17 дахь удаагийн Европ тивийн хөлбөмбөгийн аварга шалгаруулах тэмцээн Герман улсад нээлтээ хийхэд ердөө хоёрхон өдөр үлдлээ. "Европын зүрхэнд нэгдье" уриатай энэ удаагийн Евро олон зүйлээрээ онцлог болж байна. Таван тэрбум үзэгч татна гэгдэж буй ирэх Евро эдгээр домгуудын сүүлийн бүжиг байх болно.

Лука Модрич (38) – Хорват

Бага насандаа дайны гашуун зовлонг туулж, хөлбөмбөгчин болох өгөгдөлгүй гэгдэж байсан алтан бөмбөгийн эзэн Лука Модрич тав дахь Евродоо оролцох гэж байна. Хэдхэн сарын өмнө зодог тайлах тухай бодож байсан тэрбээр эцэст нь Реал Мадридтай гэрээгээ нэг жилээр сунгаж чадсан. Түүний форм, бэлтгэлжилт, бие бялдар урьдынх шигээ нөлөөтэй байгаа учир Хорватын шигшээ багийнхаа гол хүн байх болно. Хорватын уураг тархи тэрбээр 2008 оноос хойш Еврогийн 13 тоглолтод оролцож, гурван гоол оруулжээ.

Оливер Жиру (37) – Франц

Францын довтолгооны шугамыг олон жил дааж буй Жиру ирэх Евро үдэлтийнх байх болно гэдгээ зарлачихсан. Бүр Европын хөлбөмбөгийг орхиж, Америкийг зорихоор гэрээ байгуулжээ. Тэр ч утгаараа ирэх тэмцээнд түрүүлж, амар сайхандаа жаргах санаатай байна. Тэрбээр Еврогийн 11 тоглолтод гурван гоол оруулж, 2016 онд нутаг дээрээ аман хүзүүдэж байв.

Кристиано Роналдо (39) – Португал

Дахин давтагдашгүй, цорын ганц Кристиано Роналдог энэ жагсаалтад орсон байгааг харах гунигтай байгаа нь лавтай. Хэдий Европын хөлбөмбөгийг орхисон ч Саудын Арабд өнгөрүүлсэн багагүй хугацаандаа олон рекорд эвдэж, гоолын бороо оруулсаар байна. Роберто Мартинез ч түүнийг эргэлзэхгүй шигшээ багт дуудсан. 2016 оны Еврогийн аварга Роналдо нийт таван Еврогийн 25 тоглолт, хоёр финалд 14 гоол оруулж, есөн гоолын дамжуулалт өгчээ.

Тони Кроос (34) – Герман

Германы шигшээгээс зодог тайлж, нэг хэсэг амарсан Тони Кроос эцэст нь эх орондоо болж буй Еврод амжилт үзүүлэхээр эргэн ирлээ. Тэрбээр саяхан Реал Мадридын хамтаар тав дахь удаагаа УЕФА Аваргуудын лигт түрүүлсэн ч багаас явах шийдвэр гаргасан. Ирэх Еврогийн дараа шинэ замналынхаа талаар нухацтай бодох биз. Хэрэв Германы шигшээ түрүүлвэл Тони Кроосын нэр алтан бөмбөгийн өрсөлдөөнд дээгүүр яригдана. Ямартай ч талбайн удирдаач дөрөв дэх Евродоо оролцох гэж байна.

Пепе (41) – Португал

Цагтаа ногоон талбайн чанга залуусын нэг байж, олон довтлогчийн айдсыг төрүүлж явсан Пепе харих болоогүй. 40 гарсан ч сайн тоглолтоо хадгалж, Роналдогийн хамтаар шигшээ багтаа зүтгэхээр дуудагджээ. Дөрөв дэх Евродоо оролцох гэж буй Пепе 19 тоглолтод хоёр гоол оруулсан үзүүлэлттэй.

Хесус Навас (38) – Испани

Мөнхийн залуу, үрчлээ суудаггүй гэгддэг Хесус Навас өрсөлдөөн ихтэй Испанийн шигшээд дуудагджээ. Цагтаа Манчестер Ситигийн хамтаар Премьер лигт түрүүлж явсан тэрбээр нутгийнхаа Севильяаг зорьсноосоо тун сайн тоглолтыг үзүүлж буй. Хэзээ ч гол дүр байгаагүй ч туслах дүрээ тултал гүйцэтгэдэг Навас дэлхийн аварга, Европын аварга, Үндэстнүүдийн лиг гээд түрүүлж үзээгүй цом үгүй.

Хамгийн сонирхолтой нь Хесус Навас ганцхан удаа Еврод тоглож үзсэн нь тэртээ 2012 онд. Тэрбээр гурван тоглолтод нэг гоол оруулж байжээ. Өөрөөр хэлбэл, 12 жилийн дараа дахин Еврод тоглох гэж байна.

Каспер Шмейхель (37) – Дани

2016 онд Лэйстерийн хамтаар Премьер лигт түрүүлж, түүхээ бүтээчихсэн хүү Шмейхель дахин Еврод тоглоно. Аав Шмейхель хүүгээ бодвол 1992 онд Еврод түрүүлж байв. Харин хүү нь 2021 оны Еврод хагас шигшээд үлдсэн түүхтэй. Тэгвэл энэ удаад амжилтаа ахиулж чадах болов уу? Каспер гурав дахь Евродоо оролцоно.

Роберт Левандовски (35) – Польш

Польш гоолын машин Левандовски дахин нэг удаа шигшээ багаа чирээд Еврод оролцоно. Очсон газар, тоглосон лиг бүртээ гоол оруулдаг тэрбээр ирэх 2026 оны дэлхийн аваргын дараа шигшээ багаасаа зодог тайлах яриа гарчээ. Түүнээс өмнө сүүлийн Евродоо торгон жолоо өргөх гэж байна. Левандовски гурван Еврод 11 тоглолтод оролцохдоо таван гоол оруулжээ.

Марко Арнаутович (35) – Австри

Ур чадвар, нөөц бололцоогоо бүрэн ашигласан бол Марко өдийд шилдгүүдийн эгнээнд яригдах байв. Гэсэн хэдий ч Австрийн шигшээн гол хүн мөнөөс мөн. Түүний ур чадвар, гоолын мэдрэмж гайхалтай гэдгийг хөлбөмбөг сонирхогчид эчнээ мэднэ. Тэрбээр хоёр Еврод оролцохдоо нэг гоол оруулжээ.

Аксель Витцел (35) – Бельги

Тээр жил Оросын Зенит руу биш өөр баг руу явсан бол Модрич, Кроос шиг биш юм гэхэд дөхөж очих амжилт үзүүлэх байсан болов уу? Европын олон ч том багууд түүний араас хөөцөлдөж байсан. Гэхдээ одоо Атлетико Мадридад Диего Симеонегийн удирдлага дор муугүй тоглож байгаа. Бельгийн алтан үеийн төлөөлөгчдийн нэг Витцел гурав дахь Евродоо оролцоно.

Мануэль Нойер (38) – Герман

Хаалгачийн байрлалд өөрчлөлт хийсэн домогт Нойер сүүлийн ганц удаа шигшээ багтаа туслахаар ирлээ. Бэртэл гэмтлийн улмаас жил гаруй хугацаанд талбайд гараагүй тэрбээр 2022 оны дэлхийн аваргаас хойш шигшээ багтаа тоглоогүй гэх. Харин сүүлийн хоёр ч нөхөрсөг тоглолтод талбайд гарчээ. Түүний эргэн ирсэнд Марк-Андре тер Штеген л дурамжхан байгаа биз. Арга ч үгүй. Насаараа Нойерт дарагдаж, Германы шигшээ багийн эхний сонголт болж чадалгүй л явна. Ирэх Еврод Нагельсманн хэнийг нь гараанд гаргах вэ гэдэг сонирхолтой байна.