Парисын олимп нээлтээ хийхэд тун бага хугацаа үлдлээ. Ирэх олимпийн хамгийн анхаарал татаж байгаа төрлүүдийн нэг бол жүдо. Долдугаар сарын 27-ноос наймдугаар сарын 3-ныг хүртэл найман өдрийн турш дэлхийн шилдэг 372 жүдоч Парист хүч үзнэ. Тэгвэл Парист олны анхаарлыг татах жүдочдыг та бүхэндээ танилцуулъя.

Тедди Ринер /Франц/

Өнөө цагийн хамгийн алдартай жүдоч гэвэл Тедди Ринерийг нэрлэх биз. Тэрбээр нутагтаа гурав дахь алтан медалиа хүртэх зорилготой. Өдгөө 35 настай тэрбээр Токиогийн олимпоос хүрэл медаль хүртэж, гурав дараалан түрүүлэх боломжоо алдсан. Харин энэ удаад эх орондоо алтан медаль авхыг хүсч байна.

Дэлхийн 11 удаагийн аварга тэрбээр Токиогийн олимпийн багийн барилдаанаас алтан медаль авсан билээ.

Хифүми Абэ, Үта Абэ /Япон/

Ах дүүс дахин нэг өдөр олимпийн аварга болох магадлал өндөр. Тэдний хувьд Токиогийн олимпод түрүүлснээсээ хойш сүүлийн хоёр дэлхийн аварга дараалан түрүүлсэн билээ.

Лукаш Крпалек /Чех/

Тедди Ринерийг зогсоох, хүчтэй өрсөлдөөнийг үзүүлэх хүн бол маргаангүй Крпалек. Олимпийн хоёр удаагийн аварга тэрбээр Токиогийн олимпод жин өгсөн Ринерийн жинд түрүүлсэн. Тэд 2019 оноос хойш учраа таараагүй гэхээр тун сонирхолтой. Гагцхүү Лукаш Крпалек -100 кг эсвэл +100 кг-д оролцох эсэх нь эргэлзээтэй байна.

Кларисс Агбеньену /Франц/

Дэлхийд зургаа түрүүлсэн Францын аварга энэ удаад хоёр дахиа олимпод түрүүлэхээр татамид гарна. Ээж болоод удаагүй байгаа Агбеньену аварга эргэн формдоо орж, эх орон, ард түмнийхээ өмнө аварга болохоор зодоглоно.

Б.Баасанхүү /Монгол/

Энэ жил Б.Баасанхүү шиг формтой жүдоч Монголд алга. Ази, дэлхийн аварга болсон гэхээр яалт ч үгүй ирэх олимпоор медалийн гол фаворитод яригдана. Гэхдээ түүний алтан медальд хүрэх зам амаргүй. 2016 оны Риогийн олимпод Д.Сумъяа 25 насандаа мөнгөн медаль хүртэж байсан түүхтэй. Тэгвэл энэ жил Б.Баасанхүү 25 насандаа энэхүү амжилтыг давтаж, ахиулж чадах болов уу?

Ирэх олимпийн гол өрсөлдөөн эзэн орон Франц болон жүдог үндэслэгч Японы хооронд өрнөх шинжтэй. Хоёр улс хоёулаа 14 жинд тамирчдаа илгээнэ. Гурван жилийн өмнө япончууд Токиод есөн алтан медаль хүртэж байсан бол францчууд энэ удаад дутахгүй байхыг хичээнэ.