Өнгөрсөн зун Сэлбэ үерлэж ойролцоох орон сууцны хотхонуудын айл өрх, үйл ажиллагаа эрхэлж байсан олон аж ахуй нэгж хохирсон. Энэ жил мөн өнгөрсөн зунтай адил үерийн эрсдэл их байгааг нийслэлээс анхааруулсан. Тиймдээ ч эрсдэл өндөр дүүргүүдэд онцгой анхаарч байгаагаа мэдэгдэж, ус соруулах насостой болгохоо албаныхан амлаж байв.

Тэгвэл төвийн дүүргүүдэд үерийн эрсдэл үүссэн тохиолдолд ус соруулах насосыг нийслэлээс хүлээлгэж өгчээ.

Хэдийгээр өнгөрсөн зуны үерээс хойш жилийн хугацаа өнгөрсөн ч нийслэлд үер буувал авч хэрэгжүүлэх арга хэмжээ гэх дорвитой хийсэн ажил бараг байхгүй. Ямартай ч Сэлбэ дагасан хэсгүүдэд барьсан обьектуудыг буулгасан. Гэхдээ үүнээс өөр сэргийлэх далан, шуудуу татсан байршил цөөн. Тиймээс энэ жил өнгөрсөн зуныхтай ижил үер болбол эд хөрөнгө эрүүл мэнд, эрдэнэт амь насаараа хохирохгүй гэх баталгаа байхгүй. Байгалийн гамшиг хэлж ирдэггүй учир иргэн бүр анхааралтай сэрэмжтэй байхыг ч албаныхан мэдээлсэн.

Гэхдээ эрсдэлийг тооцоолж албаныхан тодорхой хэмжээнд урьдчилан сэргийлэх ажлуудыг шат дараатайгаар хийж буй.

Тухайлбал, Улсын онцгой комисс, Нийслэлийн Засаг даргын тамгын газар, Онцгой байдлын ерөнхий газраас энэ долоо хоногт төвийн дүүргүүд болон зарим чиг үүргийн байгууллагуудыг ус соруулах насосоор хангасан. Болзошгүй үер, усны эрсдэлээс урьдчилан сэргийлэх, бэлэн байдлыг хангах ажлын хүрээнд Ус сувгийн удирдах газар, Орон сууц нийтийн аж ахуйн удирдах газар, Геодизи, усны барилга байгууламжийн газар болон Баянзүрх, Чингэлтэй, Хан-Уул, Баянгол, Сонгинохайрхан, Налайх, Багануур дүүргүүдэд ус зайлуулах насос хүлээлгэн өгчээ.

Улаанбаатар хотод энэ жил өмнөх жилүүдээс илүү их хур тунадас орох төлөвтэй байгааг мэргэжлийн байгууллагууд хэлж байгаа тул болзошгүй эрсдэлээс урьдчилан сэргийлэх үүднээс ийнхүү дүүргүүдийг ус соруулах насосоор хангаж байгаагаа онцолсон.

Тус ус соруулах насос нь 1 цагт 300 метр куб ус соруулах хүчин чадалтай бөгөөд 2023 онд нийслэл долоон ширхгийг худалдан авч байжээ.