Сурагчдын амралтаар хүүхэд орон гэртээ осолдох нь нэмэгддэг

Сургууль, цэцэрлэгийн үйл ажиллагаа завсарласан буюу баяр наадмын үе, нийтийг хамарсан арга хэмжээний үеэр хүүхэд гэмт хэрэг зөрчилд өртөх, төөрөх тохиолдол ихэсдэг. Энэ талаар мэдээллийг ЦЕГ-ийн урьдчилан сэргийлэх хэлтсийн ахлах мэргэжилтэн, цагдаагийн ахмад С.Сайнбилэгээс тодрууллаа.

ЦЕГ-ийн урьдчилан сэргийлэх хэлтсийн ахлах мэргэжилтэн, цагдаагийн ахмад С.САЙНБИЛЭГ:

-Өнгөрсөн жилийн Үндэсний их баяр наадмын өдрүүдэд цагдаагийн байгууллагад гэмт хэрэг, зөрчлийн шинжтэй нийт 226 дуудлага мэдээлэл ирсэн.

Баярын өдрүүдэд нийт 34 хүүхэд төөрсөн байсныг цагдаагийн алба хаагчид олж тогтоон эцэг эх, асран хамгаалагчид нь хүлээлгэн өгсөн байдаг.

Тухайлбал, төв цэнгэлдэх хүрээлэнд 17, Сүхбаатарын талбайд зохион байгуулагдсан тоглолтын үеэр 12, хүй долоон худагт таван хүүхэд тус тус төөрсөн гэсэн тоон мэдээлэл бий. Сурагчдын амралт эхлээд багагүй хугацаа өнгөрсөн байна. Өнгөрсөн жилүүдэд бүртгэгдсэн гэмт хэрэг зөрчлийн тоо мэдээ, гэмт хэргийн төрлийг авч үзвэл сурагчдын амралт эхэлсэнтэй холбогдуулан ихэвчлэн хүүхдүүд ахуйн хүрээний осол гэмтэлт өртдөг нь тогтоогдсон. Түүнчлэн эцэг эхийн хамт аялал зугаалгад явж байхдаа үер усны аюулд өртөх тохиолдол нэлээд бүртгэгддэг.

Мөн сургууль амарсан үед харгалзах хүн байхгүй гэх шалтгаанаар хүүхдийг ганцааранг нь үлдээснээс болж, гал түймрийн осол, тог цахилгааны эрсдэлд өртөж, хохирсон тохиолдол их гардаг.

Иймд сурагчдын амралт эхэлсэн энэ үед эцэг эхчүүд хүүхдүүдээ ахуйн хүрээний осолд өртөхөөс урьдчилан сэргийлэх шаардлагатай байна. Тухайлбал, хүүхдүүдээ зайлшгүй насанд хүрсэн хүний хараа хяналтад үлдээх, аялал зугаалгаар явж байх үедээ гол ус руу ойртуулахгүй байх, архи согтууруулах ундаа хэрэглэж, хүүхдэдээ тавих хараа хяналтаа сулруулахгүй байхыг анхааруулж байна. Мөн баяр наадам, ойн баярын үйл ажиллагаа, олон нийтийг хамарсан арга хэмжээний үеэр хүүхдэдээ тавих хараа хяналтаа сайжруулахыг уриалж байна гэв.