Евро 2024 тэмцээний тав дахь өдрийн тоглолтууд өнөөдөр/2024.06.18/ үргэлжилнэ.

ТУРК – ГҮРЖ /00.00 цаг/

Цагтаа Байерн Мюнхен болон Францын шигшээд тоглож явсан дасгалжуулагч Уилли Санолын удирдлага дор Гүржийн шигшээ баг анхны томоохон тэмцээндээ оролцох гэж байна. Тэдний эхний өрсөлдөгч Винченцо Монтеллагийн Туркийн шигшээ. Гүржийн сүүлийн үеийн форм харьцангуй сайн байгаа бол Турк эсрэгээрээ тун тааруу тоглож буй.

Туркийн шигшээ баг энэ Еврод залуу бүрэлдэхүүнтэй ирсэн. Тэдний ахлагч нь Интер Миланы од Хакан Чалханоглу. Тэдний төвийн хамгаалалт санаа зовоож байгаа ч Бариш Йылмаз, Арда Гулер, Кенан Йылдыз зэрэг довтолгооны залуустаа итгэл хүлээлгэж байна. Харин Гүржид туршлагатай хаалгач Жоржи Лориа, саяхан Европыг байлдан дагуулсан Кварацхелия байна.

Гэхдээ Жоржи Лориа шийтгэлийн улмаас энэхүү тоглолтод оролцохгүй.

Тоглолтын өмнө Туркийн дасгалжуулагч Винченцо Монтелла "Германд олон үзэгчийн өмнө тоглоно гэдэг нэр төрийн хэрэг. Гүржийн талаар хэлэхэд хэцүү баг. Тэд үнэхээр урам зоригтой байгаа. Амаргүй тоглолт байх болно. Тиймээс бид хүлээцтэй, зохион байгуулалттай байх болно. Бид бага залуу наснаасаа л хөлбөмбөг тоглож, тэр хүсэл тэмүүлэл нь олон жил үргэлжилдэг. Бид энд мөрөөдлийнхөө төлөө ирсэн. Мөрөөдлөө биелүүлж, бүхнээ зориулахад бэлэн" гэжээ.

Гүржийн дасгалжуулагч Уилли Санол "Энэ бидний эхний тоглолт. Мөн Туркийн эсрэг анх удаа тоглох гэж байна. Туркийг биднээс илүү дарамттай байгаа гэж бодож байна. Туркийн давуу талын талаар яривал их зүйл бий. Учир нь тэдэнд гайхалтай авьяастай сайн тамирчид байна. Бидэнд ч хүнд сорилт байх болно. Эрхийн төлөөх нэмэлт тоглолтын дараа зарим тамирчид хэвийн амьдралдаа ороход хэцүү байсан. Учир нь тэд мөрөөдлөөрөө амьдарч байлаа. Энэ мөрөөдөл бодит цэг дээр очиж төгсөх ёстой. Бид дахин эхлэхэд бэлэн байна" гэв.

ПОРТУГАЛ – ЧЕХ /03.00 цаг/

Португал, Чех хоёр Еврогийн тайзнаа дөрөв дэх удаагаа учраа таарч байна. Анх 1996 онд учраа таарахад Чех хожиж байсан бол 2008 болон 2012 онд Португал хожсон түүхтэй. Кристиано Роналдо ч Чехийн эсрэг гоолдох дуртай. Харин Чехийн довтлогч Патрик Шик өнгөрсөн Еврогоор ямар гайхалтай байсныг та бүхэн санаж байгаа биз.

Евро 2020 тэмцээний мэргэн буучаар Роналдо болон Шик нар таван гоолтой шалгарч байв.

Чехийн сүүлийн үеийн форм гайхалтай байгаа. Тэд таван тоглолт дараалан ялаад байна. Харин Португал ойрхон хоёр хожигдлыг амссан. Португалын шигшээ баг дотоод уур амьсгал сайтай байгааг эх сурвалжууд магтаж байна. Харин Чехийн шигшээ Рафаэль Леаог хэрхэн зогсоох аргаа эрэлхийлсээр байгаа аж.

Португалын шигшээ баг, Роналдогийн бэлтгэлийг үзэх гэж 50 мянган хүн ханджээ. Гэвч ердөө таван мянган тасалбар л худалдаанд гарсан гэнэ.

Португалын ахлах дасгалжуулагч Роберто Мартинез "Чехийн тоглолтын арга барил ойлгомжтой. Эрсдэл үүрч, гоол оруулах дуртай тамирчдаараа тоглолтын турш шахна. Тэд хожихын төлөө талбайд гарах нь дамжиггүй. Үзэгчдэд гайхалтай тоглолт толилуулах байх. Манай хэсгийн багууд сайн хандлагатай, хүчирхэг бүрэлдэхүүнтэй. Бид арван тоглолтод ялсан ч энэ бол тэмцээн. Хэсгийн гурван тоглолтдоо хамгийн сайн тоглолтоо үзүүлэх болно" гэв.

Чехийн дасгалжуулагч Иван Хашек "Португалын тамирчид дэлхийн шилдэг клубуудэд тоглодог. Тэд энэ тоглолтод фаворитоор орно. Гэхдээ бид ялахыг хүсч байна. Бүгд л Роналдогийн талаар мэднэ. Тоглолтын дараа түүний эсрэг тоглолоо гэх бус түүнийг хожлоо гэж яримаар байна. Португал хамгаалалт, довтолгоондоо чанартай баг. Бид тэднийг дутуу үнэлэхгүй. Тэдний талаар сайн мэднэ. Тиймээс баг дээрээ улам анхаарах хэрэгэтй" гэжээ.