Английн шигшээ багийг энэ Еврогоор түрүүлнэ гэж олон хүн таамаглаж, дэмжиж байгаа нь лавтай. Гэхдээ өчигдөр/2024.06.20/ Данийн эсрэг үнэхээр муу тоглов. Хэдий эхний гоолыг оруулж, тэргүүлж эхэлсэн ч юу юугүй үр дүнгээ хадгалахаар хамгаалж эхэлсэн. Уг нь тоглолтын хэмнэлээ хадгалж, довтолгоо зонхилсон хөлбөмбөгөө үргэлжлүүлсэн бол дахин гоол оруулах ч боломж байлаа. Харамсалтай нь хамгаалж ч чадсангүй. Данийн шигшээ баг хариуг нь барьж, тооны харьцааг тэнцүүлсэн.

Нэгдүгээр үеийн завсарлагаанаар цагтаа Английн шигшээ багт тоглож явсан Даниель Старриж шигшээ багаа шүүмжлэн "Англи бол гоол оруулсныхаа дараа хамгаалахад дэндүү авьяастай баг. Өмнөх тоглолтод хамгаалалт нь хэрэгжсэн ч энэ удаад үүнийхээ шанг амслаа. Бидний хамгийн сайн хамгаалалт бол довтолгоо" гэж жиргэжээ.

Мөн талбайн төвийн хагас хамгаалалтын хослол болох Деклан Райс, Трент Александр-Арнольд хоёр учраа олсонгүй. Данийн хагас хамгаалагчдын шахалт, дамжуулалт, дарамт тэднийг тайван байлгаагүй. Улмаар Александр-Арнольд сууж Галлахер гарч ирсэн ч нөхцөл байдал өөрчлөгдсөнгүй.

Тооны харьцаа тэнцсэний дараа хоёрдугаар үед Англи эргэн довтлох гэсэн боловч тоглолтын хэмнэл бүхэлдээ Данийн талд шилжиж, Английн шигшээ хэмнэлээ олж чадахгүй явсаар тэнцээтэй тоглолтыг өндөрлүүлсэн.

Тоглолтын дараа Гарет Саутгейт хэвлэл мэдээллийн гол бай болж, шүүмжлэл, доромжлолд нүүр нүдгүй нүдүүлсэн. Ялангуяа хийсэн сэлгээнийхээ төлөө шүүмжлүүлсэн. Прьмьер лигт өнгөрсөн улирал ганган байсан Коул Палмер, Энтони Гордон, Коби Майну нарыг бус Эзе, Жарред Бовен нарыг талбайд гаргасан нь гайхширмаар. Коул Палмерыг өнгөрсөн улирал ямар гайхалтай байсныг хөлбөмбөгчид сонирхогчид сайн санаж байгаа. Харамсалтай нь энэ Еврод нэг ч минутыг талбайд өнгөрүүлсэнгүй.

Даниель Старриж "Бид одоог хүртэл Палмерыг талбайд хараагүй гэхээр үнэндээ цочирдож байна" гэв. Харин Английн домогт хөлбөмбөгчдийн нэг Жэйми Каррагер "Хайр найргүй байх цаг ирлээ. Гарет, шилдэг тамирчдаа бус шилдэг багаа сонго" гэсэн бичвэрийг нийтэлжээ.

Каррагерын бодлоор Английн шигшэ 4-3-3 гэсэн хувилбараар довтолгоондоо Сака, Энтони Гордон, Харрин Кэйн нарыг ашиглах бөгөөд Жуд Беллинхем яг довтлогчийн ард бус Деклан Райст тусалж, талбайн гүнээс тоглолтыг найруулах хэрэгтэй аж. Энэ хоёр дээр Фил Фоден бус Конор Галлахер, Адам Уартон, Кобби Майну зэрэг талбай дээр эрч хүч авчрах тэсрэлттэй залуус хэрэгтэй гэнэ.

Кэйн, Райс хоёрыг солъё гэсэн ч орлуулах хүн байхгүй учир тэд хамгийн сайнаараа тоглохоос өөр аргагүй байна. Райс Еврогийн эхний хоёр тоглолтод үнэхээр учраа олоогүй. Түүнийг бөмбөг авах төдийд л Данийн шигшээ баг шахаж, Райсыг хүнд байдалд оруулж байгаа харагдсан.

Жэйми Каррагер "Миний үед шигшээ багийн хувцас солих өрөөнд Уэйн Руни, Фрэнк Лампард, Стивен Жерард, Пол Скоулз, Майк Оуэн байхыг хараад үнэхээр л биднийг хожих баг байгаа болов уу гэж боддог байлаа. Гэхдээ бид хүссэн амжилтдаа хүрээгүй. Том тоглолтод зарим зүйлсийг золиосолж, том нэрнүүдийг талбайд гаргахгүй байх ёстой байсан юм. Саутгейтэд одоо алдах зүйл үгүй. Юу ч болсон тэр энэ тэмцээний дараа ажлаа өгнө. Тиймээс санаа зовох зүйлгүй. Шинэ санаа, шинэ тоглогчидгүй бид хуучин шигээ л дуусна" гэжээ.