Хятадын Коммунист нам өнгөрсөн онд авлигын хэргээр шалгагдаж байсан Ли Шанфу тэргүүтэй Батлан хамгаалахын хоёр сайд асанг намаасаа хөөжээ. Ли Шанфу шалгагдаж байх хугацаандаа олны анхаарлаас зайлсхийхийн тулд оршин суугаа газраа нуусан аж. Түүнийг өнгөрсөн онд албан тушаалаас нь огцруулсан юм. Хятадын төрийн хэвлэл мэдээллийн хэрэгслээр Ли, өөр нэг Батлан ​​хамгаалахын сайд асан Вэй Фэнхэ нарыг "намын сахилга бат, хуулийг ноцтой зөрчсөн" хэргээр Коммунист намаас хөөж буйг мэдээлжээ. Ли болон Вэй нарыг бэлэг, мөнгө авч бусдад хууль бусаар тусалсан гэж Цэргийн төв комисс олон сар үргэлжилсэн мөрдөн байцаалтын дараа мэдэгдлээ. Мөн тэдэнд эрүүгийн хэрэг үүсгэхээр армийн прокурорын байгууллагад шилжүүлэх болсон байна.

Вэй нь 2018 оноос хойш Батлан хамгаалах сайдаар ажиллаж байгаад Лид албан тушаалаа шилжүүлсэн байдаг. Тэрбээр мөн Хятадын цөмийн зэвсгийг хариуцдаг цэргийн мэдрэмтгий хэсэг болох пуужингийн армийг удирдаж байжээ. Гэвч авлигын хэрэгт холбогдсон цагаас хойш Лигийн адил олны нүднээс нуугдсан юм. Өнгөрсөн жил Коммунист нам салбар бүрийн албан тушаалтнуудыг өөрчилж, пуужингийн армийн ивээн тэтгэх сүлжээг таслан зогсоосон. Ши Жиньпин 2012 онд засгийн эрхэнд гарснаасаа хойш авлигатай тэмцэх ажлыг нэн тэргүүнд тавьж эхэлсэн. Гэвч өнгөрсөн жил албан тушаалтнуудын авлигын хэргийг илчилснээр тус улсын хулгайн гэмт хэрэг мөн адил өндөр байж болзошгүйг шинжээчид онцлоод байна.

Эх сурвалж: Guardian