Австрали улс олон улсын оюутнуудын визний хураамжийг хоёр дахин нэмэгдүүлсэн гэж Даваа гаригт мэдэгдэв. Энэ нь орон сууцны зах зээл зэрэгт хүндрэл учруулж буй цагаачлалыг нэмэгдүүлэхгүй байх засгийн газрын бодлого аж. Олон улсын оюутнууд өмнө нь визний хураамжид 710 австрали доллар төлдөг байсан бол долдугаар сарын 1-нээс эхлэн 1600 австрали доллар төлөх болно. Түүнчлэн зочлох визтэй хүмүүс, төгсөлтийн түр визтэй хүмүүс Австралид оюутны виз мэдүүлэхийг хориглосон байна.

"Өнөөдөр хүчин төгөлдөр болж буй өөрчлөлтүүд нь манай олон улсын боловсролын тогтолцооны шударга байдлыг сэргээж, Австралид илүү шударга, цөөн хэмжээний, илүү сайн цагаачлалын тогтолцоог бий болгоход тусална" гэж Дотоод хэргийн сайд Клэр О’Нил мэдэгдэв. Өнгөрсөн гуравдугаар сард гаргасан албан ёсны мэдээллээр, 2023 оны есдүгээр сарын 30-ны өдөр хүртэлх хугацаанд цэвэр цагаачдын тоо 60 хувиар нэмэгдэж, 548,800 хүн болж дээд амжилт тогтоосон байна.

Мөн 2022-2023 онд оюутны визээр удаа дараа зорчсон хүмүүсийн тоо 30 гаруй хувиар нэмэгдэж, 150,000 гаруй болсон. Тиймээс гадаад оюутнуудын Австралид байх хугацааг сунгах боломж олгосон визний журмын цоорхойг хааж байна гэж засгийн газар мэдэгджээ. Өнгөрсөн гуравдугаар сард мөн оюутны виз хүссэн хүмүүсийн хэлний түвшинг өндөр тогтоож, хадгаламжид нь байх ёстой мөнгөн дүнг 24,505 австрали доллароос 29,710 австрали доллар болгон нэмэгдүүлсэн.

Австралийн их сургуулиудын гүйцэтгэх захирал Люк Шихи хэлэхдээ, засгийн газраас тус салбарт үзүүлэх бодлогын дарамт шахалт нь тус улсын хүчирхэг байдлыг эрсдэлд оруулна гэж мэдэгдэв. Тэрбээр "Энэ нь олон улсын оюутны төлбөрөөс ихээхэн хамаардаг манай эдийн засаг эсвэл их дээд сургуулиудад сайн зүйл биш" гэж буруутгав. Олон улсын боловсрол нь Австралийн хамгийн том экспортын салбаруудын нэг бөгөөд 2022-2023 оны санхүүгийн жилд эдийн засагт 36.4 тэрбум австрали долларын ашиг олгожээ.

Эх сурвалж: CNBC