Хойд Солонгос улс Өмнөд Солонгосын соёлын нөлөөг эсэргүүцэх төрөл бүрийн арга хэмжээг авдаг. Өмнөдийн Нэгдлийн яамнаас гаргасан саяхны тайланд дурдсанаар тэд эсэргүүцлийн арга хэмжээгээ илүү өргөн цар хүрээтэй болгожээ. Уг тайланг олон зуун дүрвэгчийн мэдүүлэгт үндэслэн гаргасан байна. Дүрвэгчдийн мэдүүлснээр 2021 оноос хойш албаныхан иргэдийн орон гэрт нэгжлэг хийх нь олширч, гадны соёлыг илэрхийлсэн эд зүйл хайх болжээ. Мөн хүмүүсийн утсанд Өмнөд Солонгосоос зурвас, дуудлага ирсэн эсэхийг шалгадаг.

Шинэ тайланд дурдсанаар Хойд Солонгост хуримын цагаан даашинзнаас эхлээд хар ярианы үг хэллэг гэх мэт олон зүйлийг хориглож байгаа аж. Мөн удирдагч Ким Жон Ун өөрөө зүүдэг атлаа нарны шилийг хувьсгалын эсэргүү эд зүйл гэж нэрлэснийг тайланд дурджээ. Өмнөх удирдагч жинсэн өмдийг хувьсгалын эсэргүү эд зүйл гэж нэрлэж байв.

Эдгээр зөрчилд ямар шийтгэл оногдуулах нь тодорхойгүй байна.

2020 онд батлагдсан хуулийн дагуу Өмнөд Солонгосын үзвэр үйлчилгээ үзэх, түгээх нь цаазаар авах ялтай үйлдэл болсон. Энэ жилийн тайланд дурдсанаар 22 настай тариачин 70 дуу сонсож, гурван кино үзсэн, түгээснийхээ төлөө цаазлуулжээ. Түүнтэй ижил төрлийн гэмт хэрэг үйлдсэнийхээ төлөө хүнд хөдөлмөр эрхлэх ял сонссон өсвөр насны хоёр хүүхдийн бичлэг энэ оны эхээр задарсан билээ.

Энэ төрлийн тайланг 2018 оноос хойш эмхэтгэж буй. Гэсэн хэдий ч тайлагнан зарласан хоёр дахь тохиолдол юм. Хойд Солонгосыг өдөөн хатгахгүйн тулд өмнө нь ийм тайланг зарлан дэлгэдэггүй байжээ.

Эх сурвалж: BBC