Хятадад үйлдвэрлэсэн автомашиныг Италид үйлдвэрлэсэн гэж тэмдэглэн, хэрэглэгчийг төөрөгдүүлсэн “DR Automobiles” компанийг Италийн засгийн газар торгожээ. Италийн автомашин үйлдвэрлэгч “DR Automobiles”-ыг 6.4 сая ам.доллараар торгох болсон. Автомашинуудаа ихэвчлэн Хятадад үйлдвэрлэсэн атлаа Италид үйлдвэрлэсэн гэж хэрэглэгчийг хуурсан гэж тус улсын өрсөлдөөний зохицуулах хороо үзжээ.

Харин “DR Automobiles” давж заалдахаа мэдэгдсэн. Тус компани автомашинуудаа Италид бүрэн үйлдвэрлэсэн гэж хэзээ ч мэдэгдээгүй гэж эсэргүүцэж байна.

“DR Automobiles” нь Хятадын “Chery”, “BAIC”, “JAC” зэрэг автомашин үйлдвэрлэгчдийн үйлдвэрлэсэн эд ангиудыг ашиглан хямд өртөгтэй машинуудыг угсардаг. Тус компанийн “DR” болон “EVO” брэндийн автомашинуудыг Италид үйлдвэрлэсэн гэж борлуулдаг боловч ихэвчлэн Хятадаас гаралтай байжээ. Италид зөвхөн жижиг угсралт, өнгөлгөөний ажил л хийгдсэн байсан аж.

Сүүлийн үед “DR” болон “EVO” брэндийн автомашинуудын борлуулалт Италийн зах зээлд мэдэгдэхүйц өссөн байна.

Эх сурвалж: BBC