ХҮРЭНБАНДИЙН ЭГИЙМАА
/1958-2024/
Ард түмнийхээ дунд хилийн заставын хар нүдэн бүсгүй хэмээн дуудуулж, дуунд мөнхөрсөн Хүрэнбандийн Эгиймаа 2024 оны зургадугаар сарын 18-ны өдөр өвчний улмаас таалал төгсч, гэр бүл, үр хүүхэд, төрөл төрөгсөд бидэнд хүнд гарз тохиолоо. Тэрээр 1958 онд Дундговь аймгийн Эрдэнэдалай суманд айлын том охин болж мэндэлсэн. Х.Эгиймаа нь амьдралынхаа ихэнх цаг хугацааг эх орныхоо дархан хилийг манах үйлсэд зүтгэж, хилчдийн үр хүүхдийг сурган хүмүүжүүлэх ариун үйлсэд зориулсан нэгэн. Дорноговь аймгийн Сулинхээрийн хилийн заставын дарга Дамдины Энхжаргалтай танилцаж, таван хүүхдийн ээж болсон билээ.
Х.Эгиймаа нь 1993 онд нөхрөө даган Сэлэнгэ аймгийн Монгол Улсын баатар Ж.Нэхийтийн нэрэмжит хилийн цэргийн 0101 дүгээр ангийн төвд шилжин очиж, Сэлэнгэ аймгийн Сүхбаатар сумын Т.Бумцэндийн нэрэмжит улсын тэргүүний нэгдүгээр сургуульд бага ангийн багшаар ажиллаж, хилчдийн үр хүүхдийг сурган хүмүүжүүлэх ариун үйлсэд 1993-2013 он хүртэл ажиллаж байгаад гавьяаныхаа амралтад гарсан. Түүний энэ гавьяаг нь төр засгаас үнэлж, Хөдөлмөрийн хүндэт медаль, Монгол Улсын Боловсролын тэргүүний ажилтан цол тэмдэг, Боловсрол, шинжлэх ухааны яамны жуух бичиг, Багшийн алдар, Ахлах багш, аргазүйч багш, Багшийн гавьяаны одон, Боловсрол 90, 100 жилийн ойн медалиар шагнажээ.
Тэрээр амьдралын гүн их ухаантай, хөдөлмөрч хичээнгүй, шудрага шулуун, тусархаг зөөлөн сэтгэлтэй хүн байлаа. Хайрт ээж Х.Эгиймаа таны минь гэгээн дүр төрх бидний зүрх сэтгэлд үүрд оршиж, мөнхөд дурсах болно.
Ум сайн амгалан болтугай
Үр хүүхэд, ач зээ нараас нь:
Холбоотой мэдээ