Баянхонгор аймгийн Баянлиг сум Хатан суудал багийн “Жаргалант” хороолол болон ‘’Адуучийн хороо’’ гэдэг газар  өчигдөр /2024.06.12/ 19.00 цагийн орчимд 18-20 м/с хүртэл хүчтэй түр зуурын шороон шуурга шуурсны улмаас хоёр өрхийн гэр нурж, эвдэрсэн байна.

Шуурганд иргэн Б-ын таван ханатай нэг гэр, Н-ын дөрвөн ханатай нэг гэр нурж, ашиглах боломжгүй эвдэрсэн тухай мэдээллийг тус сумын Засаг дарга аймгийн Онцгой байдлын газарт мэдээлжээ.

Түүнчлэн, Өмнөговь аймгийн Булган суманд өчигдөр 21:00 цагийн орчимд 20 м/с хүртэл хүчтэй түр зуурын шороон шуурга шуурсны улмаас зургаан гэр нурсан тухай мэдээлэл иржээ. Шуурганд малчин Д-ийн таван ханатай нэг гэр, дөрвөн ханатай нэг гэр, Б-ийн таван ханатай нэг гэр, дөрвөн ханатай нэг гэр, Э,  Н нарын дөрвөн ханатай хоёр гэр нурсан тухай мэдээллийг аймгийн Онцгой байдлын газарт мэдээлсэн байна.

Өнөөдөр ихэнх нутгаар солигдмол үүлтэй. Баруун болон төвийн аймгуудын нутгийн зарим газар, зүүн аймгуудын нутгийн хойд хэсгээр бороо, дуу цахилгаантай аадар бороо орно. Салхи нутгийн зүүн өмнөд хэсгээр баруун өмнөөс хойш эргэж, бусад нутгаар баруун хойноос 6-11 м/с, борооны өмнө түр зуур ширүүснэ.

Зургадугаар сарын 14-нд баруун аймгуудын нутгийн зүүн, зүүн аймгуудын нутгийн хойд хэсэг, төвийн аймгуудын нутгийн зарим газраар, зургадугаар 15-нд баруун болон зүүн аймгуудын нутгийн зарим газраар, 16-нд баруун аймгуудын нутгийн хойд, төвийн аймгуудын нутгийн баруун, зүүн аймгуудын нутгийн зүүн хэсгээр, 17-нд баруун аймгуудын ихэнх нутаг, төвийн аймгуудын нутгийн баруун хэсгээр бороо, дуу цахилгаантай аадар бороо орно. Салхи ихэнх хугацаанд 6-11 м/с, нутгийн зарим газраар борооны өмнө түр зуур ширүүснэ.

Ийм иргэд та бүхнийг ус цаг уурын гаралтай аюулт үзэгдэлээс сэрэмжлүүлж байна.