Их Британийн ерөнхий сонгууль хэдхэн өдрийн дараа болно. Тус улсын иргэд кампанит ажлын сурталчилгааг олон нийтийн мэдээллийн хэрэгсэл, гудамж талбайнаас харж болох ба олон өнгийн дундаас сонголтоо хийх юм. Яг л арилжааны брэндүүдийн адил Их Британийн нам, эвслүүд өөрсдийн тод өнгөтэй байдаг. Ингэснээр тухайн нам, эвслийг ялгахад туслах бөгөөд тухайн өнгө нь өөрсдийн гэсэн утга агууламжтай.

Ирэх долдугаар сарын 4-ны өдөр эрх баригч цэнхэр Консерватив нам тод улаан Хөдөлмөрийн намтай өрсөлдөх бололтой. Эдгээр хоёр нам нь ялалт байгуулах хамгийн боломжит хувилбарууд юм. Гэхдээ бусад жижиг, дунд нам эвслүүд оролцох ба тэд өөр өөрийн өнгөтэй байна. Гэсэн хэдий ч давхардсан өнгө, төстэй өнгө бүхий нам ч бий. Жишээ нь, Либерал ардчилсан нам улбар шар өнгөөр өөрсдийгөө тодорхойлдог бол Шинэчлэлийн Их Британи оюу ногоон, Ногоон нам ногоон өнгөтэй.

Шотландын Үндэсний нам шар өнгийг ашигладаг бол Умард Ирландын Синн Фэйн, Уэльсийн Плаид Симру нар бараг ижилхэн ногоон өнгөтэй байдаг. Улстөрчид олон нийттэй хэрхэн харилцдагийг судалдаг профессор Доминик Вринг хэлэхдээ, 1950-1970-аад оны хооронд улс төрийн кампанит ажлын хүрээнд өнгө ашиглах нь чухал болж эхэлсэн. Шинэ технологи, сурталчилгааны аргуудын ачаар улс төрийн зорилгоо илүү олонд хүргэх боломжийг олж авсан аж.

"Тухайн үед зар сурталчилгааны салбар өнгөт телевизэд шилжсэн тул илүү амбицтай, шинэлэг санаанууд гарах болсон. Өнгөний ялгаралтай болсноор улстөрчид илүү хялбар замаар өөрсдийгөө таниулж, мессеж илгээх болсон" гэж Доминик Вринг хэлэв. Түүнчлэн тодорхой өнгө нь янз бүрийн үнэт зүйл, үзэл сурталтай холбоотой байсаар иржээ. Жишээлбэл, шар нь ихэвчлэн либерализмыг илтгэдэг бол хар өнгө нь уламжлалт анархизм эсвэл фашизмыг төлөөлдөг. Ялангуяа 1920, 1930-аад онд Британийн Фашистуудын холбооны дагалдагчдыг "Хар цамц" гэж нэрлэдэг байжээ.

Үйлдвэрчний эвлэл, социал демократ, ардчилсан социалистуудтай эвссэн Хөдөлмөрийн намын хувьд улаан өнгө сонгох нь тодорхой байсан. Францын хувьсгалаас хойш дарангуйлагчдын эсрэг тэмцэлд амиа алдсан ажилчдын цусыг бэлгэдэж тус нам улааныг сонгожээ. Энэ нь мөн зүүний улс төртэй өргөн холбоотой өнгө гэдгийг хүн бүр мэднэ. Хөдөлмөрийн нам 20-р зууны эхэн үед байгуулагдсаны дараа улаан тугийг албан ёсны лого болгон ашигласан. Врингийн хэлснээр, улаан өнгө нь хөдөлмөрийн хөдөлгөөний бэлгэдэл юм.

Консерватив нам нь Их Британийн үнэт зүйлсийг хамгаалагч гэдгээ сурталчлахын тулд төрийн далбааны бүх өнгийг буюу улаан, цагаан, цэнхэр өнгийг ашиглаж ирсэн. Эдгээр гурван өнгөний дотроос цэнхэр өнгө нь зонхилсон байдаг. Хэдийгээр намын одоогийн модны лого нь өмнөх үеийнхээс арай цайвар өнгөтэй байсан. Уламжлал ёсоор үйлдвэрлэхэд хамгийн үнэтэй өнгө болох цэнхэр өнгө нь эд баялаг, консерватизмыг илэрхийлдэг аж.

Жижиг намуудын хувьд өнгөний сонголт нь харьцангуй хялбар байдаг.  Ногоон нам байгаль орчныг хамгаалах тал дээр илүү их анхаардаг тул ногоон өнгийг сонгожээ. Либерал ардчилсан намын улбар шар өнгө нь хоёр нам нийлснээр бий болжээ. Тодруулбал шар өнгө ашигладаг Либерал нам Хөдөлмөрийн намаас салсан Социал демократ намтай нэгдсэн. Энэ нь улаан шар нийлж улбар шар өнгөтэй Либерал ардчилсан намыг бүрэлдүүлжээ.

Зарим өнгө нь түүхэн холбоостой байдаг ч үзэл сурталтай салшгүй холбоотой байдаггүй. Европын бусад орнуудад улбар шар өнгө нь Христийн ардчилсан намтай, зүүн хэсэгт Зөвлөлтийн дараах бослоготой холбоотой байдаг. Бусад оронд ногоон өнгө нь байгаль орчныг гэхээсээ илүү Исламын намуудыг төлөөлдөг. Бор өнгө нь нацист бүлэглэлүүдтэй удаан хугацааны туршид холбоотой байдаг ч Канадын Марихуан намын лого дээр тод харагдаж байдаг.

Цэнхэр, улаан өнгө нь баруун, зүүний намуудыг Их Британид төлөөлдөг ч гэсэн бусад орнуудад ижил байдаггүй. АНУ-д Ардчилсан намынхан цэнхэр өнгөтэй, харин илүү консерватив Бүгд найрамдахчууд улаан өнгөтэй байдаг. Гэхдээ ихэнх  олон улсын адил сонгуулийн санал авах хуудас хар цагаанаар хэвлэгдэж, намуудын тодорхойлох өнгө байдаггүй. Энэ нь эцсийн шийдвэрийг өнгөөр санал өгөх бус чухал шийдвэр гаргахад тусалдаг аж.

Эх сурвалж: CNN