Кенийн засгийн газар Санхүүгийн тухай хуульд нэмэлт өөрчлөлт оруулах саналыг тавдугаар сард дэвшүүлсэн. Уг өөрчлөлтийн дагуу Татварын тухай хуульд ч нэмэлт өөрчлөлт орох болсон учир кеничүүд үүнийг эсэргүүцэн жагсч байна. Тэр дундаа талх, тос зэрэг өргөн хэрэглээний бүтээгдэхүүнд татвар ногдуулах тухай тус хуулийн төсөлд тусгасан байжээ.

Залуус эхэндээ "#RejectFinanceBill2024" гэсэн хаштаг ашиглан цахим орчинд эсэргүүцлээ илэрхийлж эхэлсэн ч өнгөрсөн долоо хоногоос тайван жагсаал эхлүүлсэн юм. Тайван жагсаал зургадугаар сарын 18-нд Найроби хотод эхэлсэн. Улмаар зургадугаар сарын 25-нд жагсагчид парламентын ордон руу дайран орж, цагдаа нартай мөргөлдсөнөөр дор хаяж 22 хүн нас барав.

Кенийн ерөнхийлөгч Уильям Руто зургадугаар сарын 26-нд ард түмэндээ мэдэгдэл хийхдээ 2024 оны Санхүүгийн тухай хуулийн төсөлд гарын үсэг зурахгүй гэжээ.

Жагсаалын үеэр амь үрэгдсэн хүмүүст эмгэнэл илэрхийлэхээр цуглагсдыг тараахын тулд цагдаа нар нулимс асгаруулагч хий ашигласан байна. Аюулгүй байдын хүчнийхэн, тэр дундаа армийнхныг хот даяар байршуулж, гол барилгуудын эргэн тойрны замуудыг хаажээ. Жагсаалтай холбогдуулан олон зуун хүнийг баривчилсан гэж төрийн мэдлийн агентлагуудыг буруутгасан. Тэгвэл Кенийн үндэсний комисс хууль бусаар баривчлагдсан 300 гаруй хүнийг суллажээ.

Жагсагчид амь үрэгдэгсдэд эмгэнэл илэрхийлэхээс гадна зарим нь ерөнхийлөгч Рутог огцрохыг шаарджээ. Гэхдээ Пүрэв гаригт жагсагчдын тоо хамаагүй цөөрсөн байв.

Нийслэл Кениэр тогтохгүй Мигори, Кисуму, Момбаса зэрэг хотод мөн жагсаал өрнөсөн. Ерөнхийлөгч Рутогийн төрөлх Элдорет хотод Мягмар гаригт ширүүн мөргөлдөөн болсон ч Пүрэв гариг гэхэд намжсан байна.

Пүрэв гаригийн жагсаалын өмнө АНУ-ын ерөнхийлөгч асан Барак Обамагийн төрсөн эгч Аума Обама "ВВС"-д ярилцлага өгчээ. Тэрбээр "Залуучууд дуу хоолойгоо хүргэхийг хүсч байгаа тул дахин жагсч байна. Тэд одоог хүртэл гомдсон хэвээр байна. Ерөнхийлөгч Руто тэдэнтэй яриа хэлэлцээ хийнэ гэж амласан ч хараахан биелсэн зүйл алга" гэжээ.

Эх сурвалж: BBC