Улсын хэмжээнд 152.2 га бүхий 200 үтрэм байгаа. Үүний 88.9 га нь шороон гадаргуутай, 32.8 га талбай бүхий 88 үтрэм цементэн гадаргуутай аж.
Харин ургац хураалтын техник хэрэгслийн хангамж хэр байгаа бол гэдгийг давхар сонирхлоо. Өнгөрсөн жил санхүү эдийн засгийн хямрал дэлхий нийтийг хамарч, хаа хаагүй хэцүүхэн нөхцөл байдалтай байсан. Ургац хураалт эхлэх болоход техник ирэхгүй удаж, хугацаа алдаж байсан тохиолдол бий.
Тэгвэл энэ жил тариалан хураалтад ашиглах техник хэрэгслийн шинэчлэлтэд улсын төсвөөс 57 тэрбум төгрөг, ОХУ-ын зээлээр 16 тэрбум төгрөг зориулсан гэж албан эх сурвалж мэдээлжээ. Мөн хувийн хэвшлийнхэн 110 тэрбум төгрөгийн хөрөнгө зарцуулсан байна. Ингэснээр зүтгэх хүчний трактор 80, хураах техник 65, үтрэмийн тоног төхөөрөмжийн 40 хувийг шинэчилжээ. Тэгэхээр тариалан хураалтын ажилд үтрэмийн машины паркт будаа цэвэрлэгч 232, үр ялгагч 110, будаа ачигч 198, механикжсан ЗАВ 20/40 маркийн 26 үтрэм ажиллана гэсэн үг юм. Хэдийгээр 100 хувь хангалттай биш ч өмнөх жилүүдтэй харьцуулахад техник хэрэгсэл сайтай болсон гэсэн үг. Дараагийн жилүүдэд мөн тодорхой хэмжээгээр хөрөнгө оруулалтаа нэмсээр техник хэрэгслээ сайжруулна гэж албаныхан ярьж байна.
Саалиа бэлтгэхээр саваа бэлтгэ гэж үг бий. Жил бүр ургац хураалтын дараа агуулах, савны асуудал хөндөгддөг. Энэ жил ч мөн ялгаагүй улаанбуудайн агуулах анхаарах асуудлын нэг болоод байна. Жил бүр дутмаг байдаг агуулах энэ жил хүрэлцээ муутай хэвээр байна. Гэхдээ өнгөрсөн жилүүдийг бодвол ахицтай байгаа гэж мөн л албаныхан ам сайтай дуугарч байна. Тариалан эрхлэлтийг дэмжих сан 4.2 тэрбум төгрөгийн тендер зарлаж агуулахын хүчин чадлыг нэмэгдүүлжээ. Ингэснээр Булган аймагт 36 мянган тонн, Сэлэнгэ аймагт хойд Америкийн загвараар 10 мянган тонн улаанбуудай агуулах хүчин чадал бүхий элеватор барьжээ. Өмнө нь 64 мянган тонн улаанбуудай хүлээн авах чадалтай байсан нь 110 мянгыг хүлээн авах болж байна гэсэн үг юм.
Одоогийн байдлаар Монгол Улсыг хөгжүүлэх сангийн нөөцөд 63.4 мянган тонн улаанбуудай байгаа гэнэ. Үүн дээр нэмээд шинэ ургацаас Улсын нөөцөд 168.9 мянган тонн улаанбуудай худалдан авах тухай дурдсан байгаа. Шинэ ургацын улаанбуудайнаас 35.9 мянган тонныг хадгалж, 133 мянган тонныг түрээсийн агуулахад хадгалах гэнэ. Түрээсэнд 600 саяас нэг тэрбум орчим төгрөг зарцуулах юм байна.
Хүнсний үйлдвэрүүдэд 216.6 мянган тоннын багтаамжтай 13 элеватор, тариалангийн аж ахуйн нэгжид 5200 тонн багтаамжтай таван элеватор байна. Улсын нөөцөд 18 мянган тонн улаанбуудай агуулах нэг элеватор, Тариалан эрхлэлтийг дэмжих санд 110 мянган тонныг агуулах дөрвөн элеватор байна. Албаныхны төлөвлөснөөр 100 орчим тонн улаанбуудай үлдсэнийг түрээсийн агуулахад хадгалах аж. Өнгөрсөн жил ч мөн түрээсийн агуулахад улаанбуудайгаа хийхэд нэлээд хөрөнгө зарцуулж байсан. Энэ жил түрээсийн агуулахад 600 саяас нэг тэрбум орчим төгрөг өгөхөөр тооцоолжээ.
Уг нь улсын хэмжээнд 347 мянган тоннын багтаамжтай 22 элеватор байсан ч өмч хувьчлал, зах зээлийн шуурганд өртөж бүрэн ашиглах бололцоогүй болжээ. Мөн Төв аймгийн Угтаалцайдам суманд 36 мянган тонн багтаамжтай төмөр бетон элеваторыг 1988-1990 онд барьж байгаад дуусгалгүй орхисноор барилга, тоног төхөөрөмж нь тоногдосон байна. Одоогийн байдлаар Хэнтий аймагт “Буудайн цацал” ХХК-ийн 5500 тоннын багтаамтай элеватор, Орхон аймгийн хүнсний үйлдвэрийн 3000 тонн элеваторууд бүрэн ашиглах боломжгүй байгаа гэнэ.
Б.БЯМБАА