Европын хөлбөмбөгийн аварга шалгаруулах тэмцээн нээлтээ хийхэд ердөө гуравхан хоног үлдлээ. Шигшээ багууд ч эхнээсээ Германыг зорьж, төвхнөөд байна. Европын аварга бол залуу тамирчдын гялалзах, өөрсдийгөө дэлхий нийтэд таниулах, түвшин ахих сайхан боломж. Энэ зун ч Германд олон гоц авьяастнууд тодорч, том клубуудыг араасаа гүйлгэх шинжтэй. Тэгвэл ирэх Еврогоор харцаа салгаж боломгүй, эртхэн мэдэж байх хэрэгтэй залуусыг танилцуулъя.

Эдгээр тамирчин бүгд 2005 он болон түүнээс хойш төрсөн гэдгийг санаарай.

АРДА ГУЛЕР /ТУРК/

"Турк Месси" гэгддэг тэрбээр 2022 онд Фенербахчегийн бүрэлдэхүүнд гялалзаж, Испанийн алдарт Реал Мадридыг зорьж байсан түүхтэй. Түүний араас Барселона клуб хүртэл хөөцөлдөж байсан аж. Харамсалтай нь, нарлаг Испани дахь эхний улирлаа бэртэл гэмтэлтэй байсаар өнгөрүүлсэн. Харин одоо шигшээ багтаа туслахаар дуудагдаад байна.

Өдгөө 19 настай, тоглолтын хэв маяг нь Мезут Өзилтэй адилхан гэж хэлэгддэг залуу плеймэйкерийн хувьд Реал Мадридын төлөө ердөө 12 тоглолтод оролцсон ч улирлын сүүлийн долоон тоглолтдоо зургаан гоол оруулжээ. Дасгалжуулагч Карло Анчелотти ч түүнийг ирэх улирал илүүтэйгээр ашиглах гэнэ.

СЕМИХ КЫЛЫЧСОЙ /ТУРК/

Еврог зорихын төлөө өнгөрсөн улирал өөрийгөө хангалттай харуулсан хүү эцэст нь шигшээ багтаа дуудагдсан. Дөнгөж 18 настай тэрбээр Туркийн Супер лигт Бешикташ багийн төлөө 11 гоол оруулснаас гадна Еврогийн өмнөх Италийн эсрэг нөхөрсөг тоглолтдоо дебютээ хийжээ.

Семих Кылычсойг хэдийнэ Манчестер Сити, Арсенал, Байерн Мюнхен зэрэг томоохон клубууд сонирхоод эхэлсэн бөгөөд ирэх Еврогоор хэрхэн тоглохыг нь ажиж байна. Хэрэв залуу хүү Германд гялалзаж чадвал түүний зах зээлийн үнэлгээ гайхмаар өсөх биз.

КОББИ МАЙНУ /АНГЛИ/

Өнгөрсөн улирал эхлэхийн өмнө Кобби Майну гэх хүүг Английн шигшээд дуудагдана гэж ярьсан бол олны доог тохуу болох байсан нь дамжиггүй. Тэгвэл Манчестер Юнайтедын бүтээгдэхүүн үүнийг хийж, эх орноо төлөөлөхөөр шигшээ багтаа ирлээ. Дөнгөж өнгөрсөн оны арваннэгдүгээр сард Премьер лигт деюбтээ хийсэн Ману үнэхээр гэрлийн хурдаар сайжирч, үзэгч фэнүүдийн хайртай тоглогч болсон.

Зөвхөн Олд Траффордод гангараад зогсохгүй шигшээ багийнхаа төлөө Бразил, Бельгийн эсрэг ч магтам тоглосон. Хурдтай, хараатай хагас хамгаалагч гоолын мэдрэмжтэй гэдгээ ч харуулж, ФА капын финалд хожлын гоол оруулсан билээ.

ЛЕО САУЭР /СЛОВАК/

Шигшээ багтаа ердөө хоёрхон тоглолтод оролцсон Лео Сауэр Европын аваргад оролцох гэж байна. Гэхдээ жигүүрийн залуу хүүд боломж нь олдвол энэ зуныг "эзэгнэх" ур чадвар, авьяас нь хангалттай бий.

Өдгөө 18 настай энэ хүү өнгөрсөн улирал Нидерландын Фейеноорд клубд тоглохдоо хоёр гоол, дөрвөн гоолын дамжуулалт өгчээ. Гол нь 45 минут тутамд гоолд оролцсон гэнэ. Боломж байсан бол үүнээс ч илүү үзүүлэлт толилуулах байжээ.

Зүүн жигүүрт аюул тарих Лео Словакийн шигшээ багийн түүхэн дэх хамгийн залуу тоглогч гэнэ. Дөнгөж өнгөрсөн гуравдугаар сард Майнугийн адилаар шигшээ багтаа дуудагджээ.

ГАБРИЕЛЬ СИГУА /ГҮРЖ/

Европын аваргад анх удаагаа оролцох гэж буй Гүржийн шигшээ баг зүгээр ч нэг оролцох гэж ирэхгүй бололтой. Илүү том амжилт хүлээж болохоор бүрэлдэхүүн байгаа аж. Харин тус бүрэлдэхүүн дэх хамгийн залуу нь Габриель Сигуа аж.

2022 онд нутгийнхаа Динамо Тбилис клубээсээ замналаа эхлүүлсэн түүнийг хожим нь Швейцарийн Базель клуб эгнээндээ элсүүлжээ. Өнгөрсөн улирал 18 настай хүү сэлгээнээс ихэнх тоглолтод оролцож, 17 тоглолтод гурван гоол оруулсан амжилттай.

АРТУР ВЕРМЕРЕН /БЕЛЬГИ/

Бельгийн "Алтан үе" өндөрлөх тийшээгээ хандаж, залуучууд доороос дахин итгэл найдвар дагуулсаар хүчтэй гарч ирж байна. Тэдний нэг бол Артур Вермерен. Өдгөө 19 настай тэрбээр нутгийнхаа Рояаль Антверп багт тоглодог бөгөөд 2023 онд баг нь лигтээ түрүүлж, 66 жил хүсэн хүлээсэн цомоо гардахад чухал үүрэг гүйцэтгэжээ. Энэ ч утгаараа хэдийнэ Барселона, Арсенал багуудын анхаарлыг татаж байсан ч өнгөрсөн нэгдүгээр сард Атлетико Мадрид 18 сая евро гаргаж, түүнийг элсүүлсэн гэнэ.

Талбайн гүнээс тоглолтыг удирддаг, найруулдаг Вермерен ирэх Еврогоор бага минутыг талбайд өнгөрүүлж магадгүй ч ирэх арван жил Бельгийн шигшээн гол хүн байх нь дамжиггүй.

ЛАМИН ЯМАЛЬ

Магадгүй ирэх Еврогийн хамгийн залуу тамирчин Ямаль байх. Дөнгөж 16 настай хүү өнгөрсөн улирал Барселонад үлгэрийн гэмээр улирлыг өнгөрүүлж, Испанийн төлөө хамгийн залуудаа гараанд гарсан мөн гоол оруулсан тоглогч болсон. Хэрэв тэр Барселона дахь сайн тоглолтоо хадгалж, Испанийн шигшээдээ үзүүлж чадвал супер одын хэмжээнд яригдах учиртай.

Хурдтай, тэсрэлттэй жигүүрийн тоглогчийг Мессигээс хойш Ла Масиагаас төрөн гарсан хамгийн шилдэг нь гэж ярьцгааж байна.

КЕНАН ЙЫЛДИЗ /ТУРК/

Туркийн шигшээ багийн авьяастнуудын ундарга дундрахгүй шинжтэй. Германчууд Кенаныг сайн танина. Учир нь тэрбээр өнгөрсөн арваннэгдүгээр сард Германы эсрэг нөхөрсөг тоглолтод гоол оруулж байв. Үүнээс сарын дараа Ювентусын төлөө анхны гараанд гарсан тоглолтдоо гайхалтай соло гоолыг оруулж, Европыг байлдан дагуулсан. Копа Италиагийн тоглолтод хүртэл хоёр гоол оруулсан амжилттай Байерн Мюнхены академийн бүтээгдэхүүн.

2022 онд Ювентус, Барселона хоёр Кенаны төлөө өрсөлдөж, эцэст нь Италийн баг ялж байлаа. Түүнд ч хангалттай боломж олгож буй. Довтолгооны байрлалд тоглодог Кенаны хууралтын чадвар, цохилтын хүч нь гайхалтай гэнэ.

УАРРЕН ЗАЙРЕ-ЭМЕРИ /ФРАНЦ/

Францын шигшээ багийн дундын шугам үнэхээр халгиж, цалгиж байна. Жил бүр залуу авьяастнууд гангарч, шигшээ багийн өрсөлдөөнийг үзүүштэй болгох юм. Энэ удаад ПСЖ-ийн залуу од Уаррен Зайре-Эмери тодорч, Дидье Дешамын таалалд нийцжээ.

18 настай хүү 2022 оноос эхлэн ПСЖ-ийн төлөө гараанд гарч, олны анхаарлыг татсан. Харин өнгөрсөн улирал УЕФА Аваргуудын лигт гоц гойд тоглож, шигшээ багтаа дуудагдах хэмжээнд хүрчээ. Талбайн гүнээс найруулдаг эсвэл бокс-тү-бокс тоглох чадвартай түүнд Францын шигшээ боломж олгоно гэж харж байна. Магадгүй Мбаппегийн адилаар шигшээ багийнхаа нүүр царай ч болохыг үгүйсгэхгүй.