Үндэсний их баяр наадам хаяанд иржээ. Баяр наадмын үеэр хурдан морины унаач хүүхдийн аюулгүй байдлын асуудал яригддаг. Хүүхэд унаж бэртэх цаашлаад амь насаа алдах тохиолдол гардаг. Тэгвэл унаач хүүхдийн аюулгүй байдалд хэрхэн анхаарч ажиллах талаар албаны хүнээс тодрууллаа.

Нийслэлийн Гэр бүл, хүүхэд залуучуудын хөгжлийн газар, Хүүхдийн эрх хэрэгжилтийн газрын дарга Н.Мөнхнасан:

-Үндэсний их баяр наадмын үеэр хурдан морины унаач хүүхдийн аюулгүй байдлыг ханган, стандартын хэрэгжилтийг хангаж хүүхдийн эрхийг хамгаалах тал дээр хяналт тавьж ажиллана. Хамгийн чухал нь даатгал. Даатгал хийлгээгүй хүүхдийг уралдуулахгүй. Мөн стандартын хувцас хэрэглэлгүй хүүхдийг уралдааны замд гаргахгүй хасна. Наймаас дээш насны хүүхдээр хурдан морь унуулна гэж хуулиндаа заасан байгаа.” гэв.

Хурдан морины унаач хүүхдүүдийг бүртгэхдээ дараах шаардлагыг хангасан байх үүрэгтэй. Үүнд хүүхдийг заавал гэнэтийн ослын даатгалд хамруулсан байх шаардлагатай. Хурдан морины уралдаанч хүүхдийн гэнэтийн ослын даатгалын суурь хураамж 100 мянган төгрөг. Хэрвээ хүүхэд гэмтэж бэртсэн тохиолдолд 20.0 сая хүртлэх төгрөгийн нөхөн олговор олгодог байна. Энэ нь дан ганц хурдан морины уралдааны үед бус бүтэн нэг жилийн хугацаанд буюу бусад нөхцөлд гэмтэж бэртсэн үед бүрэн олгогддог аж. Нөхөн олговорт аймаг, сум хоорондын тээвэрлэлтийн зардал багтдаг байна. Мөн унаач хүүдийн эцэг эх, асран хамгаалагчтай нь гэрээ хийж нотариатаар баталгаажуулсан байх шаардлагатай. Хүүхдийн эцэг, эх, асран хамгаалагчтай гэрээ байгуулаагүй, гэрээгээ нотариатаар баталгаажуулаагүй тохиолдолд бүртгэхгүй юм байна. Эсвэл И-Монголиа цахим хуудсаар гэрээг баталгаажуулж болох ажээ. Мөн хамгийн чухал нь унаач хүүхдийн аюулгүй байдлыг хангаж, хувцас хэрэглэлийн стандарт хангасан байх. Үүнд уралдаанч хүүхдийн эрүүл мэнд, аюулгүй байдлыг хангах үүднээс MNS 6264:2018 стандартын дагуу тусгай зориулалтын малгай буюу дуулга, хантааз, гутлыг өмсүүлж, цаг агаарын нөхцөл байдалтай уялдуулан нүдний шил, юүдэн, бээлийг өмсүүлэх шаардлагатай.