Аялал, зугаалгын цаг ирснээр иргэд орон нутгийг зорих нь нэмэгдэж байна. Тиймээс Онцгой байдлын ерөнхий газар /ОБЕГ/–ын Урьдчилан сэргийлэх газрын хэлтсийн дарга, хурандаа Д.Бат-Эрдэнээс энэ талаар тодрууллаа.

-Амралт зугаалгын үе ирлээ. Тиймээс иргэд аялалаар явахдаа хамгийн түрүүнд юу анхаарах ёстой вэ?

-Иргэд амралт зугаалгаар орон нутгийг зорих нь ихэсч байна. Удахгүй улсын баяр наадам, аймаг сумдын ой зэрэг нийтийг хамарсан олон арга хэмжээ зохион байгуулагдана. Цаг агаарын сэрэмжлүүлэг мэдээг зайлшгүй авч байх шаардлагатай. Ялангуяа аянга цахилгаан болон үер усны эрсдлээс алхам тутамдаа сэргийлж явахыг зөвлөе. Монголд аливаа баяр наадам, ёслол хүндэтгэлийн арга хэмжээг зохион байгуулахдаа аюулгүй байдлыг орхигдуулдаг талтай. Нийтийг хамарсан баяр ёслолын үед анхаарал болгоомжтой байх ёстой юм.

-Хөдөө гадаа аялал зугаалгаар явахдаа танайд хэр ханддаг вэ?

Сурагчдын холбооноос 300 гаруй хүүхдийг хамарсан арга хэмжээг Тэрэлжид зохион байгуулахаар төлөвлөсөн тул аюулгүй байдлыг хангаж, хамтран ажиллаж өгнө үү гэсэн хүсэлтийг ОБЕГ-т ирүүлжээ. Тодруулбал, Тэрэлж голд тухайн хүүхдүүдийн дунд завиар уралдах тэмцээн зохион байгуулахаар төлөвлөсөн байсан. Гэтэл одоогийн нөхцөл байдлаар Тэрэлж гол үерийн эрсдэлтэй байгаа. Тэрэлж ч гэлтгүй олон голууд үерийн аюултай түвшинд байна. Мөн цаг агаарын урьдчилсан мэдээгээр ойрын өдрүүдэд үргэлжилсэн бороо орох төлөвтэй байна. Өнөөдөр /2024.06.27/ орж байгаа бороо зүүн тийш үргэлжлэн орно. Энэ нь Хэнтийн нуруу буюу Тэрэлж, Туул голыг хамаарна.

Тэрэлж орчимд бороо ороогүй байсан ч гэсэн эх орчимд нь орж байгаа борооноос авсан ус голыг үерлүүлдэг.

Тиймээс цаг үеэ зөв тооцоолж амралт, зугаалга, аливаа үйл ажиллагааг зохион байгуулахыг анхааруулж байна. Зөвхөн нэг байгууллага дээр жишээ авч байгаа боловч ижил төрлийн үйл ажиллагаа зохион байгуулж байгаа олон газар байна.

-Амралт зугаалгаар орон нутгийг зорихоос гадна ойн баярт оролцохоор олноороо хөдөөг зорьдог. Энэ тохиолдолд ямар зөвлөмж өгөх вэ? 

-Ойн баяр гэх шалтгаанаар олон иргэд орон нутгийг зорих хандлагатай байна. Энэ үедээ ч гэсэн тухайн орон нутгийнхаа цаг агаар эрсдэлт хүчин зүйлсийг мэдрэх хэрэгтэй. Зохион байгуулж байгаа газрууд нь ч мөн анхаарах шаардлагатай. Арга хэмжээ зохион байгуулах зорилгоор нэг өдөр төлөвлөөд өнгөрөх биш тухайн өдөр нь цаг агаарын аюулт үзэгдэл болж болзошгүй эрсдэлээс сэргийлж уян хатан байх хэрэгтэй. ЦУОШГ, ОБЕГ-аас цаг агаарын аюулт үзэгдлийн урьдчилсан, сэрэмжлүүлэг мэдээг тогтмол гаргадаг тиймээс үүнтэй уялдуулсан шийдвэр гаргаачээ гэж хэлмээр байна.