Монголын хүннү рок урсгалыг дэлхийд цуурайтуулж буй  "The Hu" хамтлаг 2024 оны долдугаар сарын 10-нд эх орондоо бүрэн хэмжээний тоглолтоо хийхээр товлосон. Хамтлагийн залуус 2019 оны тавдугаар сарын 24-нд эх орондоо анхны бие даасан тоглолтоо хийж байсан бөгөөд 2024 онд хоёр дахь удаагийн бүрэн хэмжээний тоглолтоо хийх гэж байна. Тэд 2016 оноос хойш олон улсын хэмжээний 350 гаруй тоглолтод оролцжээ. Ингээд хамтлагийн  хамгийн хамгийн гэх тодотголтой сонирхолтой мэдээллийг танилцуулъя.

МОНГОЛ ХАМТЛАГ ТҮҮХЭНДЭЭ АНХ УДАА “BILLBOARD”-ИЙГ ТЭРГҮҮЛЭВ

Монгол хамтлаг түүхэндээ анх удаа “Billboard”-ийг тэргүүлсэн нь "The Hu". Монгол хэлээрээ дуулж гаргасан цомог  нь өнгөрөгч дөрөвдүгээр сард “Billboard”-ийг тэргүүлж, тэдний араас Солонгосын алдарт BTS хамтлагийн Map Of The Soul: PERSONA жагссан юм. Ийнхүү хэдэн долоо хоногийн турш billboard-ийг тэргүүлсэн BTS-ийг "The Hu" хамтлаг ардаа орхисон нь тэдний анхны амжилт байлаа. Анхны "Гэрэг" нэртэй цомог нь олон амжилтыг дагуулсан.

Тэдний  “The Gereg” цомгийн нээлт есдүгээр сарын 13-нд АНУ-д болж, дэлхий даяар худалдаалж эхэлсэн. “The Gereg” цомог нийт есөн дуутай. Үүнд: “The Gereg”, “Wolf Totem”, “The Great Chinggis Khaan”, “The Legend of Mother Swan”, “Shoog Shoog”, “The Same”, “Yuve Yuve”, “Shireg Shireg”, “Song of Women” зэрэг дуунууд багтаж байгаа юм.

АНХНЫ ГЕРМАНЫ ОЛОН УЛСЫН ФЕСТИВАЛЬД ОРОЛЦСОН

Хамтлагийн залуус анхны олон улсын аялан тоглолтоо Герман улсаас эхэлж байжээ. Энэ талаар хамтлагийн гишүүн Б.Энхсайхан ярихдаа "Бид анх тайзнаа гарахад 60, 70 мянган үзэгч хүлээн авч байсан. Тухайн үед наадмын хамгийн эхний цаг дээр тоглож байгаа учраас хүн нэг их цугладаггүй, хэдий тийм ч гэсэн уран бүтээлээ тоглоорой гэж байсан. Бид тайзны ард бясалгал, төвлөрлөө хийж байгаад гарахад хүмүүс гол горхи урсч орж ирж байгаа мэт маш гайхалтай хүлээж авсан. Анх удаа тийм олон хүнийг харсан. Өөрсдийгөө баатар жанжид мэтээр төсөөлж, бидний өмнө түмэн цэрэг зогсч байгаа юм шигээр бодож байлаа" гэсэн юм.

ХАМГИЙН ИХ ХАНДАЛТ АВСАН ДУУ "YUVE YUVE YU"

Тэдний хамгийн их хандалт авсан дуу бол "Yuve Yuve Yu". Хамтлагийн гоцлол дуучин Г.Нямжанцан "Энд тэнд тааралдсан монголчууд маань "Хү" хамтлагийн залуустаа маш их баярлаж байгаа шүү. Монгол Улс гэхээр Чингис хаан гэдэг байсан бол одоо "Хү" хамтлагийг асуудаг болсон" гэсэн. Яг тэрэн шиг манай хамтлаг гэхээр сонсогчид маань "Yuve Yuve Yu" дууг асуудаг. Одоо ч гэсэн хамгийн өндөр буюу 122 сая хандалттай байгаа юм.

