"Black Barbie" баримтат кино зохиолч, найруулагч Лагуэриа Дэвис авга эгч Беула Митчеллийнхээр зочилж буйгаар эхэлдэг. Авга эгчийнх нь гэрт хүүхэлдэйгээр дүүрэн нэг өрөө бий. Энэ өрөөнд хайрцагтай хүүхэлдэйнүүдийг шалнаас тааз хүртэл овоолон өрсөн байх аж. Дэвисийн хувьд хүүхэлдэйнээс хол хөндий өсчээ. Тиймээс эгч нь яагаад хүүхэлдэй тоглоомд ингэтлээ хайртайг сониучирхсан байна. Эндээс тэр анхны өнгөт арьст барби хүүхэлдэйг бүтээхэд эгчийнх нь үүрэг оролцоо байсныг анх мэдэж авчээ.

Дэвис энэ талаар ярихдаа "Мэдээж түүнд хэлж ярих түүх байсан. Тиймээс би энэ түүхийн мөрөөр орохыг хүссэн юм" гэжээ. Ингээд түүний хийсэн бүтээл нь "Black Barbie" нэртэй баримтат кино байв. Тус баримтат кино нь өнгөт арьст барбины цаадах түүх, тоглоомын бизнес, цаашилбал соёлын нөлөөллийг дэлгэн харуулсан.

"Mattel" тоглоомын үйлдвэрт ажиллаж байсан өнгөт арьст эмэгтэйчүүд, Америкийн зохиолч Шонда Раймес, баллетчин Мисти Көүплэнд, олимпийн туялзуур сэлэмчин Ибтихаж Мухаммад, конгрессын гишүүн Максин Уотерс зэрэг олон хүний түүхийг баримтат кинонд өгүүлжээ. Шонда Раймес, Мисти Көүплэнд, Ибтихаж Мухаммад нарын хувьд өөрийн гэсэн барбитай.

Дэвисийн авга эгч Беула Митчелл "Mattel" тоглоомын үйлдвэрт 40 гаруй жил ажиллажээ. Тэр 1955 онд дамжлагын хэсгээс ажлын гараагаа анх эхлүүлсэн гэдэг. Тухайн үед үйлдвэрт ажиллаж байсан цөөн хэдэн өнгөт арьстны нэг нь Митчелл байв.

Митчелл хүүхэд байхдаа бусад охидын л нэгэн адил хүүхэлдэйнд дуртай байжээ. Гэвч өөртэй нь ижил өнгөт арьст барби тухайн үед байсангүй. Тэр бүү хэл өнгөт арьст барбитай болно гэж төсөөлж ч үзээгүй аж. 1960, 1961 оны үед тэр компанийн үүсгэн байгуулагч Рут Хандлерт хандаж, өнгөт арьст барби бүтээх хүсэлт тавьсан нь "хувьсгалч үйлдэл" болсон гэж үздэг. Тухайн үед Хандлер "За бодож үзье" гэж хариулж байжээ.

"Mattel" брэнд 1960-аад оны сүүл үеэр "Кристи", "Сувилагч Жулиа" зэрэг хар хүүхэлдэйнүүдийг үйлдвэрлэсэн боловч тэдгээр нь барби биш байв. "Кристи" нь "Barbieland" киноны туслах дүр байсан бол "Сувилагч Жулиа"-г жүжигчин, дуучин Диаханн Кэрроллоос санаа аван бүтээжээ. Жинхэнэ бодит өнгөт арьст барбиг бүтээтэл 10 гаруй жил шаардагдсан.

"Mattel" брэнд 1976 онд Китти Блэк Перкинсийг анхны өнгөт арьст дизайнераар ажилд авснаар энэ бүхэн эхэлжээ. Анхны өнгөт арьст барбиг 1980 онд танилцуулсан. Тэр хүртэл хүмүүс барби хүүхэлдэйн талаар тогтсон хэвшмэл төсөөлөлтэй байв. Уламжлалт барби хүүхэлдэй нь нарийхан хамартай, нимгэн уруултай, урт шулуун үстэй байдаг бол өнгөт арьст барби зузаан уруултай, өргөн хамартай, тод өнгөтэй, богино буржгар үстэй байжээ.

"Өнгөт арьст бяцхан охидод өөрсөдтэйгөө ижил хүүхэлдэйгээр тоглох хэрэгцээ үүссэн байсан тэр л цаг үед энэ хүүхэлдэйг бүтээсэн. Энэ барби маань өнгөт арьст хүүхэлдэйн дүр төрхийг бүрэн гаргаж ирээсэй гэж би хүссэн" гэж Блэк Перкинс хэлжээ.

Баримтат киноны продюсер Аалиа Уилиамс "Барби бол түгээмэл бөгөөд хүүхэд бүрийн дуртай тоглоом. Барби брэнд гэхээр л цагаан хүүхэлдэйтэй холбож ойлгохгүй байх нь чухал. Ийм хүүхэлдэйтэй байх нь өнгөт арьс бол гайхамшигтай, өнгөт арьстай эмэгтэйчүүд үзэсгэлэнтэй гэдэг ойлголтыг өгөх болно. Би өөрийгөө үзэсгэлэнтэй гэдгийг, сайхан ээж ааваас төрсөн гэдгээ үргэлж мэдэрдэг, үүндээ хэзээ ч эргэлзэж байгаагүй. Гэхдээ өөртэйгөө адил хүүхэлдэйтэй болсноор энэ ойлголт тань улам бэхэжнэ" гэжээ.

Барби хүүхэлдэйгээр дамжуулаад залуу хүмүүсийн гоо сайхны талаарх хэвшсэн ойлголтыг ч эвдэж болно. Бодит хүний бие махбодоос ялгаатай, бараг боломжгүй бие галбиртай барби үйлдвэрлэдэг гэдэг шүүмжлэлд "Mattel" брэнд олон жил өртсөн. Баримтат кинонд оролцож ярилцлага өгсөн өнгөт арьст зарим эмэгтэй хүүхэд насны түүхээ хуваалцжээ. Тэд багадаа цагаан арьст барбигаа өөрсөдтэйгөө адил болгохын тулд үс, нүдний өнгийг нь өөрчлөхийг оролддог байжээ. Мөн эцэг эх нь онцгойлон өнгөт арьст барби худалдаж авч өгсөн охид ч байв.

Түүхч Ёланда Хестер хэлэхдээ "Хамгийн анх өнгөт арьст барбитай танилцсан тэр мэдрэмжээ би одоо ч санаж байна. Энэ барби бол бидний оршин тогтнол, үнэ цэнийн илрэл болж байлаа" гэжээ.

Зах зээл нь харьцангуй бага, зар сурталчилгаа ч төдийлөн их хийгээгүй боловч "Black Barbie" баримтат кино амжилт олсон.

Барби хүүхэлдэйг сүүлийн жилүүдэд янз бүрийн загвараар бүтээх болжээ. Янз бүрийн биеийн хэлбэр, ажил мэргэжилтэй, тэр бүү хэл хөгжлийн бэрхшээлтэй барби хүртэл худалдаанд гарсан билээ.

Эх сурвалж: CNN