"Сөүлийн сар" нэртэй бүтэн сарны хэлбэрт агаарын бөмбөлөг ирэх долоо хоногоос эхлэн Өмнөд Солонгосын нийслэлд аялж эхэлнэ. Агаарын бөмбөлөг зорчигчдыг суулгаад 150 метр хүртэлх өндөрт босоо чиглэлд аялах юм. Бөмбөлөг хөөргөх албан ёсны ёслолыг долдугаар сарын 7-ны 19:00 цагт товложээ. Наймдугаар сарын 22-ныг хүртэл туршилтын журмаар аяллыг зохион байгуулсны дараа төлбөртэй үйлчилгээнд шилжих аж.

"Сөүлийн сар" бөмбөлөг бусад агаарын бөмбөлөгтэй адил харагдах ч гэлээ газартай кабелиар холбоотой гэдгээрээ онцлог. Өөрөөр хэлбэл, бөмбөлөг зөвхөн босоо чиглэлд л дээшээ хөөрнө гэсэн үг. Аяллын үргэлжлэх хугацаа 15 минут. Нэг ээлжинд 30 зорчигч тээвэрлэнэ. Хөөрөлтийн өндөр нь цаг агаарын нөхцөл байдлаас шалтгаалаад 100-150 метр хооронд хэлбэлзэх аж. Харин цагийн хуваарийн тухайд Даваа гаригаас бусад бүх өдөр 22:00 цаг хүртэл ажиллана. Насанд хүрэгчдийн тасалбарын үнэ 25 мянган вон буюу 18 ам.доллар байна.

Эх сурвалж: YONHAP