Эрдэнэс Тавантолгой ХХК-ийн  гүйцэтгэх захирал асан Б.Ганхуягийн өмгөөлөгч  Э.Шинэцэцэг өнөөдөр /2024.06.26/ мэдээлэл хийлээ. Тэрбээр "Миний үйлчлүүлэгч ямар нэгэн байдлаар ил захидал бичээгүй. Сонгуулийн үеэр ийм худал мэдээлэл гаргаж байгаад харамсаж байна. Тиймээс энэ асуудлыг хууль хяналтын байгууллагад хандаж шалгуулна. Б.Ганхуягийн өнгөрсөн өвөл Хүний эрхийн үндэсний комисст бичсэн захидлын зургийг ашиглаж, түүнийг захидал бичсэн мэтээр худал мэдээлэл тараасан хэвлэл мэдээллийн байгууллагыг залруулга гаргахыг хүсч байна" гэв.

Эргэн сануулахад, "Эрдэнэс Тавантолгой" ХК-ийн гүйцэтгэх захирал асан Б.Ганхуягийг нийтийн албан тушаалтан албан үүргээ хэрэгжүүлсний хариуд бусдаас хахууль авсны улмаас олсон хөрөнгө мөнгө гэдгийг мэдсээр байж түүнийг ашиглаж, хууль бус эх үүсвэрийг нь нуун далдалж, мөнгө угаах болон хахууль авах гэмт хэргийг санаатай үйлдэхэд зохион байгуулагчаар хамтран оролцсон,  Чингис хаан банкинд эдийн засгийн давуу байдал олгож "Эрдэнэс Тавантолгой" ХК-д 40 тэрбум төгрөгийн хохирол учруулсан, нийтийн албан тушаалтны хөрөнгө орлого их хэмжээгээр нэмэгдсэнийг хууль ёсны болохыг үндэслэлтэй тайлбарлаж чадаагүй буюу үндэслэлгүйгээр хөрөнгөжсөн гэм буруутайд тооцон, 5.9 жилийн хорих ял оноож, 9.9 тэрбум төгрөгийг хураан авсан юм.