ОХУ-ын арми Украины хэвлэлийн байгууламжуудад цохилт өгч, устгасан. Тиймээс ирэх жил сургуулиудад ашиглах гурван сая гаруй сурах бичгийг АНУ санхүүжүүлж, хэвлэх болжээ.

Байдены засаг захиргаа сурах бичиг хэвлэлд ойролцоогоор найман сая ам.доллар олгоно.

АНУ-ын Үндэсний аюулгүй байдлын зөвлөх Жейк Салливан "Украины хэвлэлийн байгууламжид цохилт өгснөөр ОХУ сурах бичгийн үйлдвэрлэл болон хүүхдүүдийн боловсролыг тасалдуулахыг зорьж байна. Оросыг амжилт олохыг хүлээн зөвшөөрөхгүй. Тийм учраас бид ирэх хичээлийн жилээс урьтаж Украины бага сургуулиудад ашиглах гурван сая гаруй сурах бичгийн хэвлэлтийн зардлыг санхүүжүүлж байна. Бидний хүргэх мессеж ойлгомжтой: ОХУ-ын түрэмгий дайны эсрэг тулалдаж буй украинчуудтай бид хамт байсаар байх болно. Зөвхөн цэрэг армийн дэмжлэг үзүүлэх нь хангалтгүй. ОХУ нь Украины түүх, соёл, өвөрмөц байдлыг онилсон өргөн цар хүрээтэй зүйл хийхийг оролдож байгааг хүлээн зөвшөөрч, үүнд нь хариу өгөх хэрэгтэй" гэжээ.

Украины хамгийн том хэвлэх үйлдвэр "Фактор Друк" тавдугаар сарын сүүлээр ОХУ-ын пуужингийн цохилтод өртсөн. Үйлдвэрийг эргэн ажиллагаанд оруулахад 6-8 сар зарцуулах аж.

Сурах бичгийг хэвлэхдээ нэг, хоёрдугаар ангийн сурагчдад зориулсан хатуу хавтастай сурах бичгүүдэд онцгой анхаарал хандуулна. Нийт 3.2 сая сурах бичгийг 2024 оны есдүгээр сараас өмнө Украины бусад хэвлэх үйлдвэрт хэвлэнэ. Хэвлэгдсэн сурах бичгийг Украин даяар 12700 орчим сургуульд тараах аж.

Эх сурвалж: CNN