Монгол Улсын Ерөнхийлөгчийн зөвлөх З.Мэндсайхан “Ховд аймагт баригдаж буй үйлдвэр технологийн парк ашиглалтад орсноор баруун бүсэд 100 гаруй жижиг үйлдвэр шинээр баригдаж, нэг сая малын түүхий эдийг боловсруулж экспортод гаргана” гэж бүлтрэв.

Ховд аймагт үйлдвэр технологийн парк байгуулах шийдвэр 2020 онд УИХ-аас гарсан ч өнөөдрийг хүртэл баригдаагүй байгаа юм. Гэвч УИХ-ын сонгуульд горилж буй бүхэн “Үйлдвэр баригдана, зам ашиглалтад оруулна” гэдэг сайхан амлалт өгдөг.

Товчхондоо сонгууль болохоор л Монголд үйлдвэрүүд 100, 100 гаараа баригдаж, орон сууцууд 300 мянгаараа босдог гэж хэлж болно. Сонгууль дуусаад дахиад дараагийн сонгууль болоход төсөл хэрэгжээгүй байх жишээтэй.

Тухайлбал, Ховд аймаг дахь үйлдвэр технологийн парк баригдалгүй дөрвөн жилийн нүүр үзэж байгаа бол Дархан-Уул аймагт байгуулах аж үйлдвэрийн парк 10 жилийн нүүр үзээд байна. Мөн Эмээлт дэх аж үйлдвэрийн парк ч 10 гаруй жилийн настай гэж хэлж болно. Нэг нь ч баригдаж ашиглалтад ордоггүй. Тэгсэн хэр нь ажил хийнэ гээд төсвөөс тэрбум, тэрбумаар нь мөнгө тавиулж авдаг.

УИХ-аар хэдэн жил болж байж, эдгээр төслүүдийн ажлын явц ямар яваа талаар мэдээлэл сонсохоор бүгд бүтэлгүй. Тендерт шалгарсан компани нь үнийн өсөлтийн улмаас ажил гүйцэтгэх чадамжгүй болсон. Эс бол хийсэн ажлаа буцаагаад төрд үнэлэн зарах гэдэг. Түүн дээрээ үнэ тохирдоггүй” гэхчлэн асуудал үүссээр буй. Харин нэр дэвшигчид энэ бол асуудал биш. Нэг л их үйлдвэр барьж, ашиглалтад оруулах юм ярин, Ховд, Увс, Завханчуудыг хошгируулж явна.

Г.ХОРОЛ