Хойд Солонгосын удирдагч Ким Жон Ун сүүлийн гурван сарын хугацаанд цэргийн үйл ажиллагаатай холбоотой арга хэмжээнүүдэд оролцох нь эрс ихэсчээ. Тодруулбал, Ким Жон Ун гуравдугаар сараас тавдугаар сарын хооронд олон нийтийн 33 арга хэмжээнд оролцсон байна. Энэ нь 2021-2023 оны мөн үеийн дундаж үзүүлэлтээс 59 хувиар өссөн тоо юм. 33 арга хэмжээний 19 нь цэргийн холбогдолтой аж. Өмнөх гурван жилийн дунджаар цэргийн холбогдолтой 6.7 үйл ажиллагаанд оролцсон байжээ.

Жилийн эцэст хийдэг намын хурлын үеэр Ким Жон Ун Солонгос хоорондын харилцааг бие биедээ дайсагнагч хоёр улсын харилцаа гэж тодорхойлоод, эвлэрлийг эрэлхийлэх нь утгагүй зүйл гэж мэдэгдсэн билээ. Эл мэдэгдлээс хойш цэргийн үйл ажиллагаанд оролцох нь эрс нэмэгдсэн гэж үзэж байна.

Хойд Солонгосын мэдээллийн хэрэгслүүдийн мэдээнд дүн шинжилгээ хийх замаар Ким болон намын бусад гурван гол албан тушаалтны үйл ажиллагаанд хяналт тавьдаг "KINU" байгууллага дээрх тооцооллыг гаргажээ.

Ким дурдсан хугацаанд зургаан удаа цэргийн сургуулилалт шалгажээ. Тухайлбал, гуравдугаар сарын 15-нд шүхэрчид оролцсон цэргийн сургуулилалтыг, гурав хоногийн дараа их бууны ангиудын сургуулилалтыг тус тус удирдсан байна.

Үүний зэрэгцээ тус улсын ерөнхий сайд Ким Ток Хун мөн хугацаанд 11 удаа олон нийтийн өмнө гарч ирсэн нь өмнөх гурван жилийн дундаж бага байгаа аж. Цаашилбал, тавдугаар сарын 24-нд болсон эрх баригч Ажилчны намын улс төрийн товчооны хуралд тодорхойгүй шалтгаанаар оролцоогүй.

Харин Ардын дээд хурлын Байнгын хорооны дарга Чое Рён Хэ энэ хугацаанд 13 удаа олон нийтийн үйл ажиллагаанд оролцсон. Энэ нь өмнөх гурван жилийн үзүүлэлтээс огцом өссөн тоо. Тэрбээр өмнөх гурван жилд ердөө дөрвөн удаа олон нийтийн үйл ажиллагаанд оролцсон аж. Ирэх аравдугаар сард Хятад, Хойд Солонгосын хооронд дипломат харилцаа тогтоосны 75 жилийн ой тохионо. Энэ үеэр Чое Рён Хэ Хятадыг зорьж магадгүйг тайланд дурджээ.

Эх сурвалж: YONHAP