Евро-2024 тэмцээний хоёр дахь өдрийн тоглолтуудын тоймыг та бүхэндээ хүргэе.

УНГАР 1 – 3 ШВЕЙЦАРЬ

Евро эхлэхээс өмнө Унгарын шигшээ багийг битүү морьд гэж бодсон хүн олон. Арга ч үгүй. Ирландад эцсийн мөчид хожигдохоосоо өмнө 16 дараалан хожигдоогүй явсан. Харамсалтай нь, өчигдөр хэсгийн эхний тоглолтдоо дэндүү хангалтгүй тоглож, Швейцарийн шигшээг барсангүй. Багийнх нь гол хүн Доминик Собослаи ч бэлэн биш байгаа нь харагдав.

Эхний гоолыг Швейцарийн шигшээгээс Дуа оруулж, багтаа тэргүүллийг авчирсан. Унгарын довтолгоо, хамгаалалт нэгдүгээр үед үнэхээр учраа олоогүй. Үүнийг нь ч Швейцарь овжин ашиглаж, нэгдүгээр үеийн төгсгөлд Абишейр ганган цохилтоор тооны харьцааг 2-0 болгов.

Хоёрдугаар үед Унгар өөр тоглолтыг үзүүлж, Барнабаш Варгас ганган мөргөж, тооны харьцааг ойртуулсан. Хэсэг сэргэсэн Унгарын тоглолт дахин гоол оруулсангүй. Швейцарийн довтолгооны сэлгээ өгөөжөө өгч, Брийл Эмболо гоол оруулснаар 3-1 гэсэн харьцаатай эхний тоглолтдоо хожлоо.

Тоглолтын дараа Швейцарийн дасгалжуулагч Мурат Якин "Би хөлбөмбөгийг шатартай адилтгадаг. Өнөөдөр бид зөв тактикаа ашиглалаа. Бид энэ тактикийг өмнө нь ч ашигласан. Бид эхний хагаст өөрсдийгөө давуу байдлаа чадавхжуулж, өрсөлдөгчөө хүнд байдалд оруулахыг хүссэн" гэв.

Харин Унгарын хамгаалагч Адан Ланг "Эхний хагаст Швейцарь бүрэн илүүрхсэн. Бид тэдэнд бодох дэндүү их хугацаа, шийдвэр гаргах зай өгчихлөө. Илүү эхлэх, тэдний хүссэн 45 минутыг өгчихлөө. Тоглолт 2-0 болоход улам эрсдэл гаргах шаардлагатай болсон. Тиймээс л бид хоёрдугаар хагаст сайн тоглолоо" гэжээ.

ИСПАНИ 3 – 0 ХОРВАТ

Ла Роха буюу Испанийн шигшээ баг эхний тоглолтоо мэдэгдэл хийлээ. Тэд эхний хагаст л Хорватыг учрыг олов. Ингэхдээ Алваро Мората, Фабиан Руйз, Дани Гарвахаль нар гоол оруулж, эхний ялалтаа авчээ.

Испанийн залуу авьяастан Ламине Ямаль Еврогийн түүхэнд хамгийн залуудаа буюу 16 нас 338 хоногтойдоо гараанд гарсан тоглогч болов. Сонирхуулахад, тэрбээр Еврогийн хажуугаар зуны даалгавраа хийх гэнэ.  Ямаль ч Хорватын эсрэг гангарч, Гарвахалийн гоолын дамжуулалтыг өгсөн. Барселона, Реалын тамирчид хэзээнээсээ шигшээдээ гар нийлдэг уламжлалтай.

Хоёрдугаар үед Хорватын шигшээд гоол оруулах сайхан боломж гарч ирсэн. Родри торгуулийн талбайд Петкович дээр алдаа гаргаж, шар хуудас хүртсэн. 100 хувийн гоолын боломжийг үгүй хийсэн Родрид шар хуудас өгсөнд олон хүн гайхаж буй. Угтаа улаан хуудасны алдаа гэж олон хүн шүүгчийг шүүмжилж байна. Бруно Петкович торгуулийн цохилтыг гүйцэтгэсэн ч алдчихсан. Ийнхүү үүнээс хойш онц зүйл тохиосонгүй, тоглолт өндөрлөсөн.

Тоглолтын шилдгээр шалгарсан Фабиан Гуйз "Хамгийн чухал нь бид хожлоо. Гоолын дамжуулалт өгөх нь чухал байсан ч гоол оруулсандаа баяртай байна. Баг маань сайн тоглолоо гэж бодож байна. Бид хүссэн зүйлээ хийж, сайн ажиллалаа. Багаараа бүхий л төлөвлөсөн зүйлсээ хийлээ. Энэ л чухал" гэв.

Тэгвэл Хорватын ахлагч Лука Модрич "Энэ бол бидний хүлээж байсан үр дүн биш ээ. Гэхдээ эвлэрэх хэрэгтэй. Бидэнд сайжрах хоёр тоглолт үлдлээ. Эхний хагаст бид өөрсдийнхөөрөө тоглож чадсангүй. Эрч хүч дутаж, Испаниас хол дутуу тоглолоо. Тэд биднийг шийтгэлээ" гэжээ.

ИТАЛИ 2-1 АЛБАНИ

Үхлийн хэсгийн үлдсэн тоглолт бас л үзүүштэй боллоо. Тоглолт эхлээд удаагүй байхад Италийн хамгаалагч Димаркогийн болчимгүй алдааг Албанийн Бажрами шийтгэж, Албани илүү гарсан. Түүний гоол Еврогийн түүхэн дэх хамгийн хурдан гоол болжээ. Дортмундад чуулсан Албанийн фэнүүд жинхэнэ утгаараа галзуурсан.

Гэхдээ галзуурал удаан үргэлжилсэнгүй. Италиас Бастони, Барелла нар таван минутын зайтай гоолдож, хүчтэй нь хүчгүйгээ "идэв". Тоглолтын төгсгөлд Албанид тэнцүүлэх боломж гарч, Манажийн хурц өнцгөөс цохисон бөмбөгийг Донарумма хааж, багаа аврав.

Италийн ахлах дасгалжуулагч Лучано Спаллетти "Дасгалжуулагч болсноосоо хойш би нэг л зүйлийг хэлж байгаа нь хожих л чухал. Түүнээс биш хэрхэн тоглосон нь биш. Энэ Еврод түрүүлэхийн тулд бид сайн хөлбөмбөгийг толилуулах хэрэгтэй. Эхний үед бид жаахан сууж тоглосноос болж, Албанийн тамирчдыг бие хүчээ ашиглаж, тоглолтоо гаргах боломж өгчихлөө. Бид өөрсдийн хэв маягаараа л тоглох хэрэгтэй. Энэ л биднийг урагш хөтөлнө" гэв.

Харин Албанийн дасгалжуулагч Сильвинио "Бид эхэлж гоол оруулж, тоглолтыг сайн эхлүүлсэн. Гэвч тоглолтоо удирдаж чадсангүй. Гоолын дараа баг урамшиж, эрч хүчтэй байлаа. Гэвч бүрэн төгс гүйцэтгэл үзүүлж чадсангүй. Ялангуяа эхний хагаст. Хоёрдугаар үед өмнөхөөсөө сайн байсан. Манаж хүртэл сайхан боломж гаргасан" гэжээ.