“THE HU” ХАМТЛАГИЙН АНХНЫ ШАГНАЛ ЧИНГИС ХААНЫ ОДОН 

Их эзэн Чингис хааны мэндэлсний ой, өвлийн тэргүүн сарын шинийн нэгэн Монгол бахархлын өдөр /2019.11.27/  "The Hu" хамтлагийнханд Монгол төрийн дээд шагнал, тэргүүн зэргийн Чингис хаан одонг олгосон билээ. Анх 2005 оноос Чингис хаан одонг олгож эхэлсэн бөгөөд энэ жил “Хүннү рок” урсгалаар уран бүтээл туурвидаг “The Hu” хамтлагийн продюсер Б.Дашдондогт тус одонг гардуулсан юм.

ХАМГИЙН УРТ АЯЛАЛАА 2022 ОНД ХИЙЖЭЭ

"The Hu" хамтлагийн хувьд 2019 онд амжилт, бүтээлээр арвин байсан юм. Тухайн үед хамтлагийн продюсер, Монгол Улсын гавьяат жүжигчин Б.Дашдондог ярихдаа “Бид 2019 онд хийх ёстой ажлуудаа амжилттай хийж дуусгасан. “The Hu” хамтлаг дэлхийд гарч, Европыг байлдан дагуулсан. Нийтдээ 13 оронд 23 тоглолтоо хийсэн бол Хойд Америкийн нутгаар 90 хоногийн турш аялан, 56 хотоор 60 гаруй тоглолтыг хийсэн.

АНУ-д байхдаа дөрвөн ч дуугаа клипжүүлж, хоёр, гурван ч дуу шинээр бичүүлсэн амжилттай шинэ оноо угтах гэж байна” гэдгийг онцолж байв.

Харин одоо тус хамтлаг дэлхийн улс орнуудад 350 удаагийн тоглолтыг хийгээд байна. Тэдний хамгийн урт аялал 2022 оных бөгөөд долоон сарын хугацааг зам дээр өнгөрүүлж, аялан тоглолт хийсэн байна.

ДЭЛХИЙН ОЛОН АЛДАРТАНТАЙ НЭГ ТАЙЗНАА ГАРСАН

Алдарт дуучин Элтон Жон Монголын хүннү рок хамтлагийн шүтэн бишрэгч болсон тухайгаа твиттер хуудас болон “Rocket hour” хөгжмийн нэвтрүүлгээрээ дамжуулан хэлжээ. Тэрбээр "The Hu" хамтлагийг маш гайхалтай хэмээгээд ойрд ийм гайхалтай хөгжим сонсоогүй гэжээ.

Мөн өөрийн хөтлөн явуулдаг хөгжмийн нэвтрүүлгээрээ "The Hu"  хамтлагийн "Yuve Yuve Yu" дууг онцолсон байна. Мөн АНУ-ын рок хамтлаг “Папа Роач”-ын дуучин Жэйкоби Шаддиxтай хамтран "Wolf Totem” шинэ уран бүтээлээ гаргаж байв.

Австралийн алдарт хөгжмийн зохиолч, тоймч Мич Чарьлтон урлаг судлаачдын дунд алдартай нэгэн. Тэрбээр Монголын “The Hu” хамтлаг “ The Gereg” цомгийн талаар шүүмж, магтаал нийтлэл бичсэн нь дэлхий нийтийн анхаарлыг татсан юм.

“Хөгжимд хил гэж үгүй, хязгаар гэж байхгүй. Бразилд Сепултюра, Германд Раммштайн, Австралид Эй-Си Ди-Си, харин одоо Монголд "The Hu" байна. Дорно, Өрнө халз тулгарсан газраас та бидэнд одоохондоо хөгжмийн ертөнцөд буй бүхнээс тэс өөр, жинхэнэ язгуурыг авчирч байгаа нь энэ. Эдгээр Монгол залуус ой тоонд багтамгүй аялгуугаараа дэлхий дахинд өөрсдийн соёлоо таниулж байна. "The Hu" хамтлаг, басхүү, тоглож байгаа хөгжмийг таалахын тулд дуулж байгааг заавал бүрэн ойлгох ёстой бишийг ч баталж байгаа юм” гэж тэрбээр нийтлэлдээ онцолж байсан удаатай.

    ТАСАЛБАРЫГ TICKET.MN-ЭЭС ХУДАЛДАН АВАХ БОЛОМЖТОЙ.