хэлж болно. Шинэхэн гишүүд УИХ-ын гишүүний түр үнэмлэхээ гардаж авахаас ч өмнө УИХ-ын шинэ бүтэц бүрэлдэхүүнд хэн хэн багтаж, аль намаас хэн хэн Засгийн газарт орж ажиллах гэх мэт албан тушаалын хуваарилалтын "зодоон" ил далд өрнөсөн.
Өнөөдөр хуралдах анхдугаар чуулганаар дараах асуудлыг хэлэлцэнэ.
- шинээр сонгогдсон гишүүдийг тангараг өргүүлж, бүрэн эрхийг нь хүлээн зөвшөөрөх;
- Улсын Их Хурлын даргыг сонгох;
- нам, эвслийн бүлэг байгуулсан тухай мэдээллийг Улсын Их Хурлын даргад бичгээр ирүүлснийг сонсох;
- Улсын Их Хурлын дэд даргыг сонгох;
- Байнгын болон дэд хороодын бүрэлдэхүүнийг баталж, Байнгын хорооны дарга нарыг сонгох;
- Ерөнхий сайдыг томилох;
- Засгийн газрын бүтцийн тухай болон Засгийн газрын бүрэлдэхүүний тухай хуулийн төслийг хэлэлцэн батлах;
- Засгийн газрын гишүүдийг томилох тухай Ерөнхий сайдын танилцуулгыг сонсох;
- шинээр томилогдсон Засгийн газрын гишүүдийг тангараг өргүүлэх;
- Улсын Их Хурлын чуулганы хуралдааны дэгийг шинэчлэн тогтоох эсэх асуудлаар шийдвэр гаргах.
Тэгвэл энэ удаагийн парламентад 42 суудал авсан УИХ дахь Ардчилсан намын бүлгийн даргаар Х.Баттулга, Ж.Батсуурь, Н.Алтанхуяг нарын нэр яригдаж байна. Ардчилсан нам бүлгийн даргаараа хэнийг томилохоос тэдний ирэх дөрвөн жилд хүчтэй сөрөг хүчин байх эсэх олон зүйл хамаарна.
Холбоотой мэдээ