"Азийн инноваци соёлын форум 2024" Чингис хаан үндэсний музейд өнөөдөр /2024.06.13/ зохион байгуулагдаж байна. Форумд Монгол, Япон, Хятадын соёл, технологийн мэргэжилтнүүд, Япон улсын хамгийн том "NFT" арилжааны систем "rakuza.io"-ийн үүсгэн байгуулагч Кай Яошиказу, тоглоом хөгжүүлэлтийн "JP Games" компанийн гүйцэтгэх захирал Хажиме Табата, Хонгконгийн Политехникийн их сургуулийн судлаач Ли Минг нар оролцон илтгэл тавьж, соёлын үнэт зүйлсийг орчин үеийн арга технологиор сурталчлан таниулах арга туршлагаасаа хуваалцаж, сонирхолтой илтгэлүүд тавих юм.

Монгол Улсын соёлын салбарын шинэ сэргэлтийн бодлогын хүрээнд сүүлийн хоёр жилийн хугацаанд 10 цахим системийг хөгжүүлэн хүлээн авч хэрэглээнд нэвтрүүлээд байна.

Мөн соёлын салбарыг эдийн засгийн бие даасан салбар болгон хөгжүүлэх зорилтын хүрээнд Соёлын бүтээлч үйлдвэрлэлийг дэмжих тухай хуулийг саяхан УИХ-аар батлуулжээ. Засгийн газрын 2022 оны 314 тогтоолоор Соёлын бүтээлч үйлдвэрлэлийн тэргүүлэх зургаан чиглэлийн нэгд дижитал контент, тоглоом хөгжүүлэлтийг төрөөс бодлогоор дэмжих тухай тусгагдсан бөгөөд соёлын өвийн нөөцийг техник технологийн дэвшилтэй хослуулан соёлын үйлдвэрлэлийг хөгжүүлж, улмаар дэлхийд өрсөлдөх бүтээгдэхүүн төрөх боломж нэмэгдэнэ хэмээн үзэж буй.

Монгол Улсын Засгийн газар 2020 онд Соёлын яамыг шинээр байгуулсан байдаг. Үүнээс шалтгаалан сүүлийн жилүүдэд өв соёлд ээлтэй жилүүд өрнөж байна. Тэгвэл одоо технологиор дамжуулан соёлын өвийг дэлхийд сурталчлах том амбицтай ажлыг эхлүүлжээ.

ЮНЕСКО-д бүртгэгдсэн Монголын өв

• 2008 он Морин хуур хөгжмийн уламжлалт урлаг
• 2008 он Монгол ардын уртын дуу
• 2009 он Монгол тууль
• 2009 он Монгол цуур хөгжмийн уламжлалт урлаг
• 2009 он Монгол бий биелгээ, уламжлалт бүжгийн урлаг
• 2010 он Монгол наадам
• 2010 он Монгол ардын Хөөмэйн урлаг
• 2010 он Шувуучлахуй буюу бүргэдээр ан хийх зан үйл
• 2011 он Монгол Лимбэчдийн уртын дуу тоглох уламжлалт арга барил –битүү амьсгаа
• 2011 он Алтан товч
• 2011 он Монгол Данжуур
• 2013 он Монгол гэрийн уламжлалт урлал, зан үйл
• 2013 он Монгол уран бичлэг
• 2014 он Шагайн харваа
• 2015 он Ботго авахуулах зан үйл
• 2017 он Уул овоо тахих зан үйл
• 2019 он Хөхүүрийн айраг исгэх уламжлал, холбогдох зан үйл