Энэ сарын 5-ны өдөр Авлигатай тэмцэх газар болон прокурорын газраас Төв аймгийн Заамар сумын нутагт байх Тосон үйлдвэрт шалгалт хийсэн байдаг. Улмаар үйлдвэрийн үйл ажиллагааг зогсоож битүүмжэлсэн. Энэ талаар тус үйлдвэрийн ажилчид мэдээлж /2024.06.07/ –ны өдөр хэвлэлийн хурал хийж байв. Үйлдвэрийн үйл ажиллагааг зогсоосон нь Хөгжлийн банктай холбоотой гэсэн хэмээн тухайн үед тус компанийн ажилчид хэлж байсан юм. Тэгвэл Монполимет группийн 1300 орчим ажилчдын төлөөлөл өнөөдөр /2024.06.21/ тайван жагсаал хийж байна.

Монполимет группийн инженер н.Батмөнх: Монполимет группийн ууган үйлдвэр болох Тосон үйлдвэрийн үйл ажиллагааг зогсоогоод 17 хонож байна. Энэ хугацаанд бидэнд ямар нэг мэдэгдэл, мэдээлэл өгөөгүй. 300 гаруй хүмүүс ажлын байргүй болоод аргаа барж байна. Тиймээс бид нэгдээд “Төр дарамтаа зогсоо, бид ажлаа тайван хиймээр байна” үзэл бодлоо тайван замаар илэрхийлж байна. Хагас сар гаран ажилгүй байгаа нь манай ажилчдад маш хүнд тусч байгаа. 300 гаруй залуучуудын ар гэрт хүнд тусч байна. Зээлээ төлж чадахгүй, санхүүгийн хүнд нөхцөлд орж байна. Улсын хөгжил аж үйлдвэрээс эхтэй. Төрийн тодорхойгүй шийдвэрээс болж олон зуун хохирч байна. Эрх мэдлээ урвуулан ашиглаж 2014 онд Хөгжлийн банкнаас зээл авсан гэдэг зүйл яригдаад байгаа.Гэтэл манай үүсгэн байгуулагчид тухайн үед улс төрийн ямар нэг албан тушаал хашаж байгаагүй. 32 жилийн хугацаанд хуулийн дагуу үйл ажиллагаа явуулж байна. Бүх зүйл хуулийн дагуу шалгагдаад, нотлогдоод байхад шийдвэр гарсан байхад гэнэтийн шийдвэр гараад ямар нэг мэдэгдэл, мэдээлэл өгөхгүй үйлдвэрийн үйл ажиллагааг зогсоосон. Миний хувьд эх орондоо ажиллаж амьдрахаар шийдсэн олон мянган залуу үеийн төлөөлөл. Бүгд адилхан ипотек болон бусад банкны зээлтэй. Гэрийнхээ санхүүг авч явдаг. Зээлийн төлбөрөө төлөх хугацаа тулчхаад байна. Ар гэрийнхээ санхүүгийн асуудлыг шийдвэрлэж чадахгүй байна” гэв.