Тоног төхөөрөмжийн дуу хангинаж, цагаан шохой агаарт бужигнасан энэ газар бол Төв цэнгэлдэх хүрээлэн. Үүдний хэсгээс эхлэн нарнаас хамгаалах зориулалтаар малгайтай, амны хаалт зүүсэн ажилчид энд тэнд элдэв багаж барин ажлаа хийж байлаа.

Төв тайз хэсэгт бөөрөнхийдүү төмөр гагнах ба тодруулж асуувал чимэглэл хийж байгаа аж.

Тэд ажлаа долдугаар сарын 5-нд хүлээлгэж өгөх давчуу хугацаатай тул шаргуу ажиллаж байгаа аж. Жил бүрийн өдийд Төв цэнгэлдэхэд засвар хийж, наадамчдаа хүлээн авахад бэлддэг. Тэр утгаараа хөл хөдөлгөөн ихтэй угтав.

НААДМЫН ТАСАЛБАР 80- 150 МЯНГАН ТӨГРӨГИЙН ҮНЭТЭЙ БАЙНА

 “Төв цэнгэлдэх хүрээлэн” компанийн гүйцэтгэх захирал Ж.Энхжаргалан "Наадмын бэлтгэл 55 хувьтай байна. Долдугаар сарын 5-н гэхэд бүх зүйл бэлэн болсон байхаар гүйцэтгэгч байгууллага нь ажиллаж байгаа. Бид зургаан том, гурван жижиг нийт есөн ширхэг ариун цэврийн өрөөг шинээр байгуулж, мөн өмнөх ариун цэврийн өрөөнүүдийг сайжруулаад тоноглолуудыг нь шинэчлэн ашиглалтад оруулна.

Суудлынхөө тоогоор энэ жил 12 мянган хүн наадам үзнэ гэсэн тооцоо байгаа. Тиймээс ариун цэврийн өрөөний тоог нэмэгдүүлсэн.

Төв цэнгэлдэхийн ариун цэврийн өрөөнүүдийн хүрэлцээ, хангамж муу гэсэн шүүмжлэл гардаг. Ялангуяа зуны задгай тоглолтуудын ил задгай шээсэн гэх гомдол ойр орчмын айлуудаас тасардаггүй. Үүнийг шийдвэрлэж байна" гэлээ.

Цаашдаа нийслэлийн Засаг даргын Тамгын газраас 30 мянган хүний суудалтай, битүү дээвэртэй дөрвөн улирлын шинэ цэнгэлдэх хүрээлэнг барихаар төлөвлөсөн байна.

НААДМЫН ТОГЛОЛТЫН БЭЛТГЭЛ 85 ХУВЬТАЙ ҮРГЭЛЖИЛЖ БАЙНА

Наадмын нээлт хаалтын тоглолт жил бүрийн олны анхаарлыг татдаг. Хамгийн олон уран бүтээлч нэг дор оролцдог тул наадмын нээлт хүлээлт өндөртэй байдаг. Энэ жилийн наадмын нээлт, хаалтад 1000 гаруй хүн оролцож байгаа аж.

Мөн энэ жилийн наадмын нээлтэд орчин үеийн дэвшилтэт технологийг ашиглахаас гадна 21 аймгаас соёлын өв тээгчид хүрэлцэн ирж оролцох юм байна. Тодруулбал, Халимаг, Тува, Өвөрмонголоос уран бүтээлчид  Монголын үндэсний баяр наадамд оролцох гэнэ.

Наадмын ерөнхий найруулагч Ц.Батнайрамдал "Наадмын нээлт хаалтын  үндсэн сэдэв нь “Эх дэлхий, энх оршихуйн цадиг” нэртэй. Мөн тайзын бүрэн автомат болгосон. Наадмын үйл ажиллагаанд 1200 гаруй уран бүтээлч оролцоно. Одоогоор наадмын нээлтийн бэлтгэл 85 орчим хувьтай байна" гэлээ.

С.Нинжжаргал

Гэрэл зургийг Л.Энх-Оргил