Дуучин Элтон Жон загварын өвөрмөц мэдрэмжтэй гэдгээрээ алдартай. Тэгвэл түүний шүтэн бишрэгчид өвөрмөц, сонин хувцаснуудаас нь худалдан авах боломжтой болжээ.

Өдгөө 77 настай тэрбээр “eBay” цахим дэлгүүрээр дамжуулан олон зуун хувцас хэрэглэлээ зарж байна. Үүнд, “Gucci” цамц, “Versace” нөмрөг, “Prada” гутал зэрэг багтжээ. Цаашилбал, бэйсболын малгай, тоглолтдоо өмсч байсан подволк зэрэг олон сонирхолтой хувцас хэрэглэл бий.

Бахархлын сарыг тохиолдуулсан 10 өдрийн дуудлага худалдаа Пүрэв гаригт эхэлжээ. Борлуулалтын орлогыг 100 хувь “Элтон Жоны ДОХ-ын эсрэг сан”-д зарцуулна. Тус сан 1992 онд байгуулагдсан бөгөөд 2030 он гэхэд ДОХ-ын тархалтыг зогсоохыг зорьдог.

“Шүүгээн дэх хувцаснуудаа дахин амьдруулах нь миний хувьд үргэлж онцгой зүйл байсан. Дохын санг дэмжихийн тулд би олон жилийн турш хувцас эд зүйлээ хандивласан” гэж Элтон Жон ярьжээ.

Эх сурвалж: CNN