Сүүлийн үед урлаг соёлын "од"-доос гадна нийгмийн сүлжээнд хамгийн олон дагагчтай инфлүүсерүүд хүч түрэн гарч ирсэн. Тэд сонгууль дөхөхөөр нийгмийн сүлжээнд улам идэвхжиж, эхнээсээ улс төрийн үзэл бодлоо илэрхийлж буй. Тэдний энэ үйлдэл харамсалтай нь олон мянган дагагчийнхаа урмыг нь хугалж, шүүмжлэл дагуулаад байна. Дуучин, тамирчин, жүжигчин, худалдаа эрхлэгч гээд хэн ч байсан олон мянган дагагчдад үлгэр дууриалал үзүүлж байгаа бол нийгэмдээ хариуцлага хүлээж, улсдаа татвар төлөх хэрэгтэйг иргэд хэлж байгаа юм. Учир нь тэд  дагагчдаа "худалдаж" өндөр ашиг олдог хүмүүс. Олон нийтийн сүлжээнд 200-300 сая төгрөгөөр сонгуулийн сурталчилгаа хийдэг гэх мэдээлэл цацагдсан.

Олон улсад олны танилуудыг сонгуулийн сурталчилгаанд ашиглах тохиолдол бий. Ингэхдээ инфлүүсерүүд улс төрийн үзэл бодлоо зарлахдаа улстөрч буюу хувь хүний тухай хоосон магтаж ярихгүйгээр энэ хүн ийм ажил хийх гэж байгаа, энэ хүний үйл хэрэг ийм зарчимд суурилдаг учраас дэмждэг гэдгээ ил тод нээлттэй хэлдэг.

Гэтэл Монголын нөлөөлөгчид дагагчдаа худалдаж, тэдний улс төрийн сонголтод буруугаар нөлөөлж, амьдралаар нь тоглож байгаад иргэдийг бухимдуулж байгаа юм.

Сошиал медиа платформын хэрэглээ нь  маркетеруудын хувьд анзаарахгүй өнгөрч болохгүй суваг болсон. Нэг ёсондоо, өдрөөс өдөрт цэцэглэж байгаа шинэ төрлийн бизнес юм. Монголын хүн амын 2.2 сая нь  фэйсбүүкчин бөгөөд 95,4 хувь нь гар утаснаасаа ханддаг гэх статистик байдаг. Үүнээс 205 мянга нь төлбөртэй зар сурталчилгаа явуулдаг идэвхитэй FB page хуудас аж.  Саяхныг болтол монголчууд инфлүүсер, энтрэпрэнэр гэж юу болохыг мэддэггүй байлаа. Харин одоо олон хүн инфлүүсер болж, сошиал медиа платформын зах зээлээс мөнгө олж байна.

Олон дагагчтай, пост, шейрийг нь уншдаг, хүлээдэг хүмүүстэй тэдгээр инфлүүсерийг ашиглан бизнесийн сурталчилгаагаа явуулах нь өдгөө монголчуудын хувьд хэвийн үзэгдэл болсон.

Монголын инфлүүсерүүдийн үг бүхэн үнэн биш. Улс төрийн сонголтоос гадна өнгөрсөн хугацаанд эрүүл мэндээрээ хохирох тохиолдол ч цөөнгүй гарсан. Өндөр үнэтэй мэс засал, баталгаатай, баталгаагүй гоо сайхны үйлчилгээг бусдад санал болгосон нь эцэстээ хэн нэгний амь нас, эрүүл мэндэд аюул учруулбал яах вэ. Хагалгааг даагаагүйнх нь хохь болж хохирч, инфлүүсерүүд харин дараагийнхаа ашиг орлогыг хайн баталгаатай бус энэ төрлийн үйлчилгээг цэцэглүүлсээр л суух уу. Өнгөрсөн хугацаанд гоо сайхны өндөр эрсдэлтэй хагалгаанд орж, зуурдаар хорвоог ор хугахисон харамсалтай тохиолдлууд хэд, хэд гарсныг та бүхэн мэднэ. Жишээ татвал, 2019 онд "Тод каннам" эмнэлэгт өөх соруулах мэс засалд орсон 29 настай эмэгтэй нас барсан хэрэг гарч байв.