АНУ-ын ерөнхийлөгч Жо Байдены хүү Хантер Байден галт зэвсэг эзэмшсэн хэргийн шүүх хурал дууслаа. Ерөнхийлөгч Байден "шүүхийн шийдвэрийг хүндэтгэнэ" гэж мэдэгджээ.

Тангарагтны шүүх 54 настай Хантер Байденыг 2018 онд гар буу худалдан авч байхдаа мансууруулах бодис хэрэглээгүй гэж худал мэдүүлсэн хэрэгт буруутай гэж үзжээ. Шүүхийн шийдвэр гарсны дараа тэрбээр шоронд хоригдох магадлалтай. Тус хэрэг ерөнхийлөгчийн хүүхдэд эрүүгийн хэрэг үүсгэсэн анхны тохиолдол боллоо. Ерөнхийлөгч Байден шүүх хуралд оролцоогүй ч тэргүүн хатагтай Жилл Байден зэрэг гэр бүлийн олон гишүүд тогтмол оролцдог байв. Хантер Байдены эхнэр, эгч, авга ах нар нь шүүх хурлын үеэр түүнийг дэмжихээр зарим тохиолдолд ирсэн. Ерөнхийлөгч Байден шүүхийн шийдвэр гарсны дараа Делавэр мужийн Вилмингтон руу нисч, хүүтэйгээ уулзсан байна.

“Би ерөнхийлөгч. Гэхдээ бас аав. Жилл бид хоёр хүүдээ хайртай. Одоо байгаа хүнээр нь бахархаж байна. Энэ хэргийн үр дүнг хүлээн зөвшөөрч, Хантер давж заалдах гомдлыг авч үзэх тул шүүх ажиллагааг үргэлжлүүлэн хүндэтгэх болно" гэж ерөнхийлөгч Байден хэлжээ. Прокурорууд Хантерыг буу худалдаж авахдаа мансууруулах бодис хэрэглэж байсныг нотлохыг оролдсон.

Шүүх хурал дээр хүүгийнх нь ичгэвтэр хэргүүд илчлэгдсэн тул түүнийг өршөөхийг бусдаас хүсэхгүй гэж Ерөнхийлөгч Байден өмнө нь мэдэгдсэн юм.

Тангарагтны шүүгчид Хантер Байдены хуучин эхнэр Кэтлин Бюлле, хуучин найз охин Зои Кестан болон найз нөхдийг нь гэрчээр дуудсан. Гэрчүүд бүгд түүнийг мансууруулах бодисын нөлөөнд тогтмол автдаг байсныг нотолсон байна. Шүүхийн шийдвэр нь Хантер Байдены зан байдал, бизнесийн харилцааг олон жил судалж байсан Конгресс дахь Бүгд найрамдах намынхан болон эрх мэдэлтнүүдийн дунд маргаан үүсгэв. Төлөөлөгчдийн танхимын хяналтын хорооны Бүгд найрамдах намын дарга Жеймс Комер  "Байденуудын авлигын нөлөөгөөр наймаалах схемд оролцсон бүх хүмүүсийг шалгах ёстой"  гэжээ. Үүний зэрэгцээ Трампийн сонгуулийн кампанит ажлын мэдэгдэлд "Байдены гэмт хэргийг далдлах гэсэн гэр бүлийн гэмт хэрэг" гэж дурджээ. Дональд Трамп мөн Байдены гэр бүлийг цахим хуудас дээрээ  буруутгасан байна. Конгресс дахь Ардчилсан намын гишүүд Бүгд найрамдах намын гишүүдийг "хоёр нүүртэй"  гэж буруутган, АНУ-ын шударга ёсны тогтолцоог магтан сайшаав.

Эх сурвалж: BBC