Евро 2024 тэмцээний хэсгийн шатны сүүлийн тоглолтууд өчигдөр/2024.06.26/ боллоо.

СЛОВАК 1 – 1 РУМЫН 

Е хэсгийн багууд тун сонирхолтой нөхцөл байдалтай байв. Учир нь дөрвөн баг дөрвүүлээ хоёр тойргийн дараа гурван оноотой байжээ. Тиймээс аль хожсон нь хэсгээ тэргүүлэх, хожигдсон нь тэмцээнээ өндөрүүлэх учиртай.

Энэ тоглолтын эхний гоолыг Словакаас Андрей Дуда оруулсан боловч тэргүүллээ удаан хадгалсангүй. Словакийн хамгаалалт Ианис Хаги дээр алдаа гаргаж, Румын торгуулийн цохилт олж авсан. Үүнийг нь Ражван Марин алдаагүй гүйцэтгэж, тооны харьцааг тэнцүүлсэн.

Нэгдүгээр үед л хоёр гоол орсноос хойш дахин гоол орсонгүй. Тоглолтын тэнцээгээр өндөрлөж, Румын хэсгээ тэргүүлж, Словак гуравдугаар байраар хасагдах шатанд шалгарчээ.

Тоглолтын дараа Словакийн дасгалжуулагч Франческо Калзона "Хоёр баг хоёулаа сайн тоглолоо. Бид тэдэнд бага зэрэг зай өгчихлөө. Гэхдээ дараагийн шатанд шалгарсандаа баяртай байна. Би чухал амжилтад хүрлээ гэж бодож байна. Өөрсдөөсөө өндөр чансааны гурван чанга багтай өндөр түвшний тоглолт хийлээ. Бидэнд дахин нэг зорилго байгаа нь энэ тэмцээнийг аль болох удаан үргэлжлүүлмээр байна. Дараагийн шатанд сайн бэлдэнэ гэдэгт итгэлтэй байна" гэжээ.

Румыны дасгалжуулагч Эдвард Иорданеску "Амьдралдаа нэг л мэдрэх мэдрэмж гэж байдаг. Тэр мэдрэмж бол энэ. Бидний гурван тоглолтыг эх орондоо байгаа мэт мэдрүүлсэн фэнүүддээ болон гэртээ биднийг дэмжиж буй румынчууддаа баярлалаа. Би Румын гэдгээрээ бахархаж байна. Хүн бүхэн бахархаж байгаа байх. Дараагийн удаад юу болохыг мэдэхгүй юм. Гэхдээ бид хасагдах шатанд шалгарлаа. Гайхалтай. Сэтгэл зүрхээ гаргасан тамирчдадаа баяр хүргэе" гэв.

БЕЛЬГИ 0 – 0 УКРАИН

Бидний мэдэх Бельгийн шигшээ багийн эрин үе дуусч, шилжилтийн үе нь ирж байна. Харин Украин залуу авьяастнуудыг бэлтгэж байгаа ч хэрхэн нэг баг болгох вэ гэдэг дээр алдах шиг. Хоёр багийн тоглолт хуурай тэнцэж, Бельгийн шигшээ баг хоёрдугаар байраар дараагийн шатанд шалгарсан бол Украин дөрвөн оноотой атлаа хасагдлаа. Хэрэв тэд өөр хэсэгт дөрвөн оноотой байсан бол дараагийн шатанд шалгарах байв. Гэвч энэ хэсгийн дөрвөн баг дөрвүүлээ дөрвөн оноо цуглуулж, гоолын зөрүүгээр Украин гэртээ харьжээ.

Тоглолтын тухайд Бельгиэс Кевин де Брюйне гоолын боломжуудыг үүсгэж байсан ч Лукакуд гоол оруулах хувь тохиол байсангүй. Угтаа Украинд хожил байгуулахад ганцхан гоол хэрэгтэй байсан. Үүнийгээ ч эрэлхийлж, довтолсон. Гэвч гоол оруулж барсангүй.

Украины дасгалжуулагч Сергей Ребров "Энэ тэмцээнд оролцсон нь манай улсын хувьд тун чухал. Сүүлийн хоёр тоглолтод бид үндэстнийхээ зан чанарыг гаргалаа. Гэхдээ энэ бол амьдрал. Алдаа гаргасан ч хариу үйлдэл үзүүлэх нь чухал. Тамирчдаараа бахархаж байна. Мэдээж үр дүн нь бүх хүнд хэцүү байгаа байх. Гэхдээ тамирчдаасаа үүнээс ихийг шаардаж чадахгүй" гэлээ.

Бельгийн дасгалжуулагч Доменико Тедеско "Өнөөдөр бүдэрч болохгүй гэдгээ мэдэж байлаа. Зорилго бол тодорхой байсан. Талбайд гарч, хожил байгуулах. Тамирчид маань бүхнийг хийлээ. Тоглолтын эхэнд гоол оруулах боломж байлаа. Бүр олон гоол оруулах боломж байсан. Тэгсэн бол бүх зүйл амар болох байв. Тамирчдаараа бахархаж байна. Учир нь тэд сайн байлаа. Хэрэв ганцхан гоол алдсан бол хасагдах байлаа" гэв.