"Иран улс Хезболла болон Хамас зэрэг террорист бүлэглэлүүдэд ямар ч санхүүжилт олгоогүй. Учир нь улсынхаа ерөнхийлөгчийн бодлогоос болж Иран ядуурсан" гэж ерөнхийлөгч асан Дональд Трамп энэ жил удаа дараа мэдэгдсэн. Тэрбээр сүүлийн хоёр сарын турш улс төрийн кампанит ажлынхаа хүрээнд дээрх мэдэгдлийг хийсэн байдаг. Трампийн үзэж буйгаар, Иран хэтэрхий ядуу байсан тул террористуудыг санхүүжүүлээгүй. Мөн Трампийн засаглал 2020 онд дахин үргэлжилсэн бол Газын зурвас дахь дайн гарахгүй байсан гэж ярьжээ.

Гэхдээ түүний мэдэгдэл "ХУДАЛ" болохыг тогтоожээ. "CNN" агентлагийн дөрвөн шинжээч өнгөрсөн хугацаанд Иран болон бусад террорист бүлэглэлүүдийн үйл ажиллагааг судалсан. Тодруулбал, Иранд тавьсан цөмийн зэвсгийн хориг арга хэмжээ нь тус улсын эдийн засагт томоохон сөргөөр нөлөөлсөн нь үнэн. Гэхдээ Трампийн засаглалын үед Иран террорист бүлэглэлүүдэд санхүүжилт олгосон хэвээр байсан. Зөвхөн Трампийн засаглалын хоёрдугаар хагаст Иран санхүүжилтээ багасгасан байна.  Мөн Трампийн засаг захиргаа 2020 онд Иран улс террорист бүлэглэлүүдийг үргэлжлүүлэн санхүүжүүлж байна гэж мэдэгдэж байжээ.

Иранд тавьсан хориг арга хэмжээ нь террорист бүлэглэлийн санхүүг багасгасан гэж Трамп  шударгаар хэлж болох байсан . Үүний оронд тэрбээр хууль ёсны ажлыг хүртэл харлуулах замыг сонгосон гэж шинжээчид дүгнэжээ. АНУ, Израилийн судалгааны байгууллагуудын мэдээлснээр, Иран болон Хамасын санхүүгийн харилцаа 2017 онд хамгийн их сайжирсан байна. Тухайн үед Трамп ерөнхийлөгчөөр ажиллаад эхний хагас жилийн нүүрийг үзэж байсан. Түүний засаг захиргаа 2018 оны сүүлээр л Иранд хориг тавьж эхэлжээ. Мөн Трампийн томилсон Төрийн нарийн бичгийн дарга Майк Помпео 2020 онд Иран улс террорист бүлэглэлүүдийг үргэлжлүүлэн санхүүжүүлж байна гэж мэдэгдсэнээр бүх зүйлийг нотолжээ.

"Иран гаднаас санхүүжилт хүсч, дотооддоо зовж байгаа. Гэвч улсынхаа нөөцийг Израилийг сүрдүүлэхийн тулд Ливан дахь Хезболла, Иракийн Шиа бүлгүүдийг санхүүжүүлж байна. Тэд олон жилийн турш, түүхэндээ хүртэл иргэдийнхээ зовлонг үл тоон террористуудыг үргэлжлүүлэн санхүүжүүлсэн, санхүүжүүлсээр байна" гэж Помпеогийн 2020 онд өгсөн ярилцлага Төрийн департаментын цахим хуудсанд нийтлэгдсэн байна. Тухайн үед Помпео Израильд айлчилсан ба Трампийн засаг захиргаа Иранд тавьсан хориг нь амжилттай болсон ч зарим зүйлсийг дараа нь шийдвэрлэнэ гэж хэлж байсан. Тиймээс Ираны Хезболла болон Хамас бүлэглэлийн санхүүжилт Трампын үед хэзээ ч алга болоогүй байсныг тогтоосон аж.

Эх сурвалж: CNN