Сонгуулийн шинэчлэл хийгдээгүйг эсэргүүцэж байсан эрэгтэй Канадын холбооны сонгуульд нэр дэвшсэн байжээ. Гэвч сонгуулиар нэг ч санал аваагүйгээр түүхэнд бичигдлээ.

Феликс-Антуан Хамел сонгуулийн дүнг хараад "Би эв нэгдлийг бэлгэдэгч нэр дэвшигч бололтой. Бүгд миний төлөө санал өгөхгүй байхаар нэгдсэн байна" гэж хошигножээ. Тэрбээр Торонто хотод болсон нөхөн сонгуульд нэр дэвшсэн байв. "Longest Ballot Committee" түүнийг нэр дэвшихийг санал болгосноор Хамел сонгуульд 83 хүний хамт өрсөлдөх болсон. Канадын ерөнхий сайд Жастин Трюдо 2015 онд нэр дэвшиж байхдаа засгийн эрхэнд гарвал сонгуулийн тогтолцоог шинэчлэл хийнэ гэж амлаж байжээ. Гэвч тэрбээр засгийн эрхэнд гарснаасаа хойш тус амлалтаа биелүүлээгүй.

Үүнийг "Longest Ballot Committee" буруутгаж, нөхөн сонгуулийн үеэр үеэл бодлоо үнэнчээр илэрхийлэх 77 хүнийг сонгуульд өрсөлдүүлэх болсон байдаг. Тус 77 хүний нэг нь 0 саналтай Хамел юм. Сонирхуулахад, Канадын санал хураалтын хуудас нь нэг метр урттай бөгөөд дэлхийн хамгийн урт санал авах хуудсаар бүртгэгджээ.

Канадын сонгуулийн хэвлэлийн төлөөлөгч мэдэгдэлдээ "Саналын хуудас урт болсноос болж, бүтэн шөнөжин саналын тоог тоолоход хүргэсэн. Мөн хэд хэдэн асуудал гарсан ч бүгдийг нь амжилттай, алдаа мадаггүй тоолж чадсан" гэжээ. Үр дүнг эцэслэн харахад зургаан нэр дэвшигч тус бүх хоёр, хоёр санал авсан бол Хамел нэг ч саналгүй байсан. Хамелын хувьд Торонто хотод амьдардаггүй учир өөртөө санал өгч чадаагүй.

Өмнөх холбооны сонгуулиудад нэг ч саналгүй нэр дэвшигч байсан ч тэд өрсөлдөгчгүй байсан учир ялалт байгуулж байжээ. Хамел мөн "Санал аваагүй ч би бол Канадын түүхийг ямар нэгэн байдлаар бүтээж чадах сүүлчийн хүмүүсийн нэг" гэж итгэл төгс мэдэгдсэн байна.

Эх сурвалж: Guardian