ЗХУ, /хуучнаар/ ОХУ-ын сургууль төгсөгчдийн сагсан бөмбөгийн аварга шалгаруулах тэмцээн энэ сарын 22-24-ний өдрүүдэд Спортын төв ордонд болох гэж байна. Сагсан бөмбөгийн “Мөнгөн цагариг” клубээс хоёр дахь жилдээ санаачлан зохион байгуулж буй тус тэмцээнд ЗХУ, ОХУ-д их, дээд сургууль, техникум, тусгай болон техник мэргэжлийн сургуулийг дүүргэсэн үе үеийн төгсөгчид оролцож, сагсан бөмбөгийн спортоор өрсөлдөх юм. Өнгөрсөн жил болсон анхдугаар тэмцээнд 40 гаруй багийн 500 гаруй тамирчид оролцсон бөгөөд энэ жил тэмцээний цар хүрээ улам өргөжих төлөвтэй байна. Мөн энэ жилийн тэмцээнд Ерөнхий сайд Сү.Батболд, Сангийн сайд С.Баярцогт, УИХ-ын гишүүн Ч.Сайханбилэг, Ц.Мөнх-Оргил, Л.Гүндалай зэрэг ЗХУ, ОХУ-д сургууль дүүргэсэн үе үеийн төгсөгчид оролцохоор бэлтгэлдээ гараад байгаа гэнэ.

Тэмцээний нээлтийн ажиллагаанд Монголд суугаа ОХУ-ын элчин сайд Б.А.Говорин оролцох ажээ. Мөн Монгол Улсын Ерөнхийлөгч Ц.Элбэгдорж ч ЗХУ-д сургууль дүүргэсэн учир тус тэмцээний нээлтийн ажиллагаанд урилгаар оролцох бололтой.

С.Цэлмэг