Германы шигшээ багийн ахлах дасгалжуулагч Юлиан Нагелсманн ирэх Еврогийн талаар "Дарамт мэдрэгдэж байгаа ч үүнээс илүүтэйгээр баяр баясалтай байна" гэв.

Өдгөө 36 настай тэрбээр өнгөрсөн оны есдүгээр сард Германы шигшээ багийн ахлах дасгалжуулагчаар томилогдсон. Нас залуу ч хөлбөмбөгийн талаарх мэдлэг туршлагаараа гайхагдсан мэргэжилтний тамирчны замнал бэртэл гэмтлийн улмаас эрт дууссан аж. Нагелсманн дөнгөж 28 насандаа Хоффейнхамыг удирдаж, Лейпциг болон Байерн Мюнхены хамтаар УЕФА Аваргуудын лигт оролцсон амжилттай.

Сөрөг-прессийн мастер Нагелсманны удирдаж буй баг илүү санаачлагатай, довтолгооны хөлбөмбөг толилуулдаг. Удахгүй эхлэх Европын аваргаар ч бид жинхэнэ утгаараа "Герман гоолын машин"-ыг харах биз.

Өнгөрсөн Евро-2020 тэмцээнээр Германы шигшээ хэсгээсээ шалгарсан ч хасагдах шатны эхний даваандаа бүдэрч, ард түмнээ, фэнүүдээ гонсойлсон. Үүгээр ч зогсохгүй хоёр дэлхийн аварга дараалан тааруу оролцож, олны шүүмжлэлийг дагуулав. Тэгвэл энэ жил эх орондоо түрүүлж, 1996 оноос хойш хүсэн хүлээсэн тивийн аваргын цомоо авчрах хүсэлтэй байна.

НАГЕЛСМАНН 8 НАСТАЙДАА 1996 ОНЫ ЕВРОПЫН АВАРГЫГ ҮЗЭЖ БАЙВ

Юлиан Нагелсманн "Би 1996 оны Европын аваргын түүхэн, алтан гоолыг оруулсан Оливер Бирхоффыг мэднэ. Хүүхэд байхдаа гайхалтай хөлбөмбөгчдийн талбай дээр хийсэн үйлдлүүдийг хийх гэж эхний үеийн завсарлагаанаар талбай руу явдаг байлаа. Байшингийнхаа цэцэрлэгт үеэлүд, найзуудтайгаа хөлбөмбөг тоглодог байсан. Мэдээж хүүхэд байхдаа үргэлж тамирчдыг даган дуурайдаг байв. Би 1998 оны Европын аваргыг тод санаж байна. Хэдхэн тоглолт л үзсэн л дээ. Би бүр тоглолт дуусаагүй байхад л бушуухан шиг гутлаа өмсчихсөн өөрөө бөмбөг өшиглөхийг хүсдэг байлаа. Телевизороор харсан зүйлсээ туршиж үзэхийг л хүссэн хэрэг" гэв.

-Нагелсманны хамгийн мартагдахааргүй Еврогийн дурсамж юу вэ?

-Мэдээж өмнө хэлсэнчлэн Бирхоффын алтан гоол бол түүх. Тэр л миний гайхалтай дурсамж. Мөн өнгөрсөн Еврогийн талаарх дурсамжууд бий л дээ. Гэхдээ германчуудын хувьд сайн зүйл биш гэдэг нь тодорхой. Эцэст нь ямар алба хашиж, багтаа хэрхэн анхаарал тавьж байгаагаас бүх зүйл хамаарна. Ирэх Еврогоос үлдэх дурсамж минь ирээдүйд сайхан сэтгэгдэл төрүүлнэ гэж найдаж байна.

-Шигшээ багийн дасгалжуулагчаар ажиллах ямар байна вэ?

-Клубын менежертэй харьцуулахад аливаа зүйлсийг өөрчлөхөд дэндүү төвөгтэй болдог юм байна. Арын албатайгаа, тамирчидтай ганцаарчлан яг зөв цагтаа ярих хэрэгтэй болно. Тамирчдадаа яг зөв цагт нь зөв мессежийг өгөх хэрэгтэй. Энэ нь ч үнэхээр нөлөө үзүүлдэг.

Олон тоглолт үзэх хэрэгтэй болно. Аль байрлалаас юу хүсч байгаагаа, аль байрлалд аль тамирчны клубдээ үзүүлж буй тоглолт илүү тохирох зэрэг талаар бодно. Багт хэн нь илүү тохирох вэ гэдэг асуултад хариулж, хэнийг сонговол илүү амжилттай байх вэ гэдэг шийдвэрийг гаргана. Олон нийт анзаараад байдаггүй олон зүйлс хөшигний ард өрнөдөг. Учир нь бид өдөр бүр бие биенээ хардаггүй, байнга хамт байдаггүй шүү дээ.

-Ирэх Евро-2024 тэмцээнд ямар амжилт хүлээж байна вэ?

-Амбиц бол бид түрүүлэхийг хүсч байна. Бүх тэмцээнд л тийм байдаг. Өөрсдийгөө Европын аварга болно гэж ам гарах нь тийм ч зөв үйлдэл биш байх. Оролцож буй бүх улс л адилхан бодож байгаа. Тэгээгүй бол эрхийн төлөө тэгж тэмцэхгүй шүү дэ. Бүх баг л түрүүлэх бодолтой ирж байгаа.

Мэдээж бид ч түрүүлэх бодолтой. Хэрэв бид бүхнээ дайчилж чадвал энэ бүхэн боломжтой. Бүх зүйл хамтдаа ирэх ёстой. Биднийг сүүлийн хэдэн жилээсээ илүү амжилт үзүүлнэ гэсэн хүлээлт хэдийнэ үүсчихсэн. Манай фэнүүд ч эх орондоо догдлол дүүрэн хүлээж байна.

Бид даалгавраа биелүүлэх болно. Маш том даалгавар. Үнэхээр хүнд байх болно. Олон олдоод байдаг боломж ч биш. Герман улс хоёр дахь удаагаа Европын аваргыг зохион байгуулж байна. Тамирчдын хувьд, дасгалжуулагч миний хувьд эх орондоо энэ тэмцээнд оролцоно гэдэг бол онцгой боломж. Дарамт мэдрэгдэж байгаа ч үүнээс илүүтэйгээр баяр баясалтай байна. Хэрэв бид талбай дээр тэр баярыг мэдэрч чадвал гайхалтай тэмцээн байх болно.

-Ирэх Европын аваргаас юу хүлээж байна?

-Шигшээ багийнхаа төлөө Германы клуб хоорондын өрсөлдөөнийг үл умартаж хүн бүр нэг баг дэмжинэ гэдэг сайхан боломж. Мэдээжийн хэрэг, бусад шигшээ багийн хөгжөөн дэмжигчид ч гэсэн Германд амарч, зугаацаж, гудамж талбайг баяраа тэмдэглэж, олон сайхан тоглолт үзэх бүс болгон хувиргах биз ээ.