Өмнөд Солонгос улсад үйлдвэрлэдэг "Buldak" бэлэн гоймонгийн гурван төрлийг Дани улсад худалдаанаас эргүүлэн татах болов. Халуун ногоотой бэлэн гоймон идэх цахим чэлленжээр од болоод буй "Hot Chicken Ramen 3x Spicy", "Hot Chicken Ramen 2x Spicy", "Hot Chicken Stew" төрлүүд нь хүмүүсийг хордуулж ч мэдэхээр халуун ногоо ихтэй байна гэж Данийн Мал эмнэлэг, хүнсний газар үзжээ. Тэдгээр гоймонгийн найрлага дахь капсаицин нь халуун чинжүүнд агуулагддаг халуун ногоотой бодис юм.

Ямар нэгэн онцгой хэрэг энэ гоймонгоос болж гарсан эсэхийг Мал эмнэлэг, хүнсний газар тодорхой мэдээлээгүй. Хэрэглэгчид хэрвээ энэ гоймонг худалдаж авсан бол анх авсан газартаа буцааж өгөхийг тус байгууллага зөвлөжээ.

Харин энэ талаар үйлдвэрлэгч "Samyang" групп мэдэгдэхдээ "Бүтээгдэхүүнүүдийг эргүүлэн татсан нь чанартай огт хамаагүй. Асуудал үүсгэж мэдэхээр халуун ногоотой байгаатай холбоотой. Ийм шалтгаанаар гоймонгоо эргүүлэн татсан анхны тохиолдол болж байна" гэжээ.

Бэлэн гоймонг Японоос гаралтай, Өмнөд Солонгосоос гаралтай гэж маргадаг. Өмнөд Солонгос улс дайны дараа ядууралд нэрвэгдэх үед буюу 1963 онд анхны бэлэн гоймонг бид үйлдвэрлэсэн гэж "Samyang" групп мэдэгддэг аж. Өдгөө "Samyang" групп нь Өмнөд Солонгосын гурав дахь том үйлдвэрлэгч болсон. 2022 оны борлуулалтын дүнгээрээ "Ottugi", "Nongshim" брэндүүд тэргүүлжээ.

"Buldak" гэдэг үг нь солонгосоор "халуун ногоотой тахиа" гэсэн утгатай. Тус гоймонг "Samyang" группийн гүйцэтгэх захирал Ким Жун-Сүү анх санаачилсан гэдэг. Халуун ногоотой хуурганаас санаа авч энэ гоймонг зохиосон гэж тэрбээр "The Wall Street Journal"-д ярилцлага өгөхдөө хэлжээ. "Buldak" гоймонг амт шалгагч Сковиллийн хэмжүүрээр шалгаж үзэхэд 4000 орчим оноо авсан байна. Энэ нь халапено чинжүүтэй ойролцоо гэсэн үг юм. Зарим шинэ төрөл нь үүнээс 2, 3 дахин халуун ногоотой ч байж магадгүй аж.

Эх сурвалж: CNN