Хамаст барьцаалагдсан 120 хүний хувь заяа гал зогсоох сунжирсан хэлэлцээр, цуст мөргөлдөөний тоглоом болжээ. Хамасын өндөр албан тушаалтан "CNN" агентлагт өгсөн ярилцлагынхаа хүрээнд "Израилийн барьцаалагдсан хүмүүсийн хэчнээн нь амьд байгааг хэн ч мэдэхгүй" гэж хэлжээ. Мөн гал зогсоох хэлэлцээр хийх бол Израилийн хүчин Газын зурвасаас гарах баталгаа байх ёстой гэв.

Хамасын хэвлэлийн төлөөлөгч, улс төрийн товчооны гишүүн Осама Хамдан "CNN"-д өгсөн ярилцлагадаа гал зогсоох хэлэлцээр зогсонги байдалд орсон, зэвсэгт бүлэглэлийн байр суурь, палестинчуудын амиа алдагсдын тоо болон Хамас Израиль руу довтлох шийдвэр гаргасандаа харамсаж байгаа эсэх талаар ярьжээ. Хамданы хувьд өнгөрсөн долоо хоногт АНУ-ын ерөнхийлөгч Жо Байдены мэдээлсэн Израилийн гал зогсоох төлөвлөгөө нь Хамасын шаардлагыг хангахгүй байна.

Тэрбээр "Газын зурвасаас цэргээ татаж, гал зогсоох төлөвлөгөөнд Израилийн тодорхой байр суурь хэрэгтэй байна. Тэдний эцсийн шийдвэрээс шалтгаалж палестинчууд өөрсдийн ирээдүйгээ тодорхойлж чадах эсэх нь хамаарна. Бид бүх зүйлд бэлэн байна. Хоригдлуудыг мөн адил шударга тогтолцоотойгоор суллах хэрэгтэй" гэжээ.

АНУ-ын зуучлагчид Израилийн дэмжсэн саналыг Хамаст хүргүүлснээс 12 хоногийн дараа тус бүлэг хариу өгсөн. Гэхдээ Израилийн тал мөн адил хэлэлцээрт тодорхой байр суургүй байна. Израилийн ерөнхий сайд Нетаньху дайныг зогсоох бол өөрийн эрх мэдлээ алдах эрсдэлтэй тулгарч байгаа юм. Хамасын хувьд гал зогсоосон ч Израилийн тал түрэмгийллээ зогсоохгүй гэж санаа зовниж байгааг Хамдан онцолжээ.

Хамдан ""Израильчууд зөвхөн зургаан долоо хоногийн турш гал зогсоохыг хүсч байгаа. Дараа нь тэд тэмцэлдээ буцаж орохыг хүсч байна. Миний бодлоор америкчууд өнөөг хүртэл израильчуудыг байнгын гал зогсооход хүлээн зөвшөөрөөгүй" гэв.

Эх сурвалж: CNN