Германы Эссен хотод хэт барууны үзэлтэй Германы төлөөх альтернатив нам (AfD) их хурлаа нээв. Үүнээс болж жагсагчид зам хааж, цагдаа нартай мөргөлдөж, томоохон үймээн болж байна. Жагсагчид хамгаалалтын бүсийг нэвтлэхийг оролдсон тул  цагдаа нар чинжүү шүршигч, бороохой ашигласан гэж Германы мэдээллийн агентлаг дахь цагдаагийн төлөөлөгч мэдэгдэв.

Эссен хотод мянга гаруй цагдаа ажиллаж байгаа ба жагсагчид үймээн самуун дэгдээж эсэргүүцлээ илэрхийлж байна. Хэд хэдэн хүнийг баривчласан бөгөөд хоёр албан хаагч хүнд шархаджээ.

Эссен дэх эсэргүүцлийн жагсаал болон бусад арга хэмжээнд 100 мянга хүртэл эсэргүүцэгч оролцсон гэж "dpa" мэдээлэв. Эрх баригчид 1000 орчим зүүний үзэлтнүүд их хурлыг үймүүлэхийн тулд хүчирхийлэл үйлдэнэ гэж болгоомжилж байна. Зүүний үзэлт бүлгүүд "AfD"-ын төлөөлөгчдийг засгийн газрын барилгад нэвтрүүлэхгүй байхыг хичээж байна.

Энэ бүх жагсаал, үймээнийг үүсгэсэн хүчин зүйл нь “AfD” намын Максимилиан Крахтай холбоотой. Европын парламентын сонгуульд "AfD" 16 хувийн санал авч, хоёрдугаар байрыг эзэлсэн. Гэвч "AfD” намын тэргүүн нэр дэвшигч Максимилиан Крах Италийн нэгэн сонинд өгсөн ярилцлагадаа нацистын хагас цэрэгжүүлсэн “SS” хүчний гишүүдийг "бүгд гэмт хэрэгтэн биш" гэж хэлсэн. Үүнээс болж тус намыг Европын парламент дахь "Identity and Democracy" (ID) бүлгээс хассан юм.

”AfD” нь Крахыг сонгуулийн сурталчилгаанд оролцохыг хориглосон. Гэсэн хэдий ч тус нам нь Орос, Хятадын төлөөлөгчдийг нууцалдаг гэх хэргээр аль хэдийн шалгагдаж байсан. Мөн Крахын туслахуудын нэг нь Хятадын талд тагнуул хийсэн хэргээр баривчлагдсан тул Эссен хотын иргэд, зүүний үзэлтнүүд “AfD” нам болон Крахыг эсэргүүцэж буй.

Эх сурвалж: Aljazeera