Их Монгол Улс байгуулагдсаны 818 жил, Үндэсний эрх чөлөө, тусгаар тогтнолоо сэргээн мандуулсны 113 жил, Ардын хувьсгалын 103 жилийн ойн баяр наадмын бэлтгэл үргэлжилж байна. Энэ жилийн баяр наадмын нээлт, хаалтын ёслолын талаар Үндэсний их баяр наадмын ерөнхий продюсер, найруулагч Г.Маргад-Эрдэнээс тодруулахад, "Энэ жилийн Үндэсний их баяр наадам бүтэн автоматжуулсан тайзтай. Хагас гэр бүхий бөмбөрцөг хэлбэртэй лед дэлгэцтэй байна. Залуу Монгол техникчдийн мэдлэг ур чадвараар бүтээгдсэн учир маш шинэлэг дижитал нээлт болно. Өнөөдрийн байдлаар нээлтийн үйл ажиллагааны бэлтгэл 90 хувьтай явж байна.

Мэргэжлийн болон хувийн байгууллагын уран бүтээлчид, өв тээгчид гээд нийтдээ 1200 гаруй уран бүтээлчид энэ жилийн наадамд оролцоно.

Өв тээгчдээс хамгийн ахмад нь 82, хамгийн залуу нь зургаан настай. Наадмын тоглолтын ерөнхий агуулга гэвэл үлэг гүрвэлийн үеэс эхлээд хүний үүсэл, төмөрлөгийн үе, Их Монгол гүрэн зэрэг нийт зургаан бүлэгтэй тоглолтыг үзүүлнэ. Уран бүтээлчдийн бүх хувцас, хэрэглэлийг шинээр хийж байна. Энэ дундаа яг голлох уран бүтээлчдийн хувцас, хэрэглэлийг гар аргаар мюзикл тоглолтод зориулж бүтээж байна.

Энэ жилийн наадамд анх удаа задгайн талбайн мэргэжлийн найруулагч ажиллаж байна.

Үндэсний их баяр наадмын нээлт мюзикл хэлбэрээр тоглогдоно гэдэг өөрөө маш шинэлэг зүйл. Гол онцлог нь бүрэн автомат, график ашигласан мюзикл хэлбэрээр тавигдаж байгаагаараа содон байх болов уу. Хаалтын үйл ажиллагаа ч мөн ялгаагүй. Энэ жил өмнө нь наадмаар ашиглагдаж байгаагүй тайз, уран бүтээлчидтэй байх болно. Ямар ч байсан үзэгчдийг уйдаахгүй шинэлэг, содон байх болно" гэв.

Үндэсний их баяр наадмыг зохион байгуулах хорооны дарга, Шадар сайд С.Амарсайхан Баяр наадмын нээлт, хаалтын арга хэмжээг зохион байгуулах найруулагчийн багийнхан болон салбар хороодын дарга нарыг бэлтгэл ажлаа цаг хугацаанд нь хангаж ажиллахыг үүрэг болгосон. Тэрбээр, "Эх дэлхийн нөхцөл байдал амаргүй, хүн төрөлхтөн даяараа энх оршихуй руу тэмүүлж буй энэ цаг үед байгальд хамгийн ээлтэй оршихуй гэгддэг нүүдлийн соёл иргэншлээр дамжуулан хүн-байгалийн харилцан хамаарал, шүтэн барилдлагын үнэ цэн, ач холбогдлыг хүж дэлхийд үлгэрлэж ирсэн "Монгол оршихуйн Итгэл Үнэмшил"-ийг үндэсний их баяр наадмаараа харуулахыг бид зорьж байна" хэмээн мэдээлсэн билээ.