УИХ-ын сонгуулийн сурталчилгаа ид өрнөж байгаа энэ цаг үед Ардчилсан нам руу чиглэсэн үндэслэлгүй гүтгэлэг цацагдаж буйд нэр дэвшигч Б.Баттөмөр тайлбар хийлээ.

Тэрбээр "Сонгууль болоход найм хоног үлдсэн байна. Сошиалаар өчигдөр Ардчилсан нам 2024 оны УИХ-ын сонгуульд ялалт байгуулбал ямар Засгийн газар байгуулах вэ гэдэг илт худал мэдээлэл цацсан. Бүтцийн хувьд маш данхгар байна лээ. Тийм данхгар Засгийн газар байгуулахгүй.

Одоогийн Засгийн газарт  нэг хүнд зориулсан яам ч байна, ямар салбар чухал вэ гэдгээ чухалчилж авч үзээгүй. Даахгүй нохой булуу хураана гэдэг шиг данхгар Засгийн газар байгуулсан байдаг.

Ардчилсан нам дотроо шийдвэр гаргах бүтэцтэй, тэрний нэг нь улс төрийн зөвлөл гэдэг байгууллага байдаг. Улс төрийн зөвлөл дээр  Засгийн газрын бүтэц, бүрэлдэхүүний талаар үндсэн зарчмаа ярилцсан.

Гэхдээ өчигдөр сошиал дээр цацагдсан зурган дээр байгаа хүмүүсээс нэг нь ч Засгийн газрын бүрэлдэхүүнд орохгүй.  Жагсаалтаар нэр дэвшигч нарыг Засгийн газрын бүрэлдэхүүнд оруулахгүй, яам ахлуулахгүй гэсэн үг.

Тойрогт өрсөлдөж байгаа нэр дэвшигчдээс гараад ирэх юм бол яамдыг ахлуулж сайдаар томилно.

УИХ-ын сонгууль болоход найм хоног үлдсэн байна. Илтэд худал мэдээлэл цацах нь хууль эрх зүйн олон үр дагавартай.

Хоёрдугаарт, хэзээ хэзээнээсээ Монголын сонгууль хүний сэтгэл хөдлөл дээр тоглох хандлагатай байгаа.  Олон нийтийн уур бухимдал төрүүлэх, зэвүүцэл жигшил төрүүлэх гэх мэтчлэн. Энэ найм хоногт олон нийтийн сэтгэл хөдлөлөөр нь дамжуулж нөлөөлөх гэсэн оролдлого маш их явах болно.  Өчигдрийнх шиг илтэд худал мэдээлэл ч цацна. Эрх баригчдын зүгээс  худал мэдээлэл цацсан гэж бид харж байгаа. Бүхэл бүтэн тролл арми ажиллаж байна.

Үлдсэн хугацаанд Ардчилсан нам руу чиглэсэн худал мэдээллийн давалгаа хэд хэдэн үе шаттай явна. Үүнд автахгүй байх ёстой.

Бусад улс оронд ч гэсэн олон нийтийн уур бухимдал төрүүлсэн дүрс бичлэг, мэдээ цацдаг. Тэгсэн ч сонгогчид нь сонголтыг тухайн үеийн сэтгэл хөдлөлөөр хийдэггүй.  Чиний сэтгэл хөдлөлийг хэн удирдана, тэр чамайг удирдана гэж үг байдаг. Олон нийтийн сэтгэл хөдлөлийг удирдах замаар  шийдвэр гаргалтад нөлөөлөхийг оролдоно энэ бүхэнд анхааралтай байгаарай гэж зөвлөе” гэлээ.

Дараа нь сэтгүүлчдийн асуултад хариулт өгөв.

-Багаар нь дэмжээрэй , багаар нь дэмжихгүй бол саналын хуудас хүчингүй болно гэдэг яриа маш их гарах боллоо. Дээр нь сонгогчдын хувьд тухайн тойрогт нэр дэвшигчдээс хэдэн хүнд саналаа өгөх ёстой вэ. Мөн намд санал өгөх талаарх мэдээлэл ойлголт алга. Энэ асуудалд Ардчилсан нам хэрхэн анхаарч байна вэ?

-Багаар нь дэмжинэ гэдэг уриалга байж болно. Харин багаар нь дэмжихгүй бол саналын хуудас хүчингүй болно гэдэг утгагүй зүйл.  Саналын хуудас хоёр онцлогтой. Нэг нь нэр дэвшигчийг сонгоно, нөгөө нь намыг сонгоно. Сонгогчдын хувьд тухайн тойрог нь хэдэн мандаттай вэ гэдгээ маш сайн мэдэж байх ёстой. Жишээлбэл, баруун аймаг 10 мандаттай тойрогтой бол зүүн аймаг долоон мандаттай байна. Энэ ялгааг маш сайн мэдэх ёстой. Нэр дэвшигчдээс гадна нам дугуйлна.  Хэнд саналаа өгөх нь тухайн сонгогчийн өөрийнх нь эрх. Үүнд хэн нэгэн нөлөөлөх ёсгүй.

-ХҮН нам өчигдөр мэргэжлийн Засгийн газар байгуулна гэдгээ зарлалаа. УИХ-ын сонгуулийн сурталчилгаа явж байх үед ингэж зарлах нь хэр зөв бэ. Мөн Ардчилсан нам Засгийн эрх авбал ямар Засгийн газар байгуулах вэ. Хэдэн яамтай байх вэ?

-Монгол Улсын сонгож авсан сонгуулийн системээр Засгийн газраа зарлах нь байх ёстой зүйл. Хэн Засгийн газрыг тэргүүлэх вэ гэдгээ ил болгох ёстой. Тийм ч учраас Ардчилсан нам жагсаалтынхаа эхэнд намын дарга Лу.Гантөмөрийг тавьсан. Энэ бол Ардчилсан нам УИХ-ын сонгуульд ялах юм бол Лу.Гантөмөр гэдэг хүн Засгийн газрын тэргүүн болно гэдгийг тодорхойлж байгаа. Гэхдээ нэг зовлон байна. ХҮН нам Засгийн газраа зарлачихлаа гэлээ. Сонгуулийн үр дүн яаж гарахыг одоогоор хэлж мэдэхгүй байна.

Гэхдээ Ардчилсан намын хувьд нэг зарчим тодорхой байгаа, тойрогт нэр дэвшиж байгаа хүмүүс эхлээд сонгогдоод гараад ирэх ёстой. Нэрний хувьд онцлогтой. Үе Үеийн Загийн газар өөрсдийгөө тодотгосон нэр ашиглаж байгаа.

Хэрвээ Ардчилсан нам энэ удаагийн сонгуульд  ялах юм бол стратегийн Засгийн газар байгуулна.

Монгол Улсын  нийгэм эдийн засгийг урагш хөдөлгөхийн тулд ямар салбаруудыг илүү стратегийн гэж үзэх юм. Энэ бүхнийгээ манай нам оновчтой тодорхойлсон.  Жишээлбэл, боловсрол, эрчим хүчний салбарыг стратегийн салбар гэж харж байгаа. Тэр салбаруудаа сонгон авч хөгжүүлнэ. Одоогийнх шиг баахан даахгүй нохой булуу хураана гэдэг шиг баахан яамдтай, баахан сайд нартай Засгийн газар байгуулахгүй.

Үлдсэн найм хоногийн хугацаанд олон нийтийн сэтгэл хөдлөлийг жолоодох замаар сонгуульд нөлөөлөх гэж оролдоно. Анхааралтай байж, худал мэдээлэлд автахгүй байхыг хүсье.

Г.ХОРОЛ