Евро 2024 тэмцээний хэсгийн шатны хоёрдугаар тойргийн эхний тоглолтууд өчигдөр/2024.06.19/ боллоо.

ХОРВАТ 2 – 2 АЛБАНИ

Эхний тойрогт хожигдсон хоёр баг өчигдөр учраа таарав. Хожигдсон баг нь гэртээ харих байсан учир хоёр баг эхнээсээ нямбай тоглосон. Тоглолтын эхний гоолыг Албаниас орууллаа. Тэд тоглолтын эхлэлийг сайн тавьдаг гэдгээ Итали, Хорватыг эсрэг харуулав. Гагцхүү төгсгөл хийхдээ тааруу аж. Нэгдүгээр үед Албани Лачигийн гоолоор тэргүүлсэн ч хоёрдугаар үед Хорват хожигдож болохгүй гэдгээ ухаарч, хоёр гоолыг дараалан оруулсан. Ингэхдээ Крамарич тэнцүүлж, Гясуля өөрийн хаалгандаа гоол оруулчихлаа.

Санасандаа хүрсэн Хорват тэргүүллээ авсны дараа тайвширчихсан. Энэ нь ч буруу байж, Албани 90+5 дахь минутад гоол оруулж, тооны харьцааг тэнцүүллээ. Тус гоолыг өнөөх Гясуля оруулж, алдаагаа засчээ.

Ийнхүү хоёр баг дараагийн шатандаа шалгарах найдвараа хадгаллаа. Одоо хэсгийн сүүлийн тоглолтоос бүх зүйл шалтгаална.

Тоглолтын шилдгээр тодорч, төрсөн өдрөөрөө гоол оруулсан Андрей Крамарич "Миний төрсөн өдрийг ингэж сэтгэл дундуур тэмдэглэнэ гэж санасангүй. Хэрэв бид гурван оноогоо авсан бол сайхан байх байлаа. Энэ л хөлбөмбөг. Заримдаа сүүлийн секундэд гоол оруулна, заримдаа алдана" гэв.

Албанийн ахлах дасгалжуулагч Сильвино "Юуны түрүүнд Хорватыг хүндэлж байна. Учир нь тэд сүүлийн хэдэн жил үнэхээр гайхалтай байгаа. Гайхалтай тоглогчидтой. Тоглолтыг бүхэлд нь дүгнэхэд хэцүү юм. Эхний үед бид үнэхээр сайн байсан. Гэвч хоёрдугаар үеийн 15-20 минутад хэцүү зүйлс тохиолоо. Гэхдээ тоглолтын төгсгөлд тэнцээ авлаа. Үүнийг бид хүртэх эрхтэй" гэжээ.

ГЕРМАН 2 – 0 УНГАР

Чоно үүрэндээ өлзийтэй гэгчээр Германы шигшээ эх орондоо, ард түмнийхээ өмнө хожигдох шинжгүй байна. Өчигдөр тэд Жамал Мусиала, Илкай Гюндоган нарын гоолоор тоглолт таардаггүй эвгүй өрсөлдөгч Унгарыг буулган авчээ. Ингэснээр хоёр хожилтой болж, хасагдах шатанд шалгарсан эхний багаар тодров.

Унгарын шигшээд гоол оруулах боломж тохиосон ч ашиглаж чадсангүй. Тэд хоёр хожигдолтой болж, хэсгээс гарах бараг л боломжгүй боллоо.

Германы дасгалжуулагч Юлиан Нагельсманн "Унгар бол хэцүү өрсөлдөгч. Хэрэв арваннэгдүгээр сард тоглосон бол бид хожихгүй байлаа. Өнөөдөр баг маань гялалзаж чадсангүй. Гэхдээ иймэрхүү тоглолтуудаас суралцах хэрэгтэй. Цэнгэлдэх, хувцас солих өрөө гурван оноо хүссэн. Бид авч чадлаа. Өнөөдөр хаалгачаас эхлээд багаараа хамгаалалт сайн байсан. Хүн бүхэн байгаагаа зориулж, бие биенийгээ хурцалж, гоол алдсангүй" гэв.

Унгарын ахлагч Доминик Собослаи "Үр дүн бидний төсөөлж байсан шиг биш байлаа. Тоглолтын хэмнэл, бидний гүйлт сайн байлаа. Боломж үүсгэж, чадахаараа хамгааллаа. Гэхдээ олон хүн биднийг Германы эсрэг тоглож байгаа гэдгийг мартсан бололтой. Тэд чанартай баг. Багаараа хичээсэн ч хангалттай байсангүй" гэжээ.

ШОТЛАНД 1 – 1 ШВЕЙЦАРЬ

Скотт МакТоминай, Жердан Шакири нар харилцан гоол оруулж, хоёр баг эвийн гэрээ байгууллаа. Эхний тоглолтдоо Германд хожигдсон Шотланд эхний гоолыг оруулсан ч удалгүй Швейцариас Жердан Шакири гайхалтай гоолоор хариуг нь барьжээ. Шигшээ багтаа Шакири үнэхээр гайхалтай тоглодог билээ.

Хоёр баг эн тэнцүүхэн бөмбөг бүрийн төлөө ширүүн тэмцсэн. Аль, аль нь гоол оруулах боломж үүсгэсэн ч ашиглаж чадсангүй. Швейцарь дараагийн шатанд шалгарах эрхээ бараг л авчихлаа. Харин Шотланд дараагийн тоглолтод Унгарыг заавал хожих даалгавартай үлдлээ.

Шотландын дасгалжуулагч Стив Кларке "Би үүнийг л багаасаа хүлээж байлаа. Бид ингэж л сүүлийн 3-4 жил тоглосон. Бид юу хийхээ мэддэг. Сайн өрсөлдөгчийн эсрэг сайн тоглолоо. Германд хожигдсоны дараа сайн үр дүн харууллаа. Бид одоо ч амьд байна" гэлээ.

Жердан Шакири "Би өнөөдрийн гоолыг үргэлж дурсах болно. Бөмбөг над руу удаан өнхрөөд ирсэн. Тэгэхэд л "За, үүнийг анх удаа туршиж үзье" гээд хаалгачийн булан руу төгс цохичихсон. Үнэхээр тансаг гоол. Гэхдээ би өмнө нь зөндөө л гайхалтай гоол оруулсан л даа. Энэ гоол бидэнд хүч өглөө. Бид олон боломж үүсгэсэн ч гоол оруулж чадсангүй. Бид илүү баг нь байж, олон боломж үүсгэлээ" гэв.