Украины сэргээн босголтод лего тусална

Украины сэргээн босголтод зориулсан хөрөнгө босгох "United24" платформыг АНУ, Герман, Польш, Украин гээд олон улсын уран бүтээлчид дэмжиж байна. Тодруулбал, олон улсын уран бүтээлчид Украины хөшөө дурсгалуудыг лего иж бүрдэл болгон бүтээж байна. Гэхдээ эдгээрийг худалдан авах боломжгүй. Хэрэглэгч "United24"-т 24 ам.доллар ба түүнээс дээш хэмжээний хандив өгснөөр сугалаанд оролцож, лего иж бүрдлийг хожих боломжтой. Хандивт цугларсан мөнгийг сүйрсэн барилга байгууламжийг сэргээн босгох бусад тусламжийн ажилд хандивлана.

Украины ерөнхийлөгч Зеленский олон улсын тусламжийг татах зорилгоор "United24"-ийг анх санаачилсан.

Платформын зохицуулагч Ярослава Гресийн хэлснээр "United24" гэдэг нэр нь "Украинд 24/7 тусламж үзүүлэх…" гэсэн зорилгоос үүдэлтэй. Гэхдээ украинчуудын хувьд 24 гэдэг тоо нь илүү гүн гүнзгий өөр утгатай. Тодруулбал, наймдугаар сарын 24 нь Украины тусгаар тогтнолын өдөр бол ОХУ 2022 оны хоёрдугаар сарын 24-нд Украинд анх довтолсон билээ. Платформ 2022 оны тавдугаар сард ашиглалтад орсноос хойш 650 сая гаруй ам.доллар цуглуулжээ. Дэлхийн 110 орны хандивлагчдын тусламжтайгаар нийт таван эмнэлэг, 18 орон сууцны барилга, 24 гүүрийг сэргээн босгож, 240 түргэн тусламжийн машин, 659 эмнэлгийн генератор худалдаж авчээ. Мөн Украины нисгэгчгүй онгоцноос хамгаалах системийг санхүүжүүлэх, байлдааны талбайн роботуудыг хөгжүүлэхэд тус хандиваас ашигласан байна.

Дэлхий даяарх түүхэн дурсгалт алдартай газруудыг дүрсэлсэн "Lego Architecture" нэртэй цуврал бий. Уг цувралд Эйфелийн цамхаг, Лондонгийн гүүр, Эрх чөлөөний хөшөө зэрэг байдаг. Тиймээс "Украины Эх орны хөшөө байж яагаад болохгүй гэж?" гэсэн санаа анх гарсан аж.

"United24"-т өнгөрсөн оны арваннэгдүгээр сард анхны лего иж бүрдлүүд тавигджээ. #LEGOWITHUKRAINE нэртэй иж бүрдэлд Киев дэх Эх Украин хөшөө, Крым дэх Хараацайн үүр цамхаг, Мариуполийн хуучин усны цамхаг багтсан. Харин өнгөрсөн сард гарсан #UKRAINEinLEGObricks хоёр дахь цувралд Киевийн Алтан хаалга, Крымийн Хааны ордон, Львов мужийн Пидхирцы шилтгээн, Одессагийн Үндэсний академийн дуурь, Николайвын Одон орон судлалын хүрээлэн зэрэг багтжээ.