Армени улс Орос тэргүүтэй Хамтын аюулгүй байдлын гэрээний байгууллагаас гарна гэж Лхагва гаригт мэдэгджээ. Тус эвлэл нь Арменийн ширүүн өрсөлдөгч Азербайжантай нийлж, өөрсдийнх нь эсрэг дайн эхлүүлэхийг санаархаж байна гэж ерөнхий сайд Никол Пашинян хэлсэн байна. Пашинян олон сарын өмнөөс Арменийг дахин сэргэж буй Азербайжаны түрэмгийллээс хамгаалж чадаагүй гэж Хамтын аюулгүй байдлын гэрээний байгууллагыг буруутгасан. ОХУ илүү их аюулгүй байдлын баталгаа өгөхгүй бол эвслээс гарна, АНУ, Европын холбоотой илүү ойр байна гэж тэр сүрдүүлж байна.

ЗХУ задран унаснаас хойш Армени, Азербайжан улсууд салан тусгаарласан Уулын Карабах бүс нутгийн төлөө хоёр удаа дайтсан. Азербайжан өнгөрсөн оны есдүгээр сард болсон тулааны үеэр бүс нутгийг өөртөө эргүүлэн авчээ. Энэ үеэр Оросын энхийг сахиулагчид арменичуудыг хангалттай хамгаалаагүй, урвасан мэт санагдаж байна гэж иргэд ярьжээ.

ОХУ уламжлал ёсоор Арменитай холбоотон байсан ч дээрх хэрэг явдлаас болоод сүүлийн саруудад тэдний харилцаа муудсан. Эсрэгээрээ ОХУ, Азербайжаны харилцаа гүнзгийрсэн гэж үзэж байна.

Пашинян парламентын гишүүдэд хандан үг хэлэхдээ "Манай улс Хамтын аюулгүй байдлын гэрээний байгууллага дахь оролцоогоо царцаасан. Өөрсдийн хүссэн цагтаа эвлэлээс гарна. Бид хэзээ явахаа шийднэ. Гэхдээ буцахгүй. Эвслийн гишүүд гэрээгээр хүлээсэн үүргээ биелүүлэхгүй байхын зэрэгцээ Азербайжантай бидний эсрэг дайн хийхээр төлөвлөж байна" гэжээ.

"ОХУ-ын аюулгүй байдлын баталгаа нь хоосон амлалт. Барууныхан ч үг хэллэгээс өөр дэмжлэг үзүүлэхгүй байна" гэж Пашинян үзэж байна.

Азербайжаны ерөнхийлөгч Илхам Алиев "Уулын Карабахыг эргүүлэн авах нь ерөнхийлөгчийн хувиар өөртөө тавьсан ариун зорилго" гэж хэлжээ. Улмаар Арменийн тал дөрөвдүгээр сард хилийн дөрвөн тосгоныг Азербайжанд буцааж өгөхөөр тохиролцсон нь энхийн хэлэлцээрт хүрэх томоохон алхам гэж хоёр улс тодорхойлсон юм. Сүүлийн үеийн ахиц дэвшилд хүч нэмж, Пашинян Лхагва гаригийн мэдэгдэлдээ "сарын дотор энхийн гэрээ байгуулахад бэлэн" гэж дурджээ. Гэвч Пашиняны буулт дотоодын дургүйцлийг өдөөж, жагсаал хүртэл болсон.

Эх сурвалж: CNN