Хятадад өнгөрсөн бямба гаригаас эхлэн далайн тээврийн шинэ журам хүчин төгөлдөр болжээ. Энэ нь тус улсын усан хилд хууль бусаар нэвтэрсэн гэж үзэж буй гадаадын иргэдийг баривчлах шинэ эрх мэдлийг эргийн хамгаалалтынханд олгож байна. Мөн хил нэвтэрсэн сэжигтнүүдийг 30 хоног, нарийн төвөгтэй асуудал үүсгэсэн тохиолдолд 60 хүртэл хоног баривчлах боломжтой.

Эрх баригчид 2021 онд батлагдсан хуулийн дагуу эргийн хамгаалалтад зэвсэг хэрэглэхийг зөвшөөрсөн бол одоо баривчлан, хорих эрх олголоо. Энэхүү шинэ журмыг Филиппин улс буруутгаж, Бээжин Өмнөд Хятадын тэнгист хяналтаа бэхжүүлэх гэж оролдож байна гэж үзэв. Учир нь тус хоёр улсын газар нутгийн маргаан үргэлжилж буй. Өнгөрсөн сард Филиппиний ерөнхийлөгч  Фердинанд Маркос Жуниор Хятадын төлөвлөгөөг "бүрэн хүлээн зөвшөөрөх боломжгүй" гэж мэдэгдсэн юм. Үүнээс улбаалан АНУ-ын Энэтхэг-Номхон далайн командлалын албаны хүмүүс хурцадмал байдал улам хурцдаж болзошгүйд санаа зовж байгаагаа илэрхийлэв.

Японы засгийн газар бусад орны хууль ёсны ашиг сонирхолд хохирол учруулахгүйн тулд Хятадын тэнгисийн үйл ажиллагааг анхааралтай ажиглана. Батлан ​​хамгаалахын судалгааны үндэсний хүрээлэнгийн шинжээч Масуда Масаюки хэлэхдээ, Хятад улс удахгүй Өмнөд болон Зүүн Хятадын тэнгист хяналтаа тогтооно. Мөн Окинава муж дахь Сенкаку арлуудад хууль сахиулах үйл ажиллагаагаа эрчимжүүлж магадгүй гэжээ. Хятад улс нээлттэй тулаан хийхгүйгээр саарал бүс гэгдэх тактикаа өргөжүүлж магадгүй гэж Масуда үзэж байна.

Эх сурвалж: NHK Japan