Сонгуулийн ерөнхий хорооноос өнөөдөр /2024.06.27/ цаг үеийн асуудлаар мэдээлэл хийлээ.
СЕХ-ны дарга П.Дэлгэрнаран:
-Сонгуулийн өдөр бороо хур ихээр орох учраас онцгой байдлын 100 алба хаагч бэлэн байдалд ажиллана. УИХ-ын сонгуулийн сурталчилгаа амжилттай болж, нэр дэвшигчдийн хувьд 61.3 хувь нь эрэгтэй, 38 хувь нь эмэгтэй байлаа. Улс төрийн нам, эвслүүд сонгуулийн сурталчилгаагаа амжилттай хийж дуусгалаа. Цагдаагийн байгууллагаас зөрчлийн талаар мэдээлэл өгнө.
УИХ-ын 2024 оны сонгуулиар нийт 2198 хэсгийн хороонд санал хураалт явагдна. Нийт 2.224.000 иргэн саналаа өгөхөөр сонгогчдын нэрсийн жагсаалтад бүртгэгдсэн байна. Сонгуулийн санал хураалтын бэлтгэл байдлыг ханган ажиллаж байна. Нийт 25.700 орчим төрийн албан хаагч бэлтгэл ажлыг хангаж бүх шатны сонгуулийн хороонд ажиллаж байна. Энэ удааагийн сонгуульд 19 нам, хоёр эвсэлийн 1341 нэр дэвшигч сонгуулийн сурталчилгаагаа хуулийн хугацаанд дуусгалаа. Нийт нэр дэвшигчдийн 61.3 хувь нь эрэгтэй, 38.7 хувь нь эмэгтэйчүүд байна.
Гадаад байгаа 13035 сонгогч сонгуульд саналаа өгөхөөр бүртгүүлсэн. Энэ жилийн хувьд гадаадад байгаа монголчуудын санал өгөх тоо эрс нэмэгдсэн. Өмнө нь гадаадад байгаа 7000 гаруй хүн бүртгүүлснээс 5000 орчим сонгогчид саналаа өгч байсан.
Энэ жил гадаадад байгаа иргэдээ цахимаар бүртгүүлж, өөрийн биеэр ирж саналаа өгөхөөр зохион байгууллаа. Маргааш орой бүх хэсгийн хороод хаагдсаны дараа гадаадад байгаа иргэдийн саналыг задалж, тоолж, нэгтгэнэ гэв. Сүлжээгүй газруудад 400 гаруй старлинк төхөөрөмжийг ашиглаж байгаагаараа онцлог. Мөн улсын хил дагуух газар зөөврийн хайрцаг явуулахаас өөр аргагүй байна. Тэнд огт сүлжээгүй байдаг.
Европын парламентын төлөөлөгчид ирж, ажиглалт хийнэ. Эдгээр байгууллагын зөвлөмж бие даасан байдлаар явна. Аюулгүй байдлыг нь хангуулж ажиллана. Харин дотоодын ажиглагчаар 30 мянган хүн ажиллана. Энэ жилийн ажиглагчдын тоо өргөн хүрээнд болж байна гэв.
УБЕГ-ын дарга Д.Дэлгэрсайхан: Сонгуультай жилүүдэд иргэдийн шилжих хөдөлгөөнийг түр зогсоодог. Энэ жилийн шилжилт хөдөлгөөнийг 2020 оны сонгуулийн жилтэй харьцуулахад иргэдийн шилжих хөдөлгөөн 3.2 дахин багассан байна. Нийт 2198 хэсгийн хороонд 2 сая 224 мянга 233 сонгогч бүртгэгдсэн байна. Үүнээс түр хасав тэмдэглэгээтэй тэмдэглэгээтэй 165.368 сонгогч, үндсэн 2 сая 58 мянга 865 сонгогч байна. Энэ жил хэд хэдэн онцлолг зүйл бий. Нэгдүгээрт, СЕХ-нд бүртгүүлсэн нам, эвсэлүүдэд сонгогчийн нэрийн жагсаалтыг хоёр удаа хүргүүлсэн. Түүнчлэн 13 тойрогтоо тус бүр нэг сонгогчийн нэрийн жагсаалтын файл өгнө. Үүн дотроо хуульд заасан бүх мэдээлэл байгаа. Тодруулбал дэс дугаар, тойргийн дугаар, хаяг, овог нэр, бүртгэлийн дугаар зэрэг бүгд тайлбартайгаа багтсан. Хамгийн сүүлд хүлээж авсан нэрийн жагсаалтыг бүх хэсгийн хороодод тараагдсан. Өнгөрсөн хугацаанд гарч байсан эргэлзээтэй мэдээллийг нягталж, хяналт шалгалт хийх боломжоор хангасан.
Түүнчлэн хэсгийн хороодод хүргүүлсэн нэрийн жагсаалтыг сонгууийн дараа нягтлан тулгах, хяналт тавих боломжийг бүрдүүлсэн. Өнгөрсөн хугацаанд иргэдийг таньж байгаа программ, техник хэрэгслүүдийн шинэчлэл хийсэн.
ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга Н.Лхагвасайхан: Цагдаагийн байгууллага сонгуулийн үйл ажиллагааг эрсдэлгүй, аюулгүй, гэмт хэрэг зөрчилгүй, олон нийтийн аювулгүй байдлыг хангах чиглэлээр оны эхнээс ажлаа төлөвлөн ажиллалаа. Цагдаагийн байгууллагаас сонгуулийн өмнөх үе, сонгуулийн үе, сонгуулийн дараах үе гэсэн байдлаар ажлаа төлөвлөн ажиллаж байна. Цагдаагийн байгууллагаас аюулгүй байдлыг хангах чиглэлээр 12 мянга орчим алба хаагч үүрэг гүйцэтгэж байна. Нийт 2198 санал авах байрыг өнөөдрийн байдлаар хамгаалалтад авч, төрийн бусад байгууллагуудтай үйл ажиллагаагаа нягтруулан ажиллаж байна. Сонгуулийн хууль тогтоомжийн дагуу саналын хуудас хэвлэгдэхээс авахуулаад, санал тоолох төхөөрөмжийг тээвэрлэх, аюулгүй байдлыг хангах, гэмт хэрэг зөрчлийг шалгаж шийдвэрлэх, нийгмийн дэг журмыг сахиулан үргэлжлүүлэн ажиллаж байна.
Сонгуулийн байран дахь камерын хяналтыг бүрэн шийдэж, хяналтад авсан. Цагдаагийн байгууллагаас сонгуулийн үед гарч болзошгүй эрсдлийг тооцож хүн хүчээ тодорхой хэмжээний зохион байгуулалтад орсон байна.
Энэ хугацаанд цагдаагийн байгууллагад 901 өргөдөл, гомдол ирсэн. Өргөдөл, гомдлыг хуулийн хугацаанд шалгаж шийдвэрлэж байна. Зарим өргөдлүүдийг үргэлжлүүлэн шалгаж байна.
Харилцаа холбооны зохицуулах хорооны Ажлын албаны дарга А.Лувсан-Очир: Энэ удаагийн сонгуулийн 13 тойрогт нэр дэвшиж байгаа 822 нэр дэвшигчээс 2334 цахим хуудас бүртгүүлсэн. Үүнээс 47 нь вэб хуудас, 2287 нь олон нийтийн цахим сүлжээний page хуудсыг хуульд заасан хугацааны дагуу бүртгүүлсэн байна. Сонгуулийн сурталчилгааны 17 хоногийн хугацаанд сонгуульд оролцож байгаа нам, эвсэл, нэр дэвшигчдээс 249 гомдол ирснээс 175-ыг нь хариу өгч шийдвэрлэсэн байна. Нийт гомдолд 840 орчим контент багтсан байгаагийн 60 орчим нь худал мэдээлэл гэсэн агуулгатай гомдол ирсэн. Гомдолд хуулийн дагуу хариу арга хэмжээ авсан. МҮОНРТ-ээр эхний 14 хоногийн байдлаарх дүн мэдээ гарсан. Энэ хугацаанд нийт 44 удаагийн мэтгэлцээнд давхардсан тоогоор 296 нэр дэвшигч оролцсон байна. Нийт мэтгэлцээний цаг 61 цаг 28 минут байна. Өөр бусад телевизүүдээр 60 гаруй цагийн мэтгэлцээн өрнөсөн байна. Үүнээс 50 цагийн мэтгэлцээнийг дохионы хэл болон хадмал тайлбартай нэвтрүүлсэн нь хөгжлийн бэрхшээлтэй иргэний сонгох эрхэнд эерэгээр нөлөөллөө